ཕ་རན་སི་ནས་བོད་ཀྱི་གྲོང་གསེབ་གཅེས་སྐྱོང་གནང་རྒྱུ།

༄༅།    །ཉེ་ལམ་ཕྱི་ཟླ་ ༩ ཚེས་ ༢༩ དང་ ༣༠ བཅས་ཉིན་གཉིས་རིང་ཕ་རན་སི་ལྷོ་ཕྱོགས་ཀྱི་གྲོང་ཁྱེར་ Lavaur ཞེས་པའི་ནང་ཕ་རན་སིའི་གྲོང་སྡེ་ལས་ཁུངས་དྲུག་གིས་བོད་དང་གཞན་བཅས་ཀྱི་གྲོང་གསེབ་དྲུག་ལ་གཅེས་སྐྱོང་གནང་རྒྱུའི་ཐག་གཅོད་བྱུང་བའི་མཛད་སྒོ་ཚོགས་ཡོད་སྐོར་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་འདུག
མཛད་སྒོའི་ཐོག ཕ་རན་སིའི་གྲོང་ཁྱེར་དྲུག་དང་། གྲོང་སྡེ་ལས་ཁུངས་གཉིས་ཀྱི་སྤྱི་ཁྱབ་པ་རྣམས་ཆེད་ཕེབས་གནང་ཐོག བཀའ་ཟུར་རྗེ་བཙུན་པདྨ་མཆོག་དང་། ཕ་རན་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་རྣམས་གཉིས་སྐུ་མགྲོན་དུ་ཕེབས་ཡོད་པ་རེད། གཅེས་སྐྱོང་གནང་སའི་བོད་ཀྱི་གྲོང་གསེབ་ཁག་དང་། གཅེས་སྐྱོང་གནང་མཁན་ཕེརན་སི་གྲོང་ཁྱེར་དྲུག་པོ་དེ་དག་ནི་  Lavelanet-de-Comminges ཞེས་པས་བོད་ཀྱི་སྣར་ཐང་གྲོང་ཁྱེར་ལ་གཅེས་སྐྱོང་གནང་རྒྱུ་དང་།  Gensac-sur-Garonne ཞེས་པའི་གྲོང་ཁྱེར་ནས་བོད་ཀྱི་དགའ་གདོང་གྲོང་གསེབ་ལ་གཅེས་སྐྱོང་གནང་རྒྱུ།    Bax ཞེས་པའི་གྲོང་ཁྱེར་གྱིས་རོང་ཞེས་པའི་བོད་ཀྱི་གྲོང་གསེབ་ལ་གཅེས་སྐྱོང་གནང་རྒྱུ།  Carbonne ཞེས་པའི་གྲོང་ཁྱེར་ནས་བོད་ཀྱི་སྣ་དཀར་རྩེ་ལ་གཅེས་སྐྱོང་གནང་རྒྱུ།  Latrape ཞེས་པའི་གྲོང་ཁྱེར་ནས་རི་ཝོ་ཆེ་ལ་གཟིགས་རྟོག་གནང་རྒྱུ།  Mailholas ཞེས་པའི་གྲོང་ཁྱེར་ནས་རྡོ་རྗེ་གླིང་ལ་གཅེས་སྐྱོང་གནང་རྒྱུ་བཅས་གཏན་འཁེལ་གནང་བཞག

ཕ་རན་སིའི་གྲོང་ཁྱེར་དེ་དག་གིས་བོད་ཀྱི་གྲོང་གསེབ་ཁག་ལ་གཟིགས་རྟོགས་གནང་རྒྱུའི་དགོས་དམིགས་གཙོ་བོ་ནི། རྒྱ་ནག་གཞུང་གིས་སྲིད་བྱུས་འོག་རིམ་བཞིན་བོད་དེ་བཞིན་རྒྱ་ཡུལ་དུ་འགྱུར་རྒྱུའི་ཉེན་ཁ་ལས་སྐྱོབ་ཐབས་ཆེན་ཡིན་པ་གསལ་འདོན་གནང་འདུག།