ཧོང་ཀོང་དུ་བརྙན་འཕྲིན་ཐོག་ཡོངས་ཁྱབ་རྩོད་གླེང༌།

༄༅༎ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་འགན་འཛིན་ཙང་དབྱིང་ཇོན་དང་ཧོང་ཀོང་དམངས་གཙོ་ཚོགས་པའི་དབུ་ཁྲིད་ཡུའུ་རོག་དབུད་རྣམ་གཉིས་དབར་ཧོང་ཀོང་ནང་ཁྱོན་ཡོངས་ནས་དམངས་གཙོའི་ལམ་ལུགས་ལག་བསྟར་བྱེད་མིན་སྐོར་སོགས་ཀྱི་ཐད་ཕྱི་ཚེས་༡༧དགོང་མོ་བརྙན་འཕྲིན་ཐོག་ཡོངས་ཁྱབ་རྩོད་གླེང་གནང་ཡོད་པ་དང་རྩོད་གླེང་སྒྲུབ་པའི་རྗེས་ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་འགན་འཛིན་ཙང་དབྱིང་ཇོན་གྱིས་ད་རེས་ཕྱོགས་གཉིས་དབར་རྩོད་གླེང་གནང་ཡས་དེ་མི་སྒེར་གྱི་རྣམ་པའི་ཐོག་ནས་ཕན་ཚུན་དྲན་བསྡུར་བྱས་པ་ཞིག་མིན་ལུགས་དང་དེར་བརྟེན་ཁོང་གིས་ད་རེས་སུ་ལ་རྒྱལ་ཁ་ཐོབ་མིན་སོགས་ཀྱི་གནད་དོན་ཐོག་བསམ་ཞིབ་བྱེད་ཀྱི་མེད་ཅིང་ ཁོང་རང་ཉིད་ཀྱིས་ད་རེས་ཀྱི་རྩོད་གླེང་དེར་རང་ནུས་གང་ཡོད་བཏོན་ཡོད་པས་ གཙོ་བོ་རྩོད་གླེང་དེའི་མཇུག་འབྲས་ཀྱིས་ཧོང་ཀོང་མི་མང་ལ་ཕན་ཐོགས་ཆེན་པོ་བྱུང་ཡོད་ལུགས་གསུང་ཡོད་པ་རེད་ ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་འགན་འཛིན་ཙང་དབྱིང་ཇོན་དང་ཧོང་ཀོང་དམངས་གཙོ་ཚོགས་པའི་དབུ་ཁྲིད་ཡུའུ་རོག་དབྱིའི་ཡིས་བརྙན་འཕྲིན་ཐོག་ནས་རྩོད་གླེང་དེའི་མཇུག་འབྲས་ཐོག་དམངས་གཙོ་ཚོགས་པའི་དབུ་ཁྲིད་ལ་རྒྱལ་ཁ་ཐོབ་པའི་རྣམ་པ་ཤུགས་ཆེ་ཐོན་ཡོད་པ་གནད་དོན་དབྱེ་ཞིབ་པ་ཚོས་དབྱེ་ཞིབ་གནང་གི་ཡོད་པ་རེད་ལ་ དེའི་རྗེས་དམངས་ཁྲོད་དུ་བསམ་ཚུལ་བསྡུ་ལེན་བྱས་པ་ཞིག་ཕྱིར་བསྒྲགས་བྱས་ཡོད་པའི་ནང་ཧོང་ཀོང་མི་མང་ཁྲོད་ཧོང་ཀོང་དམིགས་བསལ་སྲིད་འཛིན་ས་གནས་གཞུང་གིས་བཏོན་པའི་ཧོང་ཀོང་གི་ཆབ་སྲིད་ལམ་ལུགས་ལ་བསྒྱུར་བཅོས་བྱ་རྒྱུའི་གྲོས་གཞིར་ངོ་རྒོལ་བྱེད་མཁན་མང་དུ་ཕྱིན་ནས་མི་འབོར་གྱི་བརྒྱ་ཆ་བཞི་བཅུ་ཙམ་ལྷག་ཟིན་ཡོད་པ་རེད་