རྒྱལ་བ་ཀརྨ་པར་སྐྱོན་འཛུགས་ཞུས་པ་ཕྱིར་བསྡུ།

༄༅།།རྒྱ་གར་གྱི་དཔོན་རིགས་མཐོ་གྲས་ཤིག་གིས་དེ་སྔོན་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ལ་ནག་ཉེས་སྙོན་འཛུགས་ཞུས་པ་ཡོངས་རྫོགས་ཕྱིར་བསྡུ་ཞུས་པ་ཡིན་སྐོར་ད་རིང་གསུངས་ཡོད་པའི་གནས་ཚུལ་འདུག དཔལ་རྒྱལ་དབང་ཀརྨ་པའི་བཞུཌ་གནས་དགོན་པ་ནས་རྒྱ་མིའི་དངུལ་ལོར་སོགས་ཕྱི་རྒྱལ་གྱི་དངུལ་ལོར་ས་ཡ་གཅིག་ལྷག་ཐོན་པའི་རྗེས་སུ་རྒྱ་གར་བྱང་ཕྱོགས་མངའ་སྡེ་ཧི་མ་ཅལ་གྱི་ཉེན་རྟོག་མི་སྣས་སྔ་ལོའི་ཕྱི་ཟླ་༡༢་པའི་ནང་དངུལ་ནག་པོ་མང་པོ་གསོག་འཇོག་བྱས་ཚུལ་ཁྲིམས་འགལ་ཡིན་ཚུལ་ནག་ཉེས་སྙོན་འཛུགས་ཞུས་པར་རྒྱ་གར་གྱི་གསར་འགྱུར་བརྒྱུད་ལམ་ཁག་ནང་དེའི་སྐོར་གནས་ཚུལ་འདྲ་མིན་བཀོད་སྤེལ་བྱས་ཡོད་པ་རེད་ ཁ་ས་ཕྱི་ཟླ་༤་ཚེས་༢༣་ཉིན་མངའ་སྡེ་ཧི་མ་ཅལ་གྱི་ནང་སྲིད་ལས་ཁང་གི་དཔོན་རིགས་ཨེསི་པི་སིང་ཡིས་དཔལ་རྒྱལ་བ་ཀརྨ་པ་མཆོག་ལ་ཁྲིམས་འགལ་ནག་ཉེས་ཀྱི་སྐྱོན་འཛུགས་ཞུས་པ་ཡོངས་རྫོགས་ཕྱིར་བསྡུ་བྱེད་ཀྱི་ཡོད་སྐོར་དང་ཀརྨ་པ་རིན་པོ་ཆེ་མཆོག་ལ་ནག་ཉེས་སྐྱོན་འཛུགས་ཞུས་པའི་གནད་དོན་ཚང་མའི་སྐོར་མངའ་སྡེའི་གཞུང་གི་ཁྲིམས་རྩོད་པ་དང་ཉེན་རྟོགས་མི་སྣ་ཚོས་དཔྱད་ཞིབ་མཐིལ་ཕྱིན་པ་བྱས་པའི་རྗེས་སུ་ ཁོང་གིས་ཁྲིམས་འགལ་གནང་བའི་ར་སྤྲོད་དཔང་རྟགས་གང་ཡང་ཐོན་མ་སོང་ཞེས་ཞལ་པར་བརྒྱུད་ནས་ཕེ་རན་སིའི་གསར་ལས་ཁང་ལ་གསུངས་འདུག དཔལ་རྒྱལ་བ་ཀརྨ་པ་རིན་པོ་ཆེ་མཆོག་དགུང་གྲངས་༡༤་ཕེབས་སྐབས་རྒྱ་གར་ནང་བཙན་བྱོལ་དུ་ཕེབས་འབྱོར་བྱུང་བ་ནས་བཟུང་བཞུགས་སྒར་རྡ་རམ་ས་ལའི་ཉེ་འཁྲིས་དཔལ་རྒྱུད་སྟོད་གྲ་ཚང་ནང་གནས་བཞུགས་གནང་བཞིན་ཡོད་པ་རེད་ ད་རེས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ལ་ཁྲིམས་འགལ་ནག་ཉེས་སྐྱོན་འཛུགས་ཡོངས་རྫོགས་ཕྱིར་བསྡུ་བྱས་པའི་ཐག་གཅོད་དེར་ཁོང་གི་ཞབས་ཞུ་བ་རྣམས་ཀྱིས་དགའ་བསུ་ཞུས་ཡོད་ཅིང་ དགོན་པའི་མགྲིན་ཚབ་པ་དགོན་པོ་ཚེ་རིང་ལགས་ཀྱིས་ང་ཚོར་ཁྲིམས་ཀྱི་དབང་བསྒྱུར་ལ་ཡིད་ཆེས་ཚ་ཆང་ཡོད་སྟབས་རྒྱ་གར་གཞུང་གིས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ཁྲིམས་འགལ་ནག་ཉེས་ཅན་པའི་ལས་དོན་གང་གི་ནང་ལ་ཡང་ཐེ་གཏོགས་མེད་སྐོར་ཐག་གཅོད་གནང་རྒྱུ་ཡིན་པ་ཤེས་ཀྱི་ཡོད་ཅེས་གསུངས་ཡོད་པའི་གནས་ཚུལ་འདུག།