རྒྱལ་སྤྱིའི་འགྲོ་བ་མིའི་ཐོབ་ཐང་གི་སྙན་ཐོ་འདོན་སྤེལ།

༄༅༎རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ཕྱི་ཚེས་༢༠ཉིན་ཕྱི་ལོ་ཉིས་སྟོང་དགུ་ལོའི་འཛམ་གླིང་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གནས་སྟངས་ཀྱི་སྙན་ཐོ་ཐེངས་༢༠དེ་འདོན་སྤེལ་གནང་ཡོད་པ་དང་དེའི་ནང་བོད་ནང་གི་གནས་སྟངས་སྐོར་དམིགས་བསལ་དབྱེ་ནས་བཏོན་ཡོད་པ་བཞིན་ཕྱི་ལོ་ཉིས་སྟོང་དགུ་ལོའི་ནང་རྒྱ་ནག་གཞུང་གིས་བརྗོད་པའི་བོད་རང་སྐྱོང་ལྗོངས་དང་དེ་བཞིན་རྒྱ་ནག་གི་ཟི་ཁྲོན་དང་ཀན་སུའུ་མཚོ་སྔོན་སོགས་ཞིང་ཆེན་ཁོངས་སུ་དབྱེ་བའི་བོད་མིའི་ས་ཁུལ་ཚང་མའི་ནང་དམ་བསྒྲགས་ཀྱི་སྲིད་བྱུས་ཉིས་སྟོང་བརྒྱད་ལོ་ནས་བཟུང་མུ་མཐུད་ལག་ལེན་བསྟར་མུས་ཡིན་པ་མ་ཟད་ཕྱི་ལོ་ཉིས་སྟོང་དགུ་ལོའི་ནང་བོད་མི་གཉིས་ལ་སྲོག་ཐོག་གི་ཉེས་ཆད་བཏང་ཡོད་པའི་སྐོར་དང་   དེ་དང་ཕྱོགས་མཚུངས་ཕྱི་རྒྱལ་མི་རིགས་བོད་ནང་བསྐྱོད་རྒྱུར་དམ་བསྒྲགས་བཀག་སྡོམ་ཤུགས་ཆེ་བྱེད་བཞིན་པ་ཟད་བོད་མི་མུ་མཐུད་ནས་འཛིན་བཟུང་དང་ཁྲིམས་ཐག་བཅད་ཀྱི་ཡོད་པ་དཔེར་ན་ཉེ་བའི་ཆར་ཁམས་ལི་ཐང་ཁུལ་གྱི་ཕུར་བུ་ཚེ་རིང་རིན་པོ་ཆེ་དང་དེ་བཞིན་གློག་བརྙན་བཟོ་སྐྲུན་གནང་མཁན་དོན་གྲུབ་དབང་ཆེན་ལགས་སོགས་ལ་བཙོན་འཇུག་གི་ཁྲིམས་ཐག་བཅད་ཡོད་ཅིང་ད་དུང་བོད་ནང་བོད་མི་འཕོན་ཆེ་གར་སོང་ཆ་མེད་དུ་འགྱུར་བཞིན་པའི་གནས་སྟངས་ཚབས་ཆེ་ཡོད་མུས་ཡིན་པ་དང་ལྷག་པར་དུ་བོད་ཀྱི་རྒྱལ་ས་ལྷ་སའི་ཁུལ་དུ་རྒྱ་ནག་གཞུང་གིས་ཁ་བྲལ་ལ་ངོ་རྒོལ་ཞེས་པའི་ལས་འགུལ་སྤེལ་ནས་ལས་འགུལ་དེའི་འོག་ཉིས་སྟོང་བརྒྱད་ལོར་ཞི་བའི་ངོ་རྒོལ་རྔམ་སྟོན་ནང་ཞུགས་མཁན་དང་དེ་བཞིན་རྒྱ་གར་དུ་བྲོས་བྱོལ་དུ་བསྐྱོད་མཁན་གྱི་ནང་མི་སྤུན་མཆེད་དང་ཆབ་སྲིད་བཙོན་པ་ཟུར་པ་ཚོའི་ནང་མི་སྤུན་མཆེད་དེ་མིན་ཆབ་སྲིད་བཙོན་པ་དང་ཁོང་ཚོའི་ནང་མི་ཚོར་ལྟ་རྟོགས་དང་སེམས་འཁུར་བྱེད་མཁན་སོགས་ལ་བསུན་བཙིར་དང་དམ་བསྒྲགས་བཀག་སྡོམ་སོགས་བྱེད་ཀྱི་ཡོད་པའི་སྐོར་དཔེ་མཚོན་དྲངས་ནས་ཞིབ་ཕྲ་བཀོད་ཡོད་པ་རེད་ རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་སྤེལ་བའི་ཤོག་གྲངས་༦༡༢ཡོད་པའི་ཉིས་སྟོང་དགུ་ལོའི་ལོ་འཁོར་སྙན་ཐོ་དེའི་ནང་ འཛམ་གླིང་ཡུལ་ཁག་དང་ས་ཁུལ་༩༠ལྷག་ཙམ་ནང་གི་འགྲོ་བ་མིའི་ཐོབ་ཐང་གནས་སྟངས་གསལ་སྟོན་གནང་ཡོད་པ་རེད་