ཧོང་ཀོང་ཉེན་རྟོག་པས་ངོ་རྒོལ་བའི་ཐོག་འགྱིག་གི་མེ་མདའ་རྒྱབ་འདུག

ཧོང་ཀོང་གི་ཉེན་རྟོག་པས་ངོ་རྒོལ་རྔམ་སྟོན་བྱེད་མཁན་ཚོའི་ཐོག་དུག་རླངས་བཏང་སྐབས། ༢༠༡༩།༦།༡༢

ཧོང་ཀོང་གི་ཉེན་རྟོག་པས་ངོ་རྒོལ་རྔམ་སྟོན་བྱེད་མཁན་ཚོའི་ཐོག་དུག་རླངས་བཏང་བ་དང་འགྱིག་གི་མེ་མདའ་རྒྱབ་ནས་འགོག་ཐབས་བྱས་འདུག
ཧོང་ཀོང་དམིགས་བསལ་སྲིད་འཛིན་ས་གནས་སྲིད་གཞུང་གིས་ཉེས་ཅན་པ་དང་དོགས་གཞི་ཅན་རྩིས་སྤྲོད་ཀྱི་ཁྲིམས་ལུགས་གཏན་འབེབས་བྱ་རྒྱུར། ཉེ་བའི་ནང་ཧོང་ཀོང་མི་དམངས་ས་ཡ་བརྒལ་བས་ངོ་རྒོལ་ཤུགས་ཆེན་བྱས་ཡོད་པ་དང་། ཕྱི་ཚེས་༩ཉིན་ཧོང་ཀོང་མི་མང་ས་ཡ་གཅིག་ལྷག་ཙམ་ཁྲོམ་གཞུང་དུ་ཐོན་ནས་ཉེས་ཅན་པ་རྩིས་སྤྲོད་ཁྲིམས་ལུགས་གཏན་འབེབས་བྱ་རྒྱུར་ངོ་རྒོལ་རྔམ་སྟོན་ཁྲོམ་སྐཽར་བྱས་ནས། ཧོང་ཀོང་གཞུང་གིས་ཁྲིམས་འཆར་དེ་ཕྱིར་འཐེན་དགོས་པའི་དགོས་འདུན་བཏོན་ཡོད་པ་དང་། དེ་ནི་ཧོང་ཀོང་གི་ལོ་རྒྱུས་ཐོག་གཞི་རྒྱ་ཆེ་ཤོས་དང་མི་མང་ཤོས་ཀྱི་ངོ་རྒོལ་རྔམ་སྟོན་ཞིག་ཡིན། ཡིན་ནའི་ཧོང་ཀོང་གཞུང་གིས་ཁྲིམས་ལུགས་གཏན་འབེབས་ཕྱིར་འཐེན་བྱ་རྒྱུ་མིན་པ་ནན་བརྗོད་བྱས་པའི་རྗེས། ཕྱི་ཚེས་༡༢ཉིན་ཧོང་ཀོང་གྲོས་ཚོགས་ནས་ཉེས་ཅན་པ་དང་། དོགས་གཞི་ཅན་རྩིས་སྤྲོད་ཀྱི་ཁྲིམས་ལུགས་གཏན་འབེབས་ཀྱི་གྲོས་གཞི་དེར་བགྲོ་གླེང་ཐེངས་གཉིས་པ་བྱེད་བཞིན་པའི་སྐབས་ཧོང་ཀོང་གི་མི་མང་སྟོང་ཕྲག་མང་པོས་གྲོས་ཚོགས་ཀྱི་མདུན་དུ། སླར་ཡང་ངོ་རྒོལ་རྔམ་སྟོན་བྱེད་པའི་སྐབས་ཧོང་ཀོང་ཉེན་རྟོག་པས་ངོ་རྒོལ་རྔམ་སྟོན་པ་ཚོའི་ཐོག་མཆི་ཤོར་དུག་རླངས་དང་། དུག་རྫས་གཏོར་བ་མ་ཟད། འགྱིག་གི་མེ་མདའ་རྒྱབ་ནས་ངོ་རྒོལ་བ་མི་ཉུང་བ་ཞིག་ལ་རྨས་སྐྱོན་ཕོག་ཡོད་པ་རེད།
ངོ་རྒོལ་བ་ཚོའི་ནང་གྱོན་ཆས་ནག་པོ་གྱོན་པའི་གཞོན་སྐྱེས་ཁག་ཅིག་གིས་ཉེན་རྟོག་པས་བཀག་སྡོམ་བྱས་པའི་ཅིང་ཀྲུང་ཁུལ་གྱི་ས་ཆ་བཟུང་ནས་སྡོད་རྩིས་བྱེད་པའི་སྐབས། ཉེན་རྟོག་པ་བརྒྱ་གྲངས་ཡོང་ནས་གཞོན་སྐྱེས་དེ་ཚོར་ས་གནས་དེ་བཀག་སྡོམ་བྱེད་སྐབས་ཕན་ཚུན་ཕྲན་བུའི་གཞུ་རེས་ཀྱི་གནས་ཚུལ་བྱུང་བ་དང་། ཉེན་རྟོག་པས་ངོ་རྒོལ་རྔམ་སྟོན་པ་ཚོའི་ཐོག་མཆི་ཤོར་དུག་རླངས་དང་། འགྱིག་གི་མེ་མདའ་སོགས་རྒྱབ་ནས་ངོ་རྒོལ་རྔམ་སྟོན་པ་ཁ་ཐོར་བཏང་ཡོད་པ་རེད།  
དེ་དང་ཆབས་ཅིག་རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པས། ཧོང་ཀོང་གཞུང་གིས་ཁྲིམས་ལུགས་ལ་བསྒྱུར་བཅོས་བྱ་རྒྱུར་རྒྱ་ནག་གཞུང་གིས་མཐའ་གཅིག་ཏུ་རྒྱབ་སྐྱོར་བྱ་རྒྱུ་ཡིན་ལུགས་བཤད་ཡོད་འདུག