ཕ་རན་སིའི་སྲིད་འཛིན་ལ་འབོད་སྐུལ།

༄༅།    །ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་བ་སྐུ་ཞབས་ André Gattolin དང། སྐུ་ཞབས་ Noel Mamère མཆོག དེ་བཞིན་སྐུ་ཞབས་ Jean Patrick Gille བཅས་ཀྱིས་རིང་མིན་ཕ་རན་སིའི་སྲིད་འཛིན་སྐུ་ཞབས་Hollande མཆོག་རྒྱ་ནག་ཏུ་རྒྱལ་དོན་འཚམས་གཟིགས་གནང་བར་ཕེབས་སྐབས་  རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་རྒྱ་ནག་ནང་དང་།    ལྷག་པར་བོད་དང་ཤིང་ཅང་ནང་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་གནང་དགོས་པས་མ་ཟད། བོད་དང་ཤིང་ཅང་ནང་འཕྲད་བཞིན་པའི་དཀའ་ངལ་དེ་དག་ལ་སེམས་འཚབ་ཆེན་པོ་ཡོད་པའི་རྣམ་པ་གསལ་བཏོན་དགོས་པའི་སྐོར་འབོད་སྐུལ་ཡང་ཞུས་འདུག  དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་སྤེལ་བའི་གནས་ཚུལ་གཞིར་བཟུང་བྱས་ན།    གོང་གསལ་གྲོས་ཚོགས་ཀྱི་འཐུས་མི་གསུམ་གྱིས་ཕ་རན་སིའི་རྒྱལ་ཡོངས་གྲོས་ཚོགས་འོག་མའི་ནང་གནད་དོན་དེའི་སྐོར་གསུང་དོན་དུ་ཕ་རན་སི་དང་རྒྱ་ནག་དབར་ཚོང་འབྲེལ་དང་ཕྱོགས་གཉིས་ཀྱི་གཞུང་འབྲེལ་ལས་ཁུངས་དབར་འབྲེལ་བ་ཡར་རྒྱས་གཏོང་རྒྱུ་གལ་ཆེ་ཡིན་པ་ནི་རྩོད་མེད་ཅིག་ཆགས་ཡོད་ཀྱང་།     ཕྱོགས་གཉིས་ཀྱི་འབྲེལ་ལམ་ཐད་འཛེམས་ཟོན་བྱེད་མི་དགོས་པར་གུ་ཡངས་དང་བསམ་ཤེས་ཐུབ་པའི་ཁོར་ཡུག་ཅིག་གི་འོག་ལས་དོན་སྤེལ་དགོས་ན།  རྒྱ་ནག་ནང་གྲངས་ཉུང་མི་རིགས་ཚོའི་རིག་གཞུང་དང་འགྲོ་བ་མིའི་ཐོབ་ཐང་ལ་འཕྲད་བཞིན་པའི་དཀའ་ངལ་རྣམས་སྣང་མེད་དུ་འཇོག་ཐབས་མེད་ཅེས་གསུངས་ཡོད་པ་རེད།།