༧གོང་ས་མཆོག་ཨ་རིའི་མཚོ་གླིང་ཧའ་ལྦེལ་དུ་ཆིབས་བསྒྱུར་སྐོར།

༄༅༎བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རིང་མིན་ཕྱི་ཟླ་༤པའི་ནང་ཨ་རིའི་མཚོ་གླིང་ཧ་ལྦ་ཨི་(Hawaii)ཁུལ་དུ་ཆིབས་བསྒྱུར་གྱི་མཛད་འཕྲིན་སྐྱོངས་གནང་མཛད་རྒྱུ་ཡིན་པའི་གནས་ཚུལ་ཐོན་འདུག་༎
དེ་ཡང་གནས་ཚུལ་ནང་གསལ་ལྟར་ན་ ཧ་ལྦ་ཨི་སྤྱི་ཚོགས་ཐེབས་རྩ་དང་དེའི་འབྲེལ་ཡོད་ཀྱི་གོ་སྒྲིག་པ་གཅིག་ལྕོག་པཱེ་རི་དང་པེ་མེ་ལ་ཨོ་མི་ཏི་ཡར་བཅས་ནས་ཇི་ལྟར་གསོལ་འདེབས་ཞུས་པ་བཞིན་ ༧གོང་ས་༧སྐྱབས་མགོན་ཆེན་པོ་མཆོག་ནས་ཕྱི་ཟླ་༤པའི་ཚེས་༡༤དང་༡༥བཅས་ཉིན་གཉིས་ཀྱི་རིང་ ཨ་རིའི་ཧ་ལྦ་ཨི་མཚོ་གླིང་གི་ཨོ་ཨ་ཧུ་ས་གནས་སུ་ཆིབས་བསྒྱུར་གནང་གཏན་འཁེལ་འདུག དེ་ཁུལ་གོང་ས་མཆོག་གིས་མཛད་འཆར་ནང་ཚེས་༡༤ཉིན་ཧ་ལྦ་ཨི་གཙུག་ལག་སློབ་གྲྭ་ཆེན་མོའི་སི་ཀྲེན་ཤེ་རིཕ་ཚོགས་ཁང་དུ་ཁུལ་དེའི་སློབ་གྲྭ་དང་ མཐོ་སློབ་  གཙུག་ལག་སློབ་གྲྭ་ཆེན་མོ་བཅས་ཀྱི་དགེ་ལས་སློབ་ཕྲུག་ཚོར་ནང་སེམས་ཀྱི་ཤེས་ཡོན་ཐོག་བཀའ་སློབ་སྩལ་གནང་མཛད་རྒྱུ་དང་ དེ་ནས་ཚེས་༡༥ཉིན་ གོང་གསལ་ཧ་ལྦ་ཨི་གཙུག་ལག་སློབ་གྲྭ་ཆེན་མོའི་སི་ཀྲེན་ཤེ་རིཕ་ཚོགས་ཁང་ནང་ ཁུལ་དེའི་མང་ཚོགས་ལ་ Advancing Peace Through the Power of Aloha ཅེས་ཧ་ལྦ་ཨི་ཡུལ་གྱི་མཛའ་བརྩེའི་ནུས་སྟོབས་ཀྱིས་ཞི་བདེ་གོང་འཕེལ་གཏོང་ཐབས་ཞེས་པའི་སྐོར་བཀའ་སློབ་སྩལ་གནང་མཛད་རྒྱུ་ཡིན་འདུག་༎