“བོད་ཀྱི་དཀའ་ངལ་རིམ་པས་ཕལ་ཆེར་སེལ་ཐུབ་ཀྱི་ཡོད་པ་དང་། བོད་ལ་ཡོད་པ་ལས་ལྷག་རྒྱ་གར་ནང་བསྡད་ནས་འགྲོ་དོན་རྒྱ་ཆེ་བྱ་ཐུབ་ཀྱི་འདུག་”ཅེས་བཀའ་སྩལ་བ།

བོད་མིའི་དབུ་ཁྲིད་༧གོང་ས་མཆོག་གིས་བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་ཉིན་གཉིས་པ་སྟེ། ཕྱི་ཟླ་ ༦ པའི་ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། འཕགས་པ་སྤྱན་རས་གཟིགས་ཀྱི་བཀའ་དབང་སྩལ་པ་དང་འབྲེལ། བོད་མི་ཚོ་བློ་སེམས་བདེ་བོའི་ངང་ནས་བཞུགས་ཆོག་པ་དང་། བོད་ཀྱི་དཀའ་ངལ་རིམ་པས་ཕལ་ཆེར་སེལ་ཐུབ་ཀྱི་ཡོད་པ། བོད་ཀྱི་དཀའ་ངལ་སེལ་བར་བསོད་ནམས་དང་ཡེ་ཤེས་ཀྱི་ཚོགས་བསགས་པས་ཕན་ཐོགས་འབྱུང་རྒྱུ་ཡིན་པ་བཅས་བཀའ་གནང་གི་འདུག
གཞན་ཡང་༧གོང་ས་སྐྱབས་མགོན་ཆེན་པོ་མཆོག་གིས་ཁོང་རྒྱ་གར་དུ་བཞུགས་ཏེ་བོད་ན་ཡོད་པ་ལས་ལྷག་པའི་འགྲོ་དོན་རྒྱ་ཆེན་པོ་བྱེད་ཐུབ་ཀྱི་འདུག་པ་དང་། བོད་ནང་ཡོད་ན་གཅིག་སྡུད་རིང་ལུགས་འོག་བསྡད་ཡོད་པས་དེ་འདྲ་བྱེད་མི་ཐུབ་པ་རེད་ཅེས་བཀའ་གནང་གི་འདུག
༧གོང་ས་མཆོག་གིས་སྤྱན་རས་གཟིགས་ཕྱག་སྟོང་སྤྱན་སྟོང་གི་དབང་གྲུབ་པ་དང་བསྟུན། ཁོང་གི་དམིགས་འོག་ཏུ་བོད་ནང་གི་རྒྱ་ཆེའི་མི་མང་༧རྒྱལ་བ་རིན་པོ་ཆེར་ཡིད་ཆེས་རྩེ་གཅིག་ཏུ་བྱེད་མཁན་ཚོར་ངོས་ནས་མོས་པ་བྱས་ཏེ་དབང་ཐོབ་ཡོད་པ་མ་ཟད། རྒྱ་ནག་ནང་རྒྱ་རིགས་མང་པོ་ཞིག་ནས་ཀྱང་ང་ལ་དགའ་བོ་བྱེད་ཀྱི་འདུག་པ། དེ་རིགས་ལའང་འཕགས་པ་སྤྱན་རས་གཟིགས་ཀྱི་བྱིན་རླབས་འཇུག་པར་ཤོག་ཅེས་སྨོན་ལམ་འདེབས་ཀྱི་ཡོད་པ་བཀའ་གནང་གི་འདུག
ཡང་༧གོང་ས་མཆོག་གིས་སྔ་མོ་ངོས་རང་རྒྱ་ནག་ཏུ་སླེབས་པར་ནང་པའི་ལྷ་ཁང་ཧ་ཅང་མང་པོ་འདུག་པ་དང་། འཕགས་པ་སྤྱན་རས་གཟིགས་ཀྱི་ལོ་རྒྱུས་དེ་འདྲའང་བཤད་རྒྱུ་འདུག་པས། རྒྱ་ནག་ནི་འཛམ་གླིང་གི་མི་འབོར་ཆེ་ཤོས་ཀྱི་རྒྱལ་ཁབ་ཆགས་བསྡད་ཡོད་པར་བརྟེན། དེའི་ནང་སངས་རྒྱས་པའི་ཆོས་ཀྱི་བག་ཆགས་ཡར་སད་ནས་བྱུང་ན་མི་མང་པོ་ལ་ཕན་ཐོགས་འབྱུང་རྒྱུ་ཡིན་པ་བཀའ་གནང་གི་འདུག་ཅིང་། ༧གོང་ས་མཆོག་གིས་བོད་རིགས་གཞོན་སྐྱེས་ཚོ་ལ་ནང་ཆོས་ངོ་སྤྲོད་ཀྱི་མཛད་རིམ་འདིར།འཛམ་གླིང་ཤར་ནུབ་ཀྱི་རྒྱལ་ཁབ་འདྲ་མིན་གྱི་མི་གྲངས་སྟོང་ཕྲག་མང་པོ་བཅར་ཡོད་པ་མ་ཟད། དམིགས་བསལ་སྲོལ་རྒྱུན་ཐོག་ནང་པའི་རྒྱལ་ཁབ་ཝི་ཏི་ནམ་དང་ཨུ་རུ་སུའི་སོག་རིགས་རྒྱལ་ཕྲན་ཁག་ཅིག་བཅས་ནས། སེར་སྐྱ་མང་པོ་ཞིག་ཀྱང་ལྷན་ཞུགས་གནང་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། ཡེ་ཤེས་ཟླ་བ།
དྲ་ཐོག་སྤེལ་མཁན། ཡེ་ཤེས་ཟླ་བ།