རྒྱལ་སྤྱིའི་བོད་དོན་ལས་འགུལ་ཁང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ལ་བོད་དོན་གླེང་སློང་གནང་དགོས་པའི་འབོད་སྐུལ།

ཨ་རིའི་རྒྱལ་ས་ཝ་ཤིང་ཊོན་ནང་རྟེན་གཞི་བྱེད་པའི་རྒྱལ་སྤྱིའི་བོད་དོན་ལས་འགུལ་ཁང་གིས། ཕྱི་ཚེས་ ༢༣ ཉིན་སྤྱི་བསྒྲགས་ཤིག་སྤེལ་གནང་བ་དེའི་ནང་།
འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྤྱི་ཁྱབ་པ་ལྕམ་ Michelle Bachelet མཆོག་རྒྱ་ནག་གི་ཤིན་ཅང་ཞེས་འབོད་པའི་མངའ་
ཁུལ་དུ་གཟིགས་ཞིབ་ཏུ་ཕེབས་སྐབས། ཁོང་གིས་བོད་ཀྱི་གནད་དོན་དེ་ཁ་གསལ་པོ་དང་ཤུགས་ཆེན་པོའི་ཐོག་གླེང་སློང་དང་། རྒྱ་ནག་གིས་བོད་ནང་བོད་མིའི་འགྲོ་བ་མིའི་ཐོབ་ཐང་ཁག་འཆར་གཞི་དང་ལྡན་པའི་ཐོག་བརྡལ་བཤིགས་བཏང་དང་གཏོང་བཞིན་པ་དེར་སྐྱོན་བརྗོད་གནང་དགོས་པའི་དགོས་འདུན་བཏོན་གནང་འདུག
དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་སྤྱི་བསྒྲགས་དེའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྤྱི་ཁྱབ་པ་ལྕམ་ Bachelet མཆོག་ད་ཐེངས་བོད་ནང་ཕེབས་ཀྱི་མེད་པ་དང་། བོད་ནང་གི་གནས་སྟངས་རང་དབང་དང་ལྡན་པའི་ཐོག་ནས་ཞིབ་འཇུག་ཡོང་རྒྱུར་འཆར་གཞི་དང་ལྡན་པའི་ཐོག་སྒོ་བརྒྱབ་ཡོད་པར་བརྟེན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྤྱི་ཁྱབ་པས་ཉུང་མཐར་རྒྱ་ནག་གཞུང་ལ་བོད་ཀྱི་གནད་དོན་དེ་གླེང་སློང་གནང་དགོས་ཞེས་སྤྱི་བསྒྲགས་དེའི་ནང་བཀོད་གནང་ཡོད་པ་རེད་འདུག ཡང་གོང་ཞུས་ཀྱི་སྤྱི་བསྒྲགས་དེའི་ནང་འཛམ་གླིང་གི་རྒྱལ་ཁབ་ཁག་གི་གཞུང་ཁག་དང་གྲོས་ཚོགས་དང་མང་ཚོགས་ཀྱི་ཚོགས་པ་ཁག་དང་ཐ་ན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཆེད་ལས་མཁས་པ་ཚོས། བོད་ནང་གི་འགྲོ་བ་མིའི་ཐོབ་ཐང་ཇི་ཞན་ཇི་སྡུག་ཏུ་འགྲོ་བའི་གནས་བབས་འཐེར་འདོན་གནང་ཡང་ལྕམ་Bachelet ཡིས་དེ་ལྟར་གནང་མེད་པ་རེད། གནས་བབས་དེས་བོད་ནང་གི་འགྲོ་བ་མིའི་ཐོབ་ཐང་གི་ལས་འགུལ་ཐོག་གནོད་སྐྱོན་འཚབ་ཆེ་བཏང་བ་མ་ཟད་དེ་རྒྱ་ནག་དམར་ཤོག་ཚོགས་པའི་ལག་ཆར་བེད་སྤྱོད་ཆགས་ཡོད་པ་རེད་ཅེས་སོགས་གོང་ཞུས་ཀྱི་རྒྱལ་སྤྱིའི་བོད་དོན་ལས་འགུལ་ཁང་གི་སྤྱི་བསྒྲགས་དེའི་ནང་བཀོད་གནང་ཡོད་པ་རེད།།
གསར་འགོད་པ། ལྷུན་གྲུབ་ཚེ་རིང་།
རྩོམ་སྒྲིག་པ། རིག་ལྡན་སྒྲོལ་མ
དྲ་ཐོག་སྤེལ་མཁན། རྟ་མགྲིན་དབང་ཕྱུག