༧གོང་ས་མཆོག་ཅེཀ་སྤྱི་མཐུན་རྒྱལ་ཁབ་ཏུ་ཆིབས་བསྒྱུར།

༄༅༎་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སང་ཉིན་ཚེས་བཅུ་ཉིན་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ལྦཀ་ལལྦ་ཧ་ལྦེལ་མཆོག་གིས་ཆེད་བཙུགས་གནང་བའི་ཕོ་རམ་༢༠༠༠ཞེས་པའི་ཚོགས་པ་དེས་གོ་སྒྲིག་ཞུས་པའི་ཚོགས་འདུ་ཞིག་ཏུ་གདན་ཞུས་ལྟར་ཁུལ་དེར་ཆིབས་བསྒྱུར་གནང་རྒྱུ་ཡིན་འདུག མཛད་འཆར་གཞིར་བཟུང་ལྟར་ན། གནད་དོན་གླེང་མོལ་གྱི་ལྷན་ཚོགས་དེ་བཞིན་སྔ་ལོ་རྒྱ་རིགས་མང་གཙོ་དོན་གཉེར་བ་ལིའུ་ཤའོ་བའོ་ལ་ནོ་བེལ་ཞི་བདེའི་གཟེངས་རྟགས་ཕུལ་ཡོད་ཀྱང་ཁོང་ངོ་མ་གཟེངས་རྟག་བཞེས་པར་ཕེབས་མ་ཐུབ་པའི་དུས་ཚིགས་དྲན་གསོ་ཞུ་རྒྱུ་དང་ཆབས་ཅིག་ད་ལྟའི་ཨེ་ཤ་ཡའི་ནང་གི་མང་གཙོ་དང་འགྲོ་བ་མིའི་ཐོབ་ཐང་གི་གནས་སྟངས་སྐོར་གྲོས་མོལ་གནང་རྒྱུ་ཡིན་འདུག ལྷན་ཚོགས་འདིའི་ཐོག་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ལྷན་དུ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ཤི་རིན་ ཨི་བ་དི་མཆོག་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲིག་གཞི་ཟིན་བྲིས་བཀོད་གནང་མཁན་གཙོ་གྲས་སྐུ་ཞབས་སི་ཀྲི་ཕེན་ ཧེ་སེལ། དེ་བཞིན་ཨ་རིའི་སྦོ་སི་ཀྲོན་ནང་རྟེན་གཞི་བྱེད་པའི་རྒྱ་རིགས་མང་གཙོ་དོན་གཉེར་བ་དྲོག་དྲར་ཇེན་ལི་ ཡང་སོགས་གནད་ཡོད་མི་སྣ་ཁག་ཅིག་ཀྱང་མཉམ་ཞུགས་གནང་གི་ཡོད་འདུག རེས་གཟའ་ཉི་མའི་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་མང་ཚོགས་ལ་རྙོག་འཛིང་ཆེ་བའི་འཛམ་གླིང་ནང་བདེ་སྐྱིད་འཚོལ་ཐབས་ཞེས་པའི་བརྗོད་གཞིའི་ཐོག་གསུངས་བཤད་གནང་རྒྱུ་དང་། དེ་བཞིན་གསར་འགོད་ལྷན་ཚོགས་ཤིག་ཀྱང་བསྐོངས་ཚོགས་གནང་གི་ཡོད་འདུག