མཛོད་དགེ་ལ་(H7N9)ཟེར་བའི་བྱ་ནད་ཅན་མི་གཉིས་བྱུང་འདུག

མདོ་སྨད་མཛོད་དགེ་རྫོང་དུ་ཉུང་མཐར་(H7N9)ཟེར་བའི་བྱ་ནད་ཆམ་ཚད་རིགས་ཅན་གྱི་ནད་པ་མི་གཉིས་བྱུང་འདུག
དེ་ཡང་གནས་ཚུལ་འབྱོར་བ་ལྟར་ན། མདོ་སྨད་ཟི་ཁྲོན་མཛོད་དགེ་རྫོང་ཁོངས་སྟག་ཚ་ས་གནས་སུ་ཚོང་གཉེར་བྱེད་བཞིན་པ་ས་གནས་གཞན་ནས་ཡོང་བའི་རྒྱ་མི་རིགས་ཤིག་ལ་ཉིན་ཤས་སྔོན་ཆམ་པ་ཕོག་ནས་མཛོད་དགེ་རྫོང་དང་། འབར་ཁམས། ཟི་ཁྲོན་བཅས་ས་གནས་སྨན་ཁང་དུ་བརྟག་དཔྱད་རིམ་པ་བྱས་མཐར་རྒྱ་མི་དེར་དེང་སྐབས་རྒྱ་ནག་དང་བོད་ནང་ཁྱབ་བཞིན་པའི་(H7N9)ཟེར་བའི་བྱ་ནད་ཆམ་ཚད་རིགས་ཀྱི་ནད་འགོས་ཡོད་པ་ར་འཕྲོད་བྱུང་ཡོད་འདུག དེར་བརྟེན་གཞུང་ཕྱོགས་ནས་ས་གནས་དེའི་ཁྲོམ་ར་དང་ཚོང་ཁང་སོགས་ཚང་མ་སྒོ་རྒྱབ་ནས་ས་གནས་མི་མང་ཚོར་ཆམ་ནད་དེ་རིགས་འགོས་ཡོད་མེད་བརྟག་དཔྱད་བྱེད་བཞིན་ཡོད་འདུག
གནས་ཚུལ་ངོ་སྤྲོད་པས། གོང་ཞུས་རྒྱ་མི་རིགས་དེར་བྱ་ནད་འགོས་ཡོད་པའི་སྐོར་རྒྱ་ནག་ཁྲིན་ཏུའུ་ཧའ་ཤིའི་སྨན་ཁང་ནས་བརྟག་དཔྱད་ར་འཕྲོད་བྱུང་ཡོད་པ་རེད་ཅེས་དང་། ཡང་ས་གནས་བོད་མི་གཞན་ཞིག་གིས། མཛོད་དགེ་ས་གནས་ནང་བྱ་ནད་ཆམ་པའི་རིགས་འགོས་ཁྱབ་བྱུང་སྟེ་མི་གཅིག་འདས་གྲོངས་སུ་ཕྱིན་ཡོད་པ་དང་། དེ་མིན་མི་གཞན་ཞིག་ད་དུང་སྨན་ཁང་དུ་ཡོད་མུས་ཡིན་པའི་སྐོར་ངོ་སྤྲོད་གནང་འདུག
ཉེ་ཆར་རྒྱ་ནག་གི་ཞིང་ཆེན་རིམ་པ་དང་ས་གནས་ཀྱི་དཔོན་རིགས་ཚོས་བོད་དང་རྒྱ་ནག་གི་རྒྱལ་ས་པེ་ཅིང་ནང་ H7N9 གྱི་བྱ་ནད་ཆམ་རིགས་འགོས་ཁྱབ་བྱུང་སྟངས་ཀྱི་གནས་ལུགས་གསལ་སྟོན་བྱས་ཡོད་པ་གཞིར་བཟུང་ལྟར་ན། བོད་ནང་བྱ་ནད་དེ་ཐོག་མར་ཟི་ཁྲོན་ཞིང་ཆེན་ནས་ཡོང་པའི་མི་ཞིག་ལ་འགོས་ཡོད་པ་དང་། མི་དེ་འདི་ལོ་ཕྱི་ཟླ་གཉིས་པ་ནས་བཟུང་བོད་ནང་གི་བྱ་གསོ་ཁང་ཞིག་གི་ནང་ལས་ཀ་བྱས་ཏེ་སྡོད་མཁན་ཞིག་ཡིན་འདུག་ཅིང་། ཁོ་པ་ཕྱི་ཟླ་བཞི་པའི་ནང་ནད་མནར་སྡུག་པོ་བྱུང་སྟེ། མཐར་ཁོ་པར་བྱ་ནད་དེ་ཕོག་ཡོད་པ་ཤེས་རྟོགས་བྱུང་ཡོད་པ་རེད།
དེ་བཞིན་ཉེ་བའི་ཆར་བོད་ཀྱི་རྒྱལ་ས་ལྷ་སར་(H7N9)ཟེར་བའི་བྱ་ནད་ཆམ་ཚད་རིགས་ཅན་གྱི་ནད་པ་མི་གཉིས་བྱུང་བའི་གནད་ཚུལ་ཐོན་ཡོད།

གསར་འགོད་པ་བློ་བྷེ། ཕབ་བསྒྱུར་འཆི་མེད།