ཧོང་ཀོང་གི་དམངས་གཙོ་ལས་འགུལ་བས་ངོ་རྒོལ་སྤེལ་འཆར།

༄༅༎ཧོང་ཀོང་ནང་གི་མང་གཙོའི་ལས་འགུལ་བ་སྟོང་ཚོ་མང་པོས་གཟའ་ལྷག་པ་སྟེ་ཕྱི་ཟླ་བདུན་པའི་ཚེས་གཅིག་ཧོང་ཀོང་རྒྱ་ནག་ལ་རྩིས་སྤྲད་སྟེ་ལོ་ངོ་བཅུ་གཉིས་འཁོར་བའི་དུས་དྲན་གྱི་ཉིན་རྒྱ་ནག་གཞུང་ལ་དམིགས་པའི་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་ཞིག་སྤེལ་འཆར་ཡོད་འདུག

དབྱིན་ཇིའི་གཞུང་གིས་ཧོང་ཀོང་རྒྱ་ནག་ལ་རྩིས་སྤྲད་པའི་དུས་དྲན་གྱི་ཉིན་མོ་འདི་ནི་ཧོང་ཀོང་ནང་གཏན་སྡོད་མང་གཙོ་དོན་གཉེར་བ་གཙོ་བོར་གྱུར་བའི་ཚོགས་སྡེ་མང་པོ་ཞིག་ལ་རྒྱ་ནག་གཞུང་དང་ས་གནས་ཀྱི་འགོ་འཁྲིད་ཚོར་ཁ་གཏད་ཀྱི་ནུས་ཤུགས་བཏོན་རྒྱུའི་གོ་སྐབས་གལ་ཆེ་ཞིག་ཏུ་ངོས་འཛིན་བྱེད་བཞིན་ཡོད་པ་རེད།

འདི་ལོ་ཕྱི་ཟླ་དྲུག་པའི་ཚེས་བཞི་སྟེ་པེ་ཅིང་གནམ་བདེ་སྒོ་མོ་ཆེའི་སློབ་ཕྲུག་གིས་འགོ་འཁྲིད་པའི་མང་གཙོའི་ལས་འགུལ་ཐོག་རྒྱ་ནག་གཞུང་གིས་དྲག་གནོན་བྱས་ཏེ་ལོ་ངོ་ཉི་ཤུ་འཁོར་བའི་དྲན་གསོའི་ཉིན་མོ་དེ་ཧོང་ཀོང་ནང་སྲུང་བརྩི་བྱེད་སྐབས་མི་གྲངས་ཆིག་འབུམ་ལྔ་ཁྲི་ཙམ་འདུ་འཛོམས་བྱུང་ཡོད་འདུག

གཟའ་ལྷག་པའི་ཉིན་གྱི་ངོ་རྒོལ་གྱི་ལས་འགུལ་སྐབས་ངོ་རྒོལ་བ་ཁྱོན་ཆེ་ཞིག་འདུ་འཛོམས་ཡོང་རྒྱུར་རེ་བ་བྱེད་བཞིན་ཡོད་ན་ཡང་གོ་སྒྲིག་བྱེད་མཁན་སོ་སོར་ངོ་རྒོལ་བྱེད་པའི་དམིགས་ཡུལ་མི་འདྲ་བ་མང་པོ་ཞིག་ཡོད་སྟབས་འདས་པའི་ཉིན་གྲངས་འགའ་ཤས་རིང་མང་གཙོ་དོན་གཉེར་བ་ཚོས་རྒྱ་ནག་གཞུང་ཕྱོགས་ནས་ཧོང་ཀོང་གི་བཅའ་ཁྲིམས་ལ་འགྱུར་བ་གཏོང་ཐབས་ཀྱི་ལས་དོན་ནར་འགྱང་བྱེད་བཞིན་པ་དང་ས་གནས་གཞུང་གིས་ལས་བྱེད་པའི་གླ་ཕོགས་མཐོ་རུ་མ་བཏང་པ་ལ་ངོ་རྒོལ་ཡོད་པའི་ཐོུང་གི་དམིགས་ཡུལ་མཚོན་ཐབས་ཀྱི་ལས་འགུལ་ཞིག་ཏུ་འགྱུར་རྒྱུར་འབད་བརྩོན་བྱེད་བཞིན་ཡོད་འདུག

ཕྱི་ལོ་ཉིས་སྟོང་གསུམ་ལོའི་ཕྱི་ཟླ་བདུན་པའི་ཚེས་གཅིག་ཉིན་ཁྲོམས་གཞུང་ཐོག་མི་འབུམ་ལྔ་ཙམ་གྱིས་ངོ་རྒོལ་བྱས་ཡོད་ཅིང་སྐབས་དེ་དུས་ནི་ཧོང་ཀོང་གི་དཔལ་འབྱོར་ཉམ་རྒུད་ཕྱིན་པའི་དུས་ཚོད་ཅིག་ཡིན་ལ་ཧོང་ཀོང་དམིགས་བསལ་ས་ཁུལ་གྱི་སྤྱི་ཁྱབ་ཏུ་རྒྱ་ནག་གཞུང་གིས་ཐད་བསྐོས་བྱས་པ་ཏུང་ཆི་ཧུལྦ་ལ་ཧོང་ཀོང་མི་དམངས་ཀྱི་མི་དགའ་བ་ཆེན་པོ་བྱས་པའི་དུས་ཚོད་ཅིག་ཀྱང་ཡིན་པ་རེད། གནད་དོན་དབྱེ་ཞིབ་པ་ཚོས་ད་ལྟའི་ཧོང་ཀོང་གི་གནས་སྟངས་ནི་སྐབས་དེ་དུས་ཀྱི་གནས་སྟངས་ལས་བཟང་བ་ཡོད་པ་དང་ཧོང་ཀོང་གི་སྤྱི་ཁྱབ་འགན་འཛིན་ཌོ་ནལཌ་ཙང་ལ་མི་དམངས་ཀྱིས་མི་དགའ་བ་དེ་ཙམ་བྱེད་ཀྱི་མེད་པར་བརྟེན་གཟའ་ལྷག་པའི་ཉིན་ངོ་རྒོལ་དུ་ཡོང་མཁན་གྱི་གྲངས་འབོར་ཡར་ཉིས་སྟོང་གསུམ་ལྟ་བུ་ཡོང་རྒྱུ་མིན་པ་བརྗོད་བཞིན་ཡོད་པ་རེད།