འཛམ་གླིང་ནང་ཟ་འབྲུའི་རིན་གོང་མུ་འཐུད་འཕར་བ།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱིས་འཛམ་གླིང་ན་ཟ་འབྲུའི་རིན་གོང་མུ་མཐུད་མཐོ་པོར་གནས་པ་དང༌། ༢༠༡༢ ནང་རིན་གོང་མི་བརྟན་པའི་གནས་སྟངས་མུ་མཐུད་བྱུང་ཚེ་འཛམ་གླིང་གི་རྒྱལ་ཁབ་སྐྱོ་བའི་ནང་ཟ་བཅའི་ཉེན་ཁར་གཟིགས་ཀྱི་ཡོད་པ་གསུང་ཡོད་པ་རེད།

དེ་རིང་རེས་གཟའ་མིག་དམར་ཉིན་ཨི་ཀྲ་ལིའི་རྒྱལ་ས་རཱོམ་དུ་རྟེན་གཞི་བྱེད་པའི་ཟ་བཅའ་དང་སོ་ནམ་ལས་ཁང་གི་གསལ་བསྒྲགས་ཤིག་སྤེལ་བའི་ནང༌། ཕྱི་ཟླ་ལྔ་པའི་ནང་ཁོང་ཚོའི་ཟ་བཅའི་རིན་གོང་འཕར་མའི་བརྒྱ་ཆ་༢༣༢ ཟིན་ཡོད་པ་དེ་ནི་ཕྱི་ཟླ་བཞི་པའི་ནང་རིན་གོང་བརྒྱ་ཆ་༢༣༥ ཟིན་པ་དང་བསྡུར་ན། ཕྱི་ཟླ་ལྔ་པའི་ནང་ཕྲན་བུ་མར་ཆགས་ཡོད་ཀྱང༌། ད་དུང་༢༠༡༠ ལོའི་ཕྱི་ཟླ་ལྔ་པ་དང་བསྡུར་ན་ད་དུང་ཡང་བརྒྱ་ཆ་༣༧ འཕར་ཡོད་པ་བརྟེན། དེ་ལྟར་ཟ་འབྲུའི་རིན་གོང་མཐོ་པོ་དང༌། སོ་ནམ་ཐོན་སྐྱེད་ཀྱི་རིན་གོང་བརྟན་པོར་མ་གནས་པར་ཡར་མར་འཕར་ཆགས་སུ་གནས་ཚེ་མ་འོངས་པའི་ལོ་ཟླ་དེ་དག་ནང་མུ་མཐུད་ཟ་བཅའི་རིན་གོང་གི་དཀའ་ངལ་ཐོག་གནས་སྲིད་པ་མ་ཟད། དེ་ཡི་ཤུགས་རྐྱེན་༢༠༡༢ ལོར་ཐེབས་རྒྱུའི་ཉེན་བརྡ་བཏང་གནང་ཡོད་པ་རེད། ད་དུང་ལས་ཁང་དེ་གསུར་པར་གཞིགས་ན། སྤྱི་ཡོངས་ཀྱི་ཟ་བཅའ་དང་སོ་ནམ་ཐོན་སྐྱེད་ཀྱི་གནས་སྟངས་ནི་འཛམ་གླིང་གི་ཟ་བཅའི་རིན་གོང་དང་འབྲེལ་བ་དམ་ཟབ་གནས་ཡོད་པ་བཞིན་ཟ་བཅའི་རིན་གོང་ནི་མུ་མཐུད་མཐོ་པོར་གནས་བཞིན་ཡོད་པར་བརྟེན། དེ་ཡིས་འཛམ་གླིང་ནང་གི་ཡོང་འབབ་དམའ་བའི་རྒྱལ་ཁབ་ནང་ཟ་བཅའི་རིན་གོང་དང་ཡོང་འབབ་གཉིས་གབ་མི་མཐུན་པའི་ཉེན་ཁ་བཟོ་བ་ཡིན་ཞིང། ༢༠༡༡ ནང་རྒྱལ་སྤྱིའི་ཟ་འབྲུ་ནང་འདྲེན་བྱས་པའི་རིན་གོང་ནི་ཨ་རིའི་ཊོ་ལར་ས་ཐེར་འབུམ་གཅིག་དང་གྲངས་ཆུང་༢༩ ཐོབ་ཏེ། ༢༠༡༠ ལས་བརྒྱ་ཆ་༢༡ ཀྱིས་མང་བ་ཟིན་ཡོད་པར་བརྟེན། འཛམ་གླིང་གི་དཔལ་འབྱོར་ཡོང་འབབ་དམའ་བ་དང་ཡར་རྒྱས་མེད་པའི་རྒྱལ་ཁབ་དེ་དག་ནང་ནང་འདྲེན་བྱེད་པའི་ཟ་བཅའི་རིན་འབབ་ལ་བརྒྱ་ཆ་༢༧ ནས་༣༧ ཙམ་མང་བ་འགྲོ་གྲོན་གཏོང་དགོས་པའི་དཀའ་ངལ་འཕྲད་རྒྱུ་ཡིན་པ་གསུང་ཡོད་པ་རེད།