ཆོས་ལུགས་རིས་མེད་ཀྱི་ཞི་བདེའི་སྨོན་ལམ་གསུང་འདོན།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་སྔ་ཐོག་སུད་སི་གྲོང་ཁྱེར་  Zurich  གྱི་  Grossmunster  ཞེས་པའི་ཡི་ཤུའི་ལྷ་ཁང་དེར་ཆོས་ལུགས་རིས་མེད་ཀྱི་ཞི་བདེའི་སྨོན་ལམ་གསུང་འདོན་གྱི་འདུ་ཚོགས་ཤིག་ལ་ཆིབས་བསྒྱུར་དང་བཀའ་སློབ་བཀྲིན་བསྐྱངས་ཡོད་འདུག འཛམ་གླིང་ཞི་བདེའི་ཆེད་ཆོས་ལུགས་རིས་མེད་ཀྱི་སྨོན་ལམ་གསུང་འདོན་དེར་ཡི་ཤུའི་ཆོས་ལུགས་དང་ཧིན་དུ། ཁ་ཆེ། ཇིའུ་ཆོས་ལུགས་ཀྱི་སྐུ་ཚབ་རྣམས་ཆེད་ཕེབས་ཀྱིས་ཐོག་མར་ཆོས་ལུགས་སོ་སོའི་སྨོན་ལམ་གསུང་འདོན་དུ་ནང་པའི་ངོས་ནས་སུད་སི་རེ་ཀོན་དགོན་པའི་དགེ་འདུན་པ་ལྷན་༸གོང་ས་མཆོག་གིས་བོད་ལུགས་ནང་ཆོས་ཀྱི་སྨོན་ལམ་གསུང་འདོན་གནང་རྗེས་ཆོས་ལུགས་གཞན་ཁག་གིས་རིམ་བཞིན་རང་རང་སོ་སོའི་སྨོན་ལམ་གསུང་འདོན་གནང་ཡོད་འདུག སྐབས་དེར་གོང་ཞུས་ཡི་ཤུའི་ཆོས་ཁང་དེར་མི་མང་ཆིག་སྟོང་ཙམ་མཉམ་ཞུགས་གནང་ཡོད་པ་མ་ཟད་ཆོས་ཁང་གི་ཕྱི་རོལ་དུ་གཟུགས་མཐོང་རླུང་འཕྲིན་བརྒྱུད་གཟིགས་པར་ཕེབས་མཁན་མི་གྲངས་ ༧༠༠ སྐོར་ཞིག་བྱུང་ཡོད་འདུག འཛམ་གླིང་ཞི་བདེའི་ཆེད་སྨོན་ལམ་གསུང་འདོན་གྱི་འདུ་ཚོགས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་གང་ཉིད་ཀྱི་ཐུགས་ཀྱི་དམ་བཅའ་གསུམ་སྐོར་བཀའ་གནང་བ་དང་འཛམ་གླིང་གི་ཆོས་ལུགས་ཁག་མཐུན་འབྲེལ་ཡོང་རྒྱུར་དང་ཐོག་ཆོས་ལུགས་ཀྱི་རྗེས་འབྲང་པ་རྣམས་ཕན་ཚུན་ངོ་ཤེས་བརྒྱུད་ལོན་བྱེད་རྒྱུ་དེ་གལ་གནད་ཆོན་པོ་ཡིན་སྐོར་དང་ཆོས་ལུགས་རིས་མེད་ཀྱི་འདུ་ཚོགས་འདི་ལྟར་འཛམ་གླིང་གི་ས་ཕྱོགས་གང་སར་མང་ཙམ་གནང་དགོས་སྐོར་དང་གཞན་ཡང་ཆོས་ལུགས་ཁག་གི་གནས་ཆེན་ཁག་ལ་ཕན་ཚུན་བསྐོར་སྐྱོད་བྱེད་རྒྱུ་དེ་གལ་གནད་ཆེན་པོ་ཡིན་སྐོར་བཀའ་གནང་ཡོད་འདུག དེ་བཞིན་༸གོང་ས་མཆོག་གིས་འཛམ་བུ་གླིང་འདིའི་ནང་གི་དཀའ་རྙོག་ཁག་མིས་བཟོས་པར་བརྟེན་མིས་སེལ་དགོས་པ་ལས་དཀོན་མཆོག་དང་སྟོན་པ་སངས་རྒྱས་ཐུབ་པ་ལ་སྨོན་ལམ་བལྟབ་པས་འགྲིག་གི་མེད་སྐོར་སོགས་བཀའ་གནང་ཡོད་པའི་གནས་ཚུལ་ཐོན་འདུག།
གསར་འགོད་པ་ལྷུན་གྲུབ་ཚེ་རིང༌།