དབྱིན་ཇིའི་སྐྱོན་བརྗོད་ལ་རྒྱ་གཞུང་ནས་དགག་བྱ།

༄༅།    །རྒྱ་ནག་གི་གཞུང་འབྲེལ་ཤིན་ཧ་གསར་འགྱུར་ལས་ཁང་ནས་སྤེལ་བའི་གནས་ཚུལ་ལ་གཞིགས་ན། ཁ་ས་རེས་གཟའ་ལྷག་པའི་ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་མ་ཧའོ་ ཆུན་ཡིང་གིས། ཉེ་ཆར་དབྱིན་ཇིའི་ཕྱི་སྲིད་བློན་ཆེན་ཧུ་གོ་ སེ་ཝེར་ནས་བོད་ནང་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་ལ་ཐུགས་འཚབ་ཡོད་ལུགས་བསྒྲགས་གཏམ་སྤེལ་བ་དེར་ང་ཚོ་མཐའ་ཅིག་ཏུ་ངོ་རྒོལ་ཡོད། གནས་ཚུལ་དེ་དག་ནི་ཁུངས་མེད་ཀྱི་སྐྱོན་བརྗོད་ཞིག་ཡིན་པས་མ་ཟད།    རྒྱ་ནག་གི་ནང་སྲིད་ལ་ཐེ་བྱུས་བྱས་པ་ཞིག་ལ་ངོས་འཛིན་བྱེད་ཀྱི་ཡོད། དེ་འདྲ་ཡིན་དུས་དབྱིན་ཇིའི་གཞུང་ནས་ནོར་འཁྲུལ་ཡོ་སྲངས་བྱེད་ནས་བསམ་ཚུལ་དེར་ནན་པོའི་ཐོག་བསམ་བློ་གཏོང་དགོས་ལུགས་འགྲེལ་བརྗོད་བྱས་པ་དང་སྦྲགས།    མ་འོངས་པར་ཡང་རྒྱ་ནག་གི་ནང་སྲིད་ལ་ཐེ་བྱུས་འདི་རིགས་མི་ཡོང་བ་དང་ཡུལ་གཉིས་ཀྱི་འབྲེལ་བར་དོ་ཕོག་མི་འགྲོ་བའི་ཐད་བསམ་ཤེས་བྱེད་དགོས་རྒྱུ་གལ་ཆེན་པོ་ཡིན་ལུགས་ཀྱང་བཤད་ཡོད་པ་རེད། དེ་དང་ཕྱོགས་མཚུངས་རྒྱ་ནག་གཞུང་གི་མགྲིན་ཚབ་མས། འདི་ལོའི་ཕྱི་ཟླ་ལྔ་པའི་ནང་དབྱིན་ཇིའི་སྲིད་བློན་མཆོག་ནས་༧གོང་ས་ཏྭ་ལའི་བླ་མ་དང་མཇལ་འཕྲད་གནང་བ་དེས་ཡུལ་གཉིས་ཀྱི་འབྲེལ་བར་དོ་ཕོག་ཐེབས་ཡོད་པའི་སྐོར་ཡང་ལུང་འདྲེན་བྱས་ཡོད་པ་རེད།།