ཁིའུ་འབའ་ཡི་སྲིད་འཛིན་ཟུར་པ་ཕི་ཌེལ་ ཀས་ཊོ་འདས་གྲོངས་སུ་ཕྱིན་པ།

༄༅། །ཁིའུ་འབའ་ཡི་སྲིད་འཛིན་ཟུར་པ་ ཕི་ཌེལ་ ཀས་ཊོ་(Fidel Castro) ཁ་ས་དགོངས་མོའི་ཚོུད་༡༠ཕྱེད་ཀ་ཙམ་ལ་འདས་གྲོངས་སུ་ཕྱིན་ཡོད་པ་དང་། འདས་གྲོངས་སུ་ཕྱིན་པའི་སྐབས་རང་ལོ་དགུ་བཅུར་ཕེབས་ཡོད་འདུག
ཁིའུ་འབའ་ཡི་སྲིད་འཛིན་ ར་འུལ་ ཀས་ཊོ(Raul Castro) ཡིས་བརྙན་འཕྲིན་བརྒྱུད་ནས་སྲིད་འཛིན་ཟུར་པ་ ཕི་ཌེལ་ ཀས་ཊོ་(Fidel Castro) འདས་གྲོངས་སུ་ཕེབས་པའི་སྐོར་གནས་ཚུལ་ཕྱིར་བསྒྲགས་བྱས་ཡོད་པ་དང་།  ཡིན་ནའི་འདས་གྲོངས་སུ་ཕྱིན་པའི་རྒྱུ་རྐྱེན་སོགས་ཞིབ་ཕྲའི་གནས་ཚུལ་གང་ཡང་བརྗོད་མེད་པ་རེད།  ཁིའུ་འབའ་ཡི་སྲིད་འཛིན་ཟུར་པ་ ཕི་ཌེལ་ ཀས་ཊོ་ (Fidel Castro) ཡིས་ཁྱུ་པ་ཡུལ་གྲུ་དེ་བཞིན་གུང་ཁྲན་རིང་ལུགས་ཀྱི་རྒྱལ་ཁབ་ཏུ་འགྱུར་ཡོད་པ་དང་།  ཁོང་གིས་ ༡༩༥༩ནས་༡༩༧༦བར་ ཁིའུ་འབའ་ཡི་སྲིད་བློན་གྱི་ལས་གནས་ཁུར་ཡོད་པ་དང་ ༡༩༧༦ནས་༢༠༠༨ལོ་བར་ཡུལ་དེའི་ཆེས་མཐོའི་དཔོན་རིགས་ཀྱི་འགན་ཁུར་ཡོད་ཅིང་ཉིས་སྟོང་བརྒྱད་ལོར་གཟུགས་གཞིའི་གནས་སྟངས་ཀྱིས་དཔོན་རིགས་ལས་གནས་ནས་དགོངས་ཞུ་བྱས་ཡོད་པ་རེད། ཕི་ཌེལ་ ཀས་ཊོ་(Fidel Castro)་ནི་སྤྱི་ཚོགས་རིང་ལུགས་ལ་རྒྱབ་སྐྱོར་དང་བཙན་རྒྱལ་རིང་ལུགས་པར་ངོ་རྒོལ་བྱེད་མཁན་གྱི་འཐབ་རྩོད་པ་ཞིག་ཡིན་པར་ངོས་འཛིན་བྱེད་ཀྱི་ཡོད་པ་དང་། ཁོང་གིས་ཁིའུ་འབའ་ཡི་ཡུལ་གྲུར་དབང་འཛིན་བྱེད་པའི་ལོ་མང་རིང་ཁིའུ་འབའ་དེ་བཞིན་ཚོགས་པ་གཅིག་གི་དབང་བསྒྱུར་འོག་གི་གུང་ཁྲན་རིང་ལུགས་ཀྱི་རྒྱལ་ཁབ་ཤིག་ཏུ་འགྱུར་ཡོད་པ་དང་།  དེའི་རིང་ཡུལ་དེའི་ཚོང་ལས་དང་བཟོ་ལས་སོགས་ཡོངས་རྫོགས་རྒྱལ་ཁབ་ལ་དབང་བའི་ལམ་ལུགས་འཛིན་ཏེ་ ཁིའུ་འབའ་ཡི་སྤྱི་ཚོགས་ཁྱོན་ཡོངས་སུ་སྤྱི་ཚོགས་རིང་ལུགས་ཀྱི་འགྱུར་བཅོས་ལམ་ལུགས་སྤེལ་ནས་རྒྱལ་ནང་གི་དཔལ་འབྱོར་གནས་སྟངས་ཧ་ཅང་དཀའ་ཚེག་འོག་ཡུལ་མི་ཁྲི་སྟོང་མང་པོ་ཐབས་ཟད་འུ་ཐུག་གིས་ཚེ་སྲོག་ཤོར་བར་མི་འཛེམས་པར་ཨ་རིའི་ནང་བཙན་བྱོལ་དུ་ཡོང་ནས་ ཕི་ཌེལ་ ཀས་ཊོ་(Fidel Castro)་དབང་འཛིན་ལ་མི་འདོད་པའི་རྣམ་འགྱུར་བཏོན་ཡོད་པ་རེད།།

གསར་འགོད་པ་འཆི་མེད།