བཞུགས་སྒར་དུ་ཞབས་སོར་འཁོད།

༄༅༎༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སུ་ཆིབས་བསྒྱུར་གྱི་ཞི་བའི་ཚལ་ཕོ་བྲང་དུ་ཉིན་གྲངས་ ༢༡ རིང་སྐུ་མཚམས་ལ་བཞུགས་ཞག་མཛད་དེ། ཕྱི་ཟླ་ ༨ ཚེས་ ༢༡ ཉིན་སྐུ་མཚམས་གྲོལ་རྗེས་ཞི་བའི་ཚལ་གྱི་གསུང་ཆོས་རྭ་བའི་ནང་དད་ལྡན་མི་དམངས་ ༥༠༠༠ བརྒལ་བར་སྒྲོལ་དཀར་གྱི་ཚེ་དབང་དང་ཆོས་འབྲེལ་བསྩལ་རྗེས། ཕྱི་ཚེས ༢༣ ཉིན་སྔ་དྲོ་ཆུ་ཚོད་ ༩ ཐོག་ག་གྷལ་གནམ་ཐང་དུ་༸ཞབས་སོར་འཁོད་སྐབས་དབུས་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་མ་ཟད།   བཞུགས་སྒར་ཕོ་བྲང་དུ་༸ཞབས་སོར་འཁོད་སྐབས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང། ཁྲིམས་ཞིབ་པ་གཞན་ཚེ་རིང་དོན་གྲུབ་མཆོག་དེ་བཞིན་ལྷན་ཁང་ཁག་ཅིག་གི་བཀའ་བློན་རྣམ་པ་དང་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག དེ་བཞིན་དད་ལྡན་མི་མང་བརྒྱ་ཕྲག་མང་པོས་ཕེབས་བསུ་གཟབ་རྒྱས་ཞུས་ཡོད་འདུག།