༸གོང་ས་མཆོག་ནས་བོད་ཀྱི་བདེ་དོན་ཐད་ཐུགས་འགན་མུ་མཐུད།

༄༅༎ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གཞུང་ལ་ཐུགས་ཡིད་ཆེས་བརླག་ཕེབས་ཀྱི་ཡོད་པ་བཀའ་གནང་པ་དེ་ནི་རྒྱ་ནག་གཞུང་གིས་བྱ་སྤྱོད་ལ་དགོངས་སྟེ་གསུངས་པ་ཞིག་ལས་རྒྱ་ནག་མི་དམངས་ལ་དགོངས་པ་ཞིག་མིན་ལ་བོད་ཀྱི་བདེ་དོན་ཐད་ཐུགས་འགན་བཞེས་རྒྱུ་མིན་པ་བཀའ་གནང་པ་ཞིག་ཀྱང་རྩ་བ་ནས་མིན་ལུགས་བཙན་བྱོལ་བོད་གཞུང་གི་དབྱིན་ཡུལ་གྱི་སྐུ་ཚབ་དོན་གཅོད་ཚེ་རིང་བཀྲིས་ལགས་ཀྱིས་ཁ་སང་སྦི་སྦི་སི་བརྙན་འཕྲིན་ལས་རིམ་ཞིག་གི་ཐོག་གསལ་བཤད་གནང་འདུག

ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་ལོ་ངོ་གསུམ་བཅུ་ལྷག་རིང་བོད་རྒྱའི་དཀའ་རྙོག་དེ་བོད་རྒྱ་མི་རིགས་གཉིས་ཀར་ཕན་པའི་དབུ་མའི་ལམ་གྱི་དགོངས་གཞི་དེའི་ཐོག་ནས་སེལ་རྒྱུར་འབད་བརྩོན་ཆེན་པོ་གནང་པར་རྒྱ་ནག་གཞུང་གིས་དྲང་བདེན་གྱི་ཡ་ལན་རྩ་བ་ནས་བྱེད་ཀྱི་མེད་པར་དགོངས་སྟེ་རྒྱ་ནག་གཞུང་ལ་ཐུགས་ཡིད་ཆེས་བརླག་ཕེབས་ཀྱི་ཡོད་པ་བཀའ་གནང་པ་ལས་རྒྱ་ནག་མི་དམངས་ཐོག་དགོངས་པ་ཞིག་མིན་པ་གསུངས་ཡོད་པ་རེད། རྒྱ་ནག་ཕྱི་ནང་དུ་གནས་པའི་མཁས་པ་དང་བསམ་ཡོད་མི་སྣའི་ཁྲོད་ནས་༸གོང་ས་༸སྐྱབས་མགོན་ཆེན་པོ་མཆོག་གི་དབུ་མའི་ལམ་གྱི་དགོངས་བཞེས་དེར་རྒྱབ་སྐྱོར་ཆེན་པོ་ཞུ་བཞིན་ཡོད་པ་འགྲེལ་བརྗོད་གནང་ཡོད་པ་རེད། དེ་བཞིན་ཁོང་གིས་བོད་མིའི་བདེ་དོན་གྱི་ཐུགས་འགན་མུ་མཐུད་བཞེས་རྒྱུ་ནི་༸གོང་ས་༸སྐྱབས་མགོན་ཆེན་པོ་མཆོག་གི་རྩ་བའི་ཐུགས་དགོངས་གསུམ་གྱི་ཁོངས་ནས་གཅིག་ཡིན་སྟབས་བོད་ཀྱི་བདེ་དོན་དེ་ཐུགས་བློས་ནམ་ཡང་གཏོང་གནང་རྒྱུ་མིན་པ་གསལ་བཤད་གནང་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་གསུང་འཕྲིན་དེའི་ཐོག་རྒྱལ་སྤྱིའི་གསར་འགོད་པ་དང་གནད་དོན་དབྱེ་ཞིབ་པ་ཚོས་དོ་སྣང་ཧ་ཅང་ཆེན་པོ་བྱེད་བཞིན་ཡོད་ཅིང་བརྒྱུད་ལམ་ཁག་གི་ནང་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་ནག་དང་འབྲེལ་ལམ་གནང་པའི་ཐོག་ནས་བོད་རྒྱའི་དཀའ་རྙོག་སེལ་རྒྱུར་ཐུགས་རེ་གནང་གི་མེད་ལུགས་དང་ཡང་འགའ་ཞིག་གིས་དབུ་མའི་ལམ་གྱི་སྲིད་བྱུས་ལ་འགྱུར་བ་གཏོང་གནང་གིས་ཕྱི་ཟླ་བཅུ་གཅིག་པའི་ནང་ཚོགས་རྒྱུའི་བོད་མིའི་དམིགས་བསལ་ཚོགས་ཆེན་ཐོག་རང་བཙན་གཙང་མའི་ཐབས་ལམ་དུ་འགྲོ་རྒྱུའི་ཐག་གཅོད་གནང་སྲིད་ལུགས་སོགས་གནས་ཚུལ་དང་བསམ་ཚུལ་སྣ་ཚོགས་ཤིག་བཀོད་སྤེལ་བྱེད་བཞིན་ཡོད་པ་རེད།