རྡ་སར་དགུ་བཅུ་གསུམ་ལས་འགུལ་ཚོགས་པའི་ཚོགས་ཆེན་སྐོར།

༄༅༎བཞུགས་སྒར་རྡ་རམ་ས་ལར་རྟེན་གཞི་བྱས་པའི་དགུ་བཅུ་གསུམ་ལས་འགུལ་ཚོགས་པའི་ཚོགས་ཆེན་ཐེངས་ལྔ་པ་མཇུག་བསྒྲིལ་གནང་བ་དང་སེ་ར་དགོན་པའི་འོད་ཟེར་རིན་པོ་ཆེ་མཆོག་རྒྱུན་ལས་གསར་པའི་ཚོགས་གཙོར་འོས་འདེམས་བྱུང་ཡོད་པའི་སྐོར་གནས་ཚུལ་ཐོན་འདུག

དགུ་བཅུ་གསུམ་ཚོགས་པའི་ཚོགས་ཆེན་ཐེངས་ལྔ་པ་དེ་རེས་གཟའ་ཟླ་བ་ཉིན་དབུ་འཛུགས་གནང་ཡོད་པ་རེད་ རེས་གཟའ་ཕུར་བུའི་ཉིན་ཚོགས་འདུ་མཇུག་སྡོམ་སྐབས་ གདན་ས་ཆེན་པོ་སེ་ར་དགོན་པའི་འོད་ཟེར་རིན་པོ་ཆེ་མཆོག་དགུ་བཅུ་གསུམ་ཚོགས་པའི་ཚོགས་གཙོར་འོས་འདེམས་བྱུང་པ་དང་དེ་མིན་རྒྱུན་ལས་གསར་པ་༡༤ཡང་གསར་དུ་འོས་འདེམས་བྱུང་བཞག

གསར་དུ་འོས་འདེམས་བྱུང་བའི་ཚོགས་གཙོ་འོད་ཟེར་རིན་པོ་ཆེ་མཆོག་གིས་དགུ་བཅུ་གསུམ་ཚོགས་པའི་འདུན་པ་དང་དམིགས་ཡུལ་གྱི་ཤུགས་ཚད་ཆེ་རུ་གཏོང་རྒྱུ་དང་ ཆབ་སྲིད་ཀྱི་ཐད་ནས་ཚོགས་པའི་ལངས་ཕྱོགས་ལ་འགྱུར་བ་འགྲོ་རྒྱུ་མིན་པའི་སྐོར་དང་ དེ་བཞིན་ཚོགས་པའི་ཚོགས་མི་རྣམས་ནས་བོད་སྤྱི་བའི་དོན་དུ་ལྷག་བསམ་རྣམ་དག་གི་སྒོ་ནས་ལས་དོན་མཉམ་རུབ་བྱེད་དགོས་པའི་སྐུལ་མ་གནང་བཞག

དགུ་བཅུ་གསུམ་ཚོགས་པའི་ཚོགས་ཆེན་མཇུག་སྒྲིལ་གནང་པའི་རྗེས་ཁ་ས་གསར་དུ་འོས་འདེམས་བྱུང་བའི་རྒྱུན་ལས་རྣམ་པ་ཚོ་༸གོང་ས་༸སྐྱབས་མགོན་ཆེན་པོ་མཆོག་དང་དམིགས་བསལ་མཇལ་ཁ་ཞུས་གནང་ཡོད་པ་རེད་ དགུ་བཅུ་གསུམ་ལས་འགུལ་ཚོགས་པ་འདི་བཞིན་  བོད་མི་ཆབ་སྲིད་བཙོན་ཟུར་བ་རྣམས་ལ་གཟིགས་རྟོགས་གནང་རྒྱུ་དང་ཆབས་ཅིག་བོད་ནས་ཆབ་སྲིད་བཙོན་པ་གློད་བཀྲོལ་འབྱུང་ཐབས་ཀྱི་ལས་འགུལ་གཙོ་དོན་བཞག་ཏེ་༡༩༩༡ལོར་བོད་མི་ཆབ་སྲིད་བཙོན་ཟུར་བ་རྣམས་ནས་བཞུགས་སྒར་རྡ་རམ་ས་ལར་གསར་འཛུགས་གནང་བའི་སྒྲིག་འཛུགས་ཤིག་ཡིན་པ་རེད་༎