བ་ཕྱུགས་སྲུང་སྐྱོབ་ཐུབ་རྒྱུའི་དགའ་ཚོར་བྱེད་ཀྱི་ཡོད་འདུག

ཧིན་རྡུའི་ཆོས་དཔོན་མངའ་སྡེའི་བློན་ཆེན་ལ་བསྐོས་བས་ཧིན་རྡུའི་ཆོས་བྱེད་པ་མང་པོས་བ་ཕྱུགས་སྲུང་སྐྱོབ་ཐུབ་རྒྱུའི་དགའ་ཚོར་བྱེད་ཀྱི་ཡོད་འདུག
དེ་ཡང་Afp གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་སྲིད་བློན་Narendra Modi་མཆོག་གིས་ད་རེས་Uttar Pradesh སྟེ་UP གི་མངའ་སྡེའི་ནང་འོས་བསྡུའི་རྒྱལ་ཁ་ཆེན་པོ་ཞིག་ཐོབ་པའི་རྗེས། མངའ་སྡེའི་འཛིན་སྐྱོང་གི་འགན་འཁུར་ཧིན་རྡུའི་ཆོས་དཔོན་Adityanath ལ་གནང་བ་དེས། ཧིན་རྡུའི་ཆོས་བྱེད་མང་ཚོགས་མང་པོ་ཞིག་ལ་བ་ཕྱུགས་ལ་སྲུང་སྐྱོབ་ཐུབ་རྒྱུ་ཡིན་པའི་དགའ་ཚོར་ཆེན་པོ་བྱེད་ཀྱི་ཡོད་འདུག
ཧིན་རྡུའི་ཆོས་བྱེད་པ་ཚོས་བ་ཕྱུགས་ལྷར་ངོས་འཛིན་གྱིས་རྩ་ཆེར་འཛིན་གྱི་ཡོད་པ་དང་། རྒྱུ་མཚན་དེར་བརྟེན་བ་ཕྱུགས་བསད་དེ་གླང་ཤ་བཟའ་མཁན་དང་། བཙོང་མཁན་ལ་ལྟ་ཕྱོགས་ངན་པ་འཛིན་གྱི་ཡོད་པ་རེད།
སྔར་ལོ་གླང་ཤ་ཟས་པའི་ཉེས་བཙུགས་འོག་ཧིན་རྡུའི་མང་ཚོགས་ཀྱིས་རྡུང་རྡེག་འོག་ཚེ་སྲོག་ཤོར་བའི་ཁ་ཆེའི་ཆོས་བྱེད་པ་Mohamad Akhlag གི་གྲོང་གསེབ་དེའི་ནང་ ཧིན་རྡུའི་ཆོས་དཔོན་Adityanath མངའ་སྡེའི་བློན་ཆེན་ལ་བསྐོ་གཞག་བྱུང་བའི་གནས་ཚུལ་ཐོན་སྐབས། ཧིན་རྡུ་བ་ཚོས་དགའ་ཚོར་གྱིས་རྟེན་འབྲེལ་བྱས་ཡོད་པ་དང་། ཁ་ཆེ་མང་ཚོགས་བློ་གཡེང་བྱེད་དགོས་པ་ཞིག་ཆགས་ཡོད་འདུག
གནས་ཚུལ་ནང་། གྲོང་གསེབ་དེའི་ནང་ཧིན་རྡུའི་མང་ཚོགས་ཀྱིས་གལ་ཏེ་ཁོང་ཚོར་བ་ཕྱུགས་ལ་སྲུང་སྐྱོབ་དང་། འཛུགས་བསྐྲུན་ཡར་རྒྱས་གཉིས་འདམ་ཁ་བྱ་དགོས་པ་ཡིན་ན་བ་ཕྱུགས་སྲུང་སྐྱོབ་བྱ་རྒྱུ་དེ་གལ་ཆེ་བར་འཛིན་རྒྱུ་ཡིན་པའི་བསམ་ཚུལ་ཤུགས་ཆེ་བ་བརྗོད་ཀྱི་ཡོད་འདུག
མངའ་སྡེའི་བློན་ཆེན་གསར་བ་ཆོས་དཔོན་Adityanath གིས་མངའ་སྡེའི་ནང་མང་ཚོགས་གང་ཡོད་ལ་ཕན་པའི་འཛུགས་བསྐྲུན་ཡར་རྒྱས་གཏོང་རྒྱུ་ཡིན་པ་གསུངས་ཀྱི་ཡོད་པ་རེད། ཡིན་ནའི་ཁོང་གི་ལས་འཆར་དང་པོ་མངའ་སྡེའི་ནང་ཁྲིམས་མཐུན་མིན་པའི་ཤ་ཁང་ཁག་སྒོ་རྒྱབ་ཡོད་པ་དང་། ཤ་ཁང་འཛིན་མཁན་མང་ཆེ་བ་ཁ་ཆེ་བ་ཡིན་པས་མངའ་སྡེའི་ནང་མི་འབོར་ས་ཡ་༤༠ཙམ་ཁ་ཆེ་ཡིན་པའི་མང་ཚོགས་ཁྲོད་ཤ་ཁང་འཛིན་མཁན་མང་པོ་ཞིག་ལས་མེད་འགྱུར་བཞིན་པ་རེད།

གསར་འགོད་པ་བློ་བཟང་ཡེ་ཤེས།