ལྷ་ས་གྲོང་ཁྱེར་ནང་གི་བོད་མིའི་མགྲོན་ཁང་གི་དཀའ་ངལ།

དེ་ཡང་ཕྱི་ལོ་༢༠༠༨ལོར་བོད་ཀྱི་རྒྱལ་ལྷ་སར་ཞི་ངོ་རྒོལ་ཤུགས་ཆེ་བྱུང་རྗེས་།  རྒྱ་གཞུང་གིས་ལྷ་སར་གནས་མདོ་སྟོད་སྨད་ཁུལ་ནས་ཡིན་པའི་ཚོང་པ་མང་ཆེ་བ་ཕྱིར་འཕུད་བཏང་ཡོད་པ་དང་། དེའི་རྗེས་ནས་བཟུང་ཁམས་དང་ཨ་མདོའི་ཕྱོགས་ཀྱི་ཚོང་པ་དང་། གནས་མཇལ་བ་སོགས་ལ་བཀག་སྡོམ་བྱས་སྟབས་ད་ལྟ་ལྷ་སར་ལོ་མང་པོའི་སྔོན་ནས་གཞིས་སྤོར་བྱས་པའི་ཁམས་ཀྱི་གཏན་སྡོད་ཚོང་པ་རེ་ཟུང་དང་།  དབུས་གཙང་དང་མངའ་རིས་སོཊ་རང་སྐྱོང་ལྗོངས་ཀྱི་ས་ཁུལ་གཞན་ནས་ཡོང་བའི་གཏན་སྡོད་ཚོང་པ་ཚོ་མ་གཏོགས་ཕྱིས་སུ་འབྱོར་བ་རྣམས་ལ་དཀའ་ངལ་ཆེན་པོ་འཕྲད་ཀྱི་ཡོད་འདུག  ༢༠༡༡ལོའི་ཕྱི་ཟླ་༥ཙམ་ནས་རྒྱ་གཞུང་གིས་ལྷ་སའི་གཙུག་ལག་ཁང་གཡས་གཡོན་གྱི་བོད་རིགས་མགྲོན་ཁང་ཁག་ཏུ། བོད་རིགས་གནས་མཇལ་བ་གཙོས་པའི་བོད་རིགས་ཡིན་པ་ཚོར་ཞིབ་གཤེར་ནན་མོ་བྱེད་པ་དང་། ལག་འཀྱེར་མེད་ན་སྡོད་མི་ཆོག་པ་བཟོས་བ། རྒྱ་ནག་ནས་ཡོང་བའི་ཡུལ་སྐོར་སྤྲོ་འཆམ་པ་ཚོ་བོད་རིགས་མགྲོན་ཁང་ཁག་ཏུ་མ་བསྡད་པ་སོགས་ལ་བརྟེན་ནས་ད་ལྟ་བོད་རིཊ་མགྲོན་ཁང་ཁག་གི་ཡོང་འབབ་ཉིན་རེ་ནས་ཉིན་རེར་ཇེ་སྡུག་ཏུ་སོང་ཡོད་འདུག། དེར་བརྟེན་དེང་སྐབས་བོད་རིགས་མགྲོན་ཁང་རྣམས་ལ་ཚོང་གཉེར་བའི་ཁེ་ཕན་ཡོང་རྒྱུ་ཕར་ཞོག ཐ་ན་མགྲོན་ཁང་གི་ཁང་གླ་དང་། ཉིན་རེའི་ཟས་སོང་གི་ཡོང་འབབ་ཙམ་ཡང་ཐོན་རྒྱུ་དཀའ་བའི་གནས་སྟངས་ཆགས་ཡོད་འདུག བོད་ཀྱི་དུས་བབ་དྲ་རྒྱའི་ཐོག་ལྷ་སར་གནས་སྡོད་ཨ་མདོའི་ཚོང་པ་བ་ཞིག་གིས་བརྗོད་པའི་གནས་ཚུལ་འདྲེན་བྱས་པར་ལྟར་ན་། ཚོང་པ་དེས་མ་རྩ་རྒྱ་སྒོར་ས་ཡ་གཅིག་གི་མགྲོན་ཁང་ཞིག་གཉེར་བཞིན་ཡོད་ཀྱང་། མགྲོན་པོ་ཡོང་མཁན་མངོན་གསལ་དོད་པོས་ཇེ་ཉུང་དུ་ཕྱིན་སྟབས་མགྲོན་ཁང་སྒོ་རྒྱག་དགོས་པའི་གནས་སུ་ལྷུང་ཡོད་པ་མ་ཟད་། བར་ལམ་ནས་རྒྱལ་ས་ལྷ་ས་ཁོ་ནར་བུན་གཏོང་བདག་གཉེར་བྱས་པའི་ཨ་མདོའི་མགྲོན་ཁང་༣༠ལྷག་ཡོད་ནའང་། ད་ཆར་སྔོན་མ་དང་མི་འདྲ་བར་མགྲོན་ཁང་ནང་མགྲོན་པོ་ཡོང་མཁན་མ་བྱུང་སྟབས། མགྲོན་ཁང་བདག་གཉེར་བ་ཚོས་ཁང་བདག་ལ་ཁང་གླ་སྤྲོད་མི་ཐུབ་པ་དང་། བུ་ཕྲུག་ཚོར་སློབ་ཡོན་སྤྲོད་མ་ཐུབ་པར་བུ་ལོན་ནང་ལྷག་ཡོད་པས་གནས་སྟངས་མུ་མཐུད་ཇེ་སྡུག་ཏུ་འགྲོ་བཞིན་པ་མདོར་ན་མགྲོན་ཁང་མང་ཆེ་བ་སྒོ་རྒྱག་དགོས་པའི་ཉེན་ཁར་ཐུག་གི་ཡོད་འདུག