བཀའ་ཁྲིས་ཇར་མན་དུ་གྲོས་ཚོགས་ཚོགས་མི་དང་མཇལ་འཕྲད།

༄༅༎ཕྱི་ཚེས་༢༢གཟའ་མིག་དམར་ཉིན་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་སུད་སི་ཁུལ་གྱི་གཞུང་འབྲེལ་ལས་དོན་རྣམས་ཡོངས་སུ་ལེགས་སྒྲུབ་ཀྱིས་ཇར་མན་གྲོང་ཁྱེར་སྦར་ལིན་དུ་ཕེབས་ཡོད་པ་དང་ གྲོང་ཁྱེར་སྦར་ལིན་དུ་ཕེབས་མཚམས་ཐོག་མར་བཀའ་ཁྲི་མཆོག་གིས་ཨེ་ཨེཕ་པི་གསར་འགྱུར་ལས་ཁང་གི་གསར་འགོད་པའི་དྲི་བར་ལན་འདེབས་གནང་ཡོད་ཅིང་ དེ་རྗེས་ཇར་མན་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་ཁང་ཞིག་ཏུ་མགྲོན་འབོད་ལྟར་ཕེབས་ཏེ་ ཇར་མན་གྲོས་ཚོགས་ཀྱི་བོད་དོན་གླེང་མོལ་ཚོགས་ཆུང་དང་ཕྱི་འབྲེལ་ལས་དོན་ཚོགས་ཆུང་གི་གྲོས་ཚོགས་འཐུས་མི་༡༥ཙམ་ལ་བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་གནང་ཡོད་པ་དང་ ད་ལྟ་བོད་ནང་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་བོད་མི་ཚོ་ཐབས་ཟད་འུ་ཐུག་གི་གནས་སྟངས་འོག་ཡོད་པའི་སྐབས་འདིར་ཇར་མན་ཕྱི་སྲིད་ལྷན་ཁང་དང་འགྲོ་བ་མིའི་ཐོབ་ཐང་ལྷན་ཚོགས་ དེ་བཞིན་ཇར་མན་གྲོས་ཚོགས་འཐུས་མི་རྣམས་ཀྱིས་བོད་མི་ཚོར་རྒྱབ་སྐྱོར་གྱི་རྣམ་པ་ཤུགས་ཆེ་བསྟེན་པ་དེ་དག་གཞིས་ལུས་བོད་མི་ཚོས་ཤེས་རྟོགས་ཐུབ་ཀྱི་ཡོད་པ་མ་ཟད་ བོད་མིའི་བདེན་པའི་འཐབ་རྩོད་ལ་འཛམ་གླིང་ཕྱི་ནས་རྒྱབ་སྐྱོར་གནང་བཞིན་པར་བརྟེན་རེ་བ་ཆེན་པོ་ཡོད་ཅེས་བཀའ་ཁྲི་མཆོག་གིས་གཞིས་བཞུགས་སྤུན་ཟླ་ཚོར་བརྗོད་འདོད་ཡོད་སྐོར་གསུང་ཡོད་པ་དང་ཆབས་ཅིག་ཇར་མན་གྲོས་ཚོགས་ཀྱི་འཐུས་མི་རྣམས་ལ་བོད་མི་ཡོངས་ཀྱི་ཚབ་ཞུས་ཏེ་བཀའ་དྲིན་རྗེས་དྲན་ཞུས་གནང་ཡོད་པ་རེད་