༸གོང་ས་མཆོག་བཞུགས་སྒར་དུ་ཞབས་སོར་བདེ་བར་འཁོད་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་འདས་པའི་ཟླ་བ་གཅིག་ལྷག་རིང་འགྲོ་བ་སྤྱིའི་བདེ་རྩར་ཕན་པའི་རླབས་ཆེན་གྱི་མཛད་འཕྲིན་མང་དག་ཅིག་བསྐྱངས་པའི་རྗེས། འདི་ཚེས་ ༢༢ ཉིན་ལྡི་ལི་ནས་མཁའ་ལམ་བརྒྱུད་བཞུགས་སྒར་དུ་ཞབས་སོར་བདེ་བར་འཁོད་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ཐུགས་དགྱེས་ཚོར་ཆེན་པོས་གྷ་གྷལ་གནམ་ཐང་ནས་ཕྱིར་ཕེབས་མ་ཐག་ཏུ་གསར་འགོད་པ་ཚོར་གསུངས་དོན། གནས་མཆོག་རྡོ་རྗེ་གདན་གཙོས་པའི་ས་ཁུལ་འདྲ་མིན་ལ་ཆིབས་བསྒྱུར་གྱིས་མཛད་འཕྲིན་བསྐྱངས་པ་རྣམས་མགོན་པོ་གང་ཉིད་མཆོག་གི་ཐུགས་ཀྱི་དགོངས་པ་ཇི་བཞིན་དུ་གྲུབ་ཡོད་པ་བཀའ་གནང་ཞིང་། དེ་རིང་མགོན་པོ་གང་ཉིད་མཆོག་ཕྱིར་བཞུགས་སྒར་དུ་ཞབས་སོར་འཁོད་པ་དང་ཐུགས་སེམས་ཀྱང་སྤྲོ་པོ་ཡོད་པ་བཀའ་གནང་སོང་།

༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཉེ་འཁྲིས་སུ་ཆགས་པའི་གྷ་གྷལ་གནམ་ཐང་དུ་ཞབས་སོར་འཁོད་པའི་རྗེས། རྒྱལ་ཁབ་ཕྱི་ནང་གི་དད་ལྡན་སེར་སྐྱ་ཕོ་མོ་རྣམས་ཀྱིས། ལག་ཏུ་གདུག་སྤོས་དང་མཇལ་དར། མེ་ཏོག་དང་མཆོད་རྫས་སོགས་བསྣམས་ཏེ་མགོན་པོ་གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་གནང་སོང་།

དེ་ཡང་འདི་གའི་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱིས། ཐེངས་འདིར་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་གཙོ་བོ་གསུམ་གྱི་བཀའ་སློབ་གལ་ཆེ་ཁག་ཅིག་ཟུར་འདོན་བྱས་ཡོད། དེ་ཡང་སྤྱི་ཟླ ༡༢ ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཞབས་སོར་འཁོད་དེ། མཛད་འཕྲིན་བསམ་གྱིས་མི་ཁྱབ་པ་བསྐྱངས་གནང་མཛད་ཡོད་པའི་ཁྲོད། ལོ་རྒྱུས་རང་བཞིན་ལྡན་པའི་རྒྱལ་སྤྱིའི་དགེ་འདུན་པའི་གླེང་སྟེགས་དབུ་འབྱེད་མཛད་དེ་བཀའ་སློབ་ཕེབས་པའི་ནང་། བཅོམ་ལྡན་འདས་ཀྱི་ཆོས་ཀྱི་སྙིང་པོ་ནི་གཞན་ལ་ཕན་བདེ་སྒྲུབ་རྒྱུ་དང་། གནོད་པ་མི་བྱེད་རྒྱུ་དེ་ཡིན་པ་བཀའ་གནང་ཞིང་། ཆོས་ཁས་བླངས་མིན་ལ་མ་བལྟོས་པར། ཚང་མས་གཞན་ལ་གནོད་པ་མ་བྱས་པར་ག་ཚོད་ཐུབ་ཐུབ་ཀྱིས་ཕན་ཐོགས་བྱ་རྒྱུ་བྱུང་བ་ཡིན་ན། སོ་སོའང་སེམས་སྐྱིད་པོ་ཡོད། ཆགས་སྡང་གི་ལས་མ་བསགས་པར་བསྡད་ན་སེམས་ཀྱི་ཞི་བདེ་རང་བཞིན་གྱིས་ཡོང་བ་ཞིག་རེད་ལ། སེམས་ཀྱི་ཞི་བདེ་ཡིས་ལུས་ཀྱི་འཕྲོད་བསྟེན་ལ་ཡང་ཕན་གྱི་ཡོད་པ་སོགས་བཀའ་གནང་ཡོད་པ་རེད།

ཡང་སྤྱི་ཟླ་ ༡༢ ཚེས་ ༢༩ དང་༣༠ བཅས་ཉིན་གཉིས་ཀྱི་རིང་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་རྭ་བར་མགོན་པོ་ཀྲུ་སྒྲུབ་མཆོག་གིས་མཛད་པའི་ཆོས་དབྱིངས་བསྟོད་པའི་ཆོས་འབྲེལ་བསྩལ་ཏེ། བཀའ་སློབ་སྩལ་བའི་ནང་། ང་ཚོ་ཚང་མའི་རྒྱུད་དུ་ཁམས་བདེ་གཤེགས་སྙིང་པོ་ཟེར་བའི་སེམས་ཤིག་ཡོད་པ་དང་། སེམས་འདི་དྲི་མ་དང་བཅས་པ་ཡིན་ཀྱང་དྲི་མ་གློ་བུར་བ་རེད། སེམས་ཀྱི་རང་བཞིན་ལ་ཞུགས་མེད་ཅིང་། གཉེན་པོ་བསྟེན་ན་ག་ལེར་མེད་པ་ཆགས་ཐུབ་པ་ཞིག་རེད་ཅེས་དང་། གསང་སྔགས་ཀྱི་སྐབས་ནས་བཤད་ཚེ། གཉུག་མ་ལྷན་ཅིག་སྐྱེས་པའི་འོད་གསལ་ཟེར་བའི་སེམས་འདི་ནི་རང་བཞིན་གྱིས་རྣམ་པར་དག་པ་ཞིག་ཆགས་ཡོད། དེ་ལྟ་བུ་ཞིག་ང་ཚོ་ཚང་མའི་རྒྱུད་དུ་རང་ཆས་སུ་ཡོད། དེར་བརྟེན། ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ནི་གློ་བུར་བའི་ཆོས་ཆགས་ཡོད། གང་ལྟར་རྩ་བ་བདེན་འཛིན་དང་དེའི་བག་ཆགས་ཀྱི་དབང་གིས་ཡོང་གི་ཡོད་ཅེས་བཀའ་གནང་ཡོད་པ་རེད།

ཡང་སྤྱི་ལོ་༢༠༢༤ ལོའི་སྤྱི་ཟླ་༡ པོའི་ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོར་གནས་གཟིགས་དང་འབྲེལ་སྔ་འགྱུར་རྙིང་མའི་སྨོན་ལམ་ཆེན་མོར་ཆིབས་བསྒྱུར་བསྐྱངས་ཏེ། བཀའ་སློབ་ཕེབས་པའི་ནང་། དུས་ནས་དུས་སུ་སྨོན་ལམ་རྒྱག་རྒྱུ་གལ་ཆེན་པོ་རེད། ཡིན་ནའང་། གཙོ་བོ་ཉིན་ཞག་ཕྲུགས་གཅིག་གི་རིང་ལ་སོ་སོའི་སེམས་དེ་བཅོམ་ལྡན་འདས་ཀྱི་དགོངས་པ་དང་མི་འགལ་བ་ཞིག་དང་། བསམ་པ་རྣམ་དག་གི་ཆོས་པ་ཞིག་བྱེད་རྒྱུ་གལ་ཆེ་ཡིན་ཞེས་དང་། སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་སའི་གནས་ཁྱད་པར་ཅན་འདིར་ང་ཚོ་རུབ་རུབ་བྱས་ཏེ་སྨོན་ལམ་རྒྱག་པའི་བསྐལ་བ་བཟང་པོ་བྱུང་ཡོད་པ་བཀའ་གནང་བ་དང་སྦྲགས། ཚེ་རབས་ནས་ཚེ་རབས་སུ་སྟོན་པ་བཅོམ་ལྡན་འདས་ཀྱི་བསྟན་པ་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་བར་སྨོན་ལམ་བརྒྱབ་ནས་སེམས་ཤུགས་བསྐྱེད་བཞིན་ཡོད་པ་བཀའ་གནང་ཡོད་པ་རེད།

གཞན་ཡང་། ༸གོང་ས་༸སྐྱབས་མགོན་ཆེན་པོ་མཆོག་གི་གནས་མཆོག་རྡོ་རྗེ་གདན་དུ་དད་ལྡན་མང་ཚོགས་ཁྲི་ཚོ་བརྒལ་བར་རྗེ་བཙུན་འཇམ་དཔལ་དབྱངས་ཀྱི་རྗེ་གནང་བཀའ་དྲིན་བསྩལ་ཡོད་པ་དང། བོད་མིའ་ཚོགས་སྡེ་ཁག་ནས་བརྟན་བཞུགས་བསྟར་འབུལ་ཞུས་པ་། དགེ་བཤེས་ལྷ་རམས་པའི་ཕྱག་འཁྱེར་མཛད་སྒོའི་སྟེང་ཆིབས་སྒྱུར་བཀའ་དྲིན་བསྐྱངས་ཡོད་པ་དང་། ལྷག་དོན་དུ་གནས་མཆོག་རྡོ་རྗེ་གདན་གྱི་༸རྒྱལ་བའི་ཕོ་བྲང་དགའ་ལྡན་འཕེལ་རྒྱས་གླིང་དུ་མཇལ་མང་ཆེ་བ་ཐེངས་ ༡༢ བསྩལ་ཡོད་པ་སོགས་མཛད་འཕྲིན་མང་དག་ཅིག་བསྐྱངས་ཡོད་པ་རེད། 

གསར་འགོད་པ། བློ་བཟང་དགེ་ལེགས།   

རྩོམ་སྒྲིག་པ། ཡེ་ཤེས་ཟླ་བ།

དྲྭ་ཐོག་སྤེལ་མཁན། ཡེ་ཤེས་ཟླ་བ།