༧གོང་ས་མཆོག་ཨར་ཅིན་ཀྲི་ནའི་རྒྱལ་སར་ཞབས་སོར་འཁོད།

༄༅༎༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་མེཀ་སི་ཀོ་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་ཚེས་༡༣ཉིན་ཨར་ཇེན་ཀྲི་ནའི་རྒྱལ་ས་སྦུའེ་ནོ་སི་ཨེ་རེསི་རུ་ཞབས་སོར་བདེ་བར་འཁོད་ཡོད་པ་རེད་༎

དེ་ཡང་བཙན་བྱོལ་བོད་གཞུང་དྲ་གནས་ཀྱི་གནས་ཚུལ་བཀོད་དོན་གཞིགས་ན༧་གོང་ས་མཆོག་ཨར་ཇེན་ཀྲི་ནའི་རྒྱལ་སའི་གནམ་ཐང་དུ་ཞབས་གསོར་འཁོད་སྐབས་ ཡུལ་དེའི་ཕྱི་འབྲེལ་ལས་ཁུངས་ཀྱི་སྣེ་ཤན་པས་ཕེབས་བསུ་གཟབ་རྒྱས་ཞུས་ཡོད་པ་མ་ཟད་ ༧གོང་ས་མཆོག་མགྲོན་ཁང་དུ་ཞབས་སོར་འཁོད་མཚམས་གདན་ཞུའི་གོ་སྒྲིག་ཚོགས་ཆུང་ དོན་བརྒྱུད་གླིང་འབྲུག་པ་བཀའ་བརྒྱུད་ཆོས་ཚོགས་ཀྱི་ཚོགས་མི་རྣམས་ཀྱིས་གཙོས་ དད་ལྡན་མང་ཚོགས་རྣམས་ཀྱིས་ལག་ཏུ་མཇལ་དར་དང་སྤོས་སྣེ་ཐོགས་ཏེ་ཕེབས་བསུ་གཟབ་རྒྱས་ཞུས་གནང་འདུག་

༧གོང་ས་མཆོག་གིས་ཨར་ཇེན་ཀྲི་ན་མཛད་འཆར་ཁོངས་སུ་ ཕྱི་ཚེས་ ༡༤ ཉིན་གྱི་སྔ་དྲོ་༧་ གསར་འགོད་པ་ ༢༥ ཙམ་ལ་མཇལ་ཁ་དང་ གསར་འགོད་པའི་དྲི་བར་བཀའ་ལན་མཛད་ཡོད་པ་རེད་ སྐབས་དེར་མགོན་པོ་གང་ཉིད་ ཁུལ་དེར་ཆིབས་སྒྱུར་བསྐྱངས་དོན་གཙོ་བོ་ནི་ གྲོགས་པོ་རྙིང་པ་མང་པོ་ཞིག་གིས་མགྲོན་འབོད་ཞུས་པ་དང་ཆབས་ཅིག ༧གོང་ས་མཆོག་གི་མཛད་འགན་གཙོ་བོ་ འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་གཏོང་ཆེད་ཡིན་སྐོར་བཀའ་སྩལ་གནང་བ་མ་ཟད་ གསར་འགོད་པ་ཚོ་ལའང་སྤྱི་ཚོགས་ཀྱི་བདེ་དོན་གོང་འཕེལ་གཏོང་ཐབས་སུ་ ཕྱོགས་ལྷུང་མེད་པ་དྲང་བདེན་གྱི་ལམ་ནས་བཟང་སྤྱོད་དེ་དག་གོང་མཐོར་གཏོང་རྒྱུའི་འགན་ཞིག་ཡོད་པ་དྲན་སྐུལ་ཡང་མཛད་འདུག་ལ་ དེ་བཞིན་གསར་འགོད་པ་ཚོས་སྤྱི་ཚོགས་ནང་ ལྐོག་ཟས་ཀྱི་ལམ་ལུགས་ཐེར་འདོན་བྱས་ཏེ་ སྤྱི་ཚོགས་ཀྱི་བདེ་དོན་སྒྲུབ་དགོས་སྐོར་བཀའ་སྩལ་གནང་བཞག་ གསར་འགོད་ལྷན་ཚོགས་གྲོལ་མཚམས་ ཨར་ཇེན་ཊི་ནའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་པེ་རེཛ་ཨེསི་ཁི་ལྦལ་མཆོག་དང་མཇལ་འཕྲད་མཛད་པ་དང་ ཕྱོགས་མཚུངས་༧གོང་ས་མཆོག་གིས་ ཨར་ཇེན་ཊི་ནའི་གྲོས་ཚོགས་ཀྱི་འཐུས་མི་ལྕམ་སྐུ་མ་རི་ཡ་ལོའོ་ར་ལྷན་དང་མཇལ་འཕྲད་གནང་བཞག་ ཉིན་རྒྱབ་༧གོང་ས་མཆོག་གིས་ གཞོན་སྐྱེས་ཚོར་སློབ་གསོའི་ལམ་ནས་འཛམ་གླིང་བཟང་དུ་གཏོང་ཐབས་ཞེས་པའི་བརྗོད་གཞིའི་ཐོག་མང་ཚོགས་གྲངས་ ༢༠༠༠ བརྒལ་བར་བཀའ་སློབ་སྩལ་ཞིང་ དེའི་ནང་གོང་ས་མཆོག་གིས་ དུས་རབས་ ༢༡ དེ་གཞོན་སྐྱེས་ཁྱེད་ཚོའི་དུས་རབས་ཤིག་ཡིན་པ་དང་  ལྷག་པར་ལོ་ན་༣༠ སོན་པ་དང་དེ་ལས་ཆུང་བའི་ན་གཞོན་ཚོས་ དུས་རབས་ ༢༡ དེ་  ཞི་བདེ་དང་ཡར་རྒྱས་ འཆམ་མཐུན་ བརྟན་ལྷིང་བཅས་ཀྱི་སྤྱི་ཚོགས་ཤིག་བསྐྲུན་རྒྱུ་དེ་ གཞོན་སྐྱེས་ཚོར་རག་ལུས་ཡོད་པ་དང་ ཤེས་ཡོན་ཁོ་ནས་ ནང་གི་ཞི་བདེ་བསྐྲུན་རྒྱུ་ཧ་ཅང་ཁག་པོ་ཆགས་ཡོད་ལ་ ནང་སེམས་ཀྱི་ཞི་བདེ་དང་བདེ་སྐྱིད་བསྐྲུན་པར་ གཙོ་བོ་བྱམས་བརྩེ་དང་སེམས་བཟང་བྱེད་རྒྱུ་ ཧ་ཅང་གལ་ཆེན་པོ་ཡིན་ཞེས་སོགས་ཀྱི་བཀའ་སྩལ་གནང་ཡོད་པའི་གནས་ཚུལ་ཐོན་བཞག་།།