ཧོང་ཀོང་གི་ལས་འགུལ་ནས་སློབ་ཕྲུག་ཕྱིར་འཐེན་བྱེད་མིན།

ཧོང་ཀོང་གི་ལས་འགུལ་ནས་སློབ་ཕྲུག་ཕྱིར་འཐེན་བྱེད་དང་མི་བྱེད་ཕལ་ཆེར་གཟའ་འཁོར་གཅིག་ནང་ཚུད་ཐག་གཅོད་བྱེད་རྒྱུ་ཡིན་འདུག
དེ་རིང་གནས་ཚུལ་ཐོན་པ་ལྟར་ན། ཉེ་དུས་ཧོང་ཀོང་ལྟེ་གནས་ཁུལ་བཙན་བཟུང་བྱ་རྒྱུར་འབོད་སྐུལ་བྱེད་མཁན་གྲས་གསུམ་གྱིས་ཁྲིམས་འགལ་གྱི་འདུ་འཛོམས་ཟེར་བར་ཞུགས་པ་ནས་གཞུང་ལ་མགོ་བཏགས་པ་ཡིན་ནའང་ཁོང་ཚོས་སློབ་ཕྲུག་ཚོ་བཙན་བཟུང་བྱེད་ས་ནས་ཕྱིར་འཐེན་བྱེད་དགོས་པའི་འབོད་སྐུལ་བྱས་མེད་པ་རེད། དེའི་གོང་ཙམ་དུ་ཟས་བཅད་ངོ་རྒོལ་དུ་ཞུགས་མཁན་སློབ་ཕྲུག་གསུམ་ཡོད་པའི་གཟུགས་པོའི་གནས་སྟངས་སྡུག་ཏུ་འགྲོ་བཞིན་པར་ད་དུང་དུས་ཚོད་ཇི་ཙམ་འཁྱོལ་ཐུབ་མིན་མི་ཤེས་ནའང་གཞུང་དང་གྲོས་མོལ་བསྐྱར་དུ་ཡོང་རྒྱུར་མུ་མཐུད་འབད་འཐབ་བྱེད་རྒྱུ་ཡིན་པ་ཟས་བཅད་མཁན་སློབ་ཕྲུག་ཧོང་ཀྲེ་ཕུང་གིས་དེ་རིང་བཤད་འདུག ཕྱོགས་མཚུངས་དེ་རིང་སློབ་ཕྲུག་གཉིས་ཡང་ཟས་བཅད་ངོ་རྒོལ་གྱི་ལས་འགུལ་ནང་བཞུགས་བྱས་ཡོད་པ་རེད། དེར་བརྟེན་ཧོང་ཀོང་གི་ཉི་གདུགས་ལས་འགུལ་ཞེས་པ་དེ་མིག་སྔར་གནས་སྟངས་ཇི་ཆགས་མ་ངེས་པ་དང་། སློབ་ཕྲུག་གིས་རང་འགུལ་ཐོག་ནས་ཕྱིར་འཐེན་བྱེད་རྒྱུར་ཧོང་ཀོང་དམིགས་བསལ་གཞུང་གིས་རེ་བ་བྱེད་ཀྱི་མེད་པར་བརྟེན་སྔ་སྣུར་ཐོག་ལྟེ་གནས་ཁུལ་གཙང་སེལ་བྱ་རྒྱུར་གྲ་སྒྲིག་བྱེད་བཞིན་ཡོད་པ་རེད། ཡིན་ནའང་སློབ་ཕྲུག་མཉམ་འབྲེལ་གྱི་རྒྱུན་ལས་ལི་རླི་གོའོ་ཡིས་ཚེས་༤་ཉིན་ཧོང་ཀོང་གི་བརྙན་འཕྲིན་ཁང་ཞིག་གི་བཅའ་འདྲིའི་སྐབས་སུ། བཙན་བཟུང་བྱེད་ས་ནས་ཕྱིར་འཐེན་བྱེད་མིན་དེ་གཟའ་འཁོར་གཅིག་ནང་ཚུད་དུ་ཐག་གཅོད་བྱེད་རྒྱུ་དང་ཡིན་ནའི་ཕྱོགས་མང་པོའི་རྒྱུ་རྐྱེན་ལ་བསམ་ཞིབ་བྱེད་དགོས་པ་ཡིན། བཙན་བཟུང་བྱེད་སའི་ཁུལ་དུ་ཡོད་པའི་མི་སྣ་ཁག་ཅིག་ནས་མཐའ་མཇུག་བར་བསྡད་ནས་མི་མང་འཐུས་ཚོགས་ཀྱི་བརྒྱད་པའི་སོ་གཅིག་གི་ཐག་གཅོད་ཕྱིར་འཐེན་ཡོང་རྒྱུར་མུ་མཐུད་རྩོད་གླེང་གིས་ཆབ་སྲིད་བསྒྱུར་བཅོས་ཡོང་རེའི་བསྐྱར་དུ་གསལ་ཁ་གཏོད་ཡོད་འདུག

གསར་འགོད་པ་འཇམ་དཔལ་ཕུན་ཚོགས།