རྒྱ་གར་གཞུང་ལ་རྒྱ་ནག་ནས་དྲ་རྒྱའི་ཐོག་གསང་འཛུལ་བྱས་པ།

༄༅༎རྒྱ་གར་གཞུང་གི་ལྷན་ཁང་ཁག་ནང་ཡོད་པའི་ཀོམ་པིའུ་ཊར་ལ་རྒྱ་ནག་ནས་དྲ་རྒྱའི་ཐོག་གསུང་འཛུལ་གྱིས་ གཞུང་འབྲེལ་གསང་གནས་རྐུ་འཁྱེར་གྱི་ལས་འགུལ་རབ་དང་རིམ་པ་ཞིག་སྤེལ་བཞིན་སྐོར་ རྒྱ་གར་གྱི་ཀྲའེམ་སེ་ཨོཕཱ་ཨིན་ཌི་ཡ་ཞེས་པའི་གསར་ཤོག་གིས་གནས་ཚུལ་སྤེལ་ཡོད་པ་རེད་

གོང་ཞུས་གསར་ཤོག་དེས་ཞིབ་ཕྲའི་གནས་ཚུལ་ཞིག་སྤེལ་བའི་ནང་ རྒྱ་གར་གཞུང་གི་ལྷན་ཁང་ཁག་ནང་ཡོད་པའི་ཀོམ་པིའུ་ཊར་ལ་རྒྱ་ནག་ནས་ཀོམ་པིའུ་ཊར་གྱི་གློག་ལས་ཐོག་ནས་གསང་བའི་གནས་ཚུལ་རྟོག་ཞིབ་བྱེད་བཞིན་པ་ཤེས་ཚོར་བྱུང་ཡོད་པ་དང་ དེ་ཡང་ཀོམ་པིའུ་ཊར་གློག་འཕྲུལ་ཐོག་ གསང་འཛུལ་རྟོག་ཞིབ་བྱེད་མཁན་ཚོས་ གཙོ་བོ་རྒྱ་གར་ཕྱི་སྲིད་ལྷན་ཁང་དང་ རྒྱལ་སྲུང་ལྷན་ཚོགས་གཉིས་ཀྱིས་བེད་སྤྱོད་བྱ་སའི་ཀོམ་པིའུ་ཊར་གྱི་ནང་གསར་འཛུལ་བྱས་ཡོད་སྐོར་བཀོད་ཡོད་པ་རེད་ དབྱིན་སྐད་ནང་ཀོམ་པིའུ་ཊར་ཧེག་ཀིང་ཞེས་པའི་རྒྱང་རིང་ཀོམ་པིའུ་ཊར་འཕྲུལ་རིག་གི་སྒྱུ་རྩལ་བེད་སྤྱོད་ཀྱིས་ གཞན་གྱི་ཀོམ་པིའུ་ཊར་ནང་གསང་འཛུལ་བྱས་ཏེ་ཀོམ་པིའུ་ཊར་དེའི་ཐོག་ལས་གཞིའི་གནད་དོན་ཇི་བཀོད་ཆ་ཚང་ལ་རྟོག་ཞིབ་ཐུབ་ཀྱི་ཡོད་པ་རེད་ མཚན་འདོན་མ་གནང་བའི་ རྒྱ་གར་གྱི་གཞུང་འབྲེལ་དཔོན་རིགས་ཚོས་ ཀྲའེམ་སེ་ཨོཕཱ་ཨིན་ཌི་ཡ་ གསར་ཤོག་ལ་རྒྱ་ནག་ཕྱོགས་ནས་རྒྱ་གར་གཞུང་གི་ཀོམ་པིའུ་ཊར་ལ་གནོད་འཚེའི་ལས་འཆར་དེ་ལོ་ངོ་གཅིག་དང་ཕྱེད་ཀ་ཙམ་ནས་སྤེལ་བཞིན་ཡོད་པ་དང་ གསང་འཛུལ་བྱེད་མཁན་གྱི་ཚད་གཞི་དེ་ཧ་ཅང་མཐོ་པོ་ཡོད་སྐོར་ངོ་སྤྲོད་གནང་ཡོད་པ་རེད་