བལ་ཡུལ་ནང་རྒྱ་གར་གྱི་གློག་བརྙན་སྟོན་མི་ཆོག

དེ་ཡང་བལ་ཡུལ་གྱི་དམར་ཤོག་མའོ་ཚོགས་པས། ཕྱི་ཟླ་དགུ་པའི་ཟླ་མཇུག་ཏུ་རྒྱ་གར་གློག་བརྙན་ནང༌། བལ་ཡུལ་གཞུང་དང་བལ་པོའི་མི་དམངས་ལ་འཁོན་སེམས་སློང་རྒྱུའི་ཀུན་སློང་ཁྱབ་སྤེལ་བྱེད་ཀྱི་ཡོད་པའི་སྐོར་བཤད་དེ། བལ་པོའི་གློག་བརྙན་ཁང་དུ་རྒྱ་གར་གྱི་གློག་བརྙན་སྟོན་མི་ཆོག་པ་བཙན་བཀའ་བཏང་ཡོད་པ་དང་། རྒྱ་གར་ནང་དུ་དེབ་སྐྱེལ་བྱས་པའི་མོ་ཊ་ཡང་བལ་ཡུལ་ནང་དུ་གཏོང་མི་ཆོགས་པའི་བཀག་འགོག་བྱས་ཡོད་པ་རེད།

དེར་བརྟེན་བལ་ཡུལ་རྒྱལ་སའི་ནང་གི་གློག་བརྙན་ཁང་བཅུ་གྲངས་ཤིག་ཡོད་པ་ཚོས་གློག་བརྙན་ཁང་སྒོ་རྒྱབ་པའམ་ཡང་ན་བལ་པོའི་གློག་བརྙན་སྟོན་ན་དགའ་མིན་གྱི་ཐག་གཅོད་མ་ཐུབ་པར་གནས་ཡོད་པའི་སྐོར་བལ་པོའི་ཉེན་རྟོག་པའི་མགྲིན་ཚབ་པས་གསུང་ཡོད་ཅིང༌། ད་ལྟའི་ཆར་རྒྱལ་སའི་གློག་བརྙན་ཁང་གསུམ་གྱིས་རྒྱ་གར་གྱི་གློག་བརྙན་སྟོན་རྒྱུ་མཚམས་འཇོག་བྱས་པ་དང་། གློག་བརྙན་ཁང་གཉིས་ཀྱིས་བལ་པོའི་གློག་བརྙན་སྟོན་རྒྱུ་འགོ་བཙུགས་པའི་སྐོར་གསུང་ཡོད་པ་རེད། འོན་ཀྱང་གློག་བརྙན་ཁང་ཞིག་གིས། ཁོང་ཚོར་ག་རེ་བྱེད་དགོས་མིན་གྱི་འདེམས་ཀ་མེད་པ་དང༌། གློག་བརྙན་ཁང་དུ་བལ་པོའི་གློག་བརྙན་ཉིན་ལྟར་སྟོན་རྒྱུ་གསར་བ་མེད་པ་དང་། བལྟ་མཁན་ཉུང་བས་ཉིན་རེར་གློག་བརྙན་གྱི་ཡོང་འབབ་བལ་པོའི་སྒོར་མོ་འབུམ་གསུམ་གྱོང་གུན་ཐེབས་ཀྱི་ཡོད་པ་ངོ་སྤྲོད་བྱས་འདུག