༧གོང་ས་མཆོག་གིས་ཆུ་ལོག་གི་གནོད་འཚེ་ཕོག་ཁུལ་ལ་ཐུཊ་གསོ།

༧གོང་ས་མཆོག་གིས་མངའ་སྡེའི་སྤྱི་ཁྱབ་བློན་ཆེན་ལ་ཐུགས་གསོའི་གསུང་འཕྲིན་བཏང་ནས་ཚེ་སྲོག་ཤོར་བ་ཚོར་ཐུགས་སྨོན་གནང་འདུག
རྒྱ་གར་བྱང་ཕྱོགས་ཇ་མུ་ཀ་ཤི་མིར་ནང་ཆར་ཤུགས་ཧ་ཅང་ཆེན་པོ་བྱུང་ནས་ཁུལ་དེར་ཡོད་པའི་Jhelum ཞེས་པའི་གཙང་ཆུ་ལུད་ནས་ཆུ་ལོག་བརྒྱབ་ཏེ་མི་མང་པོའི་ཚེ་སྲོག་ཤོར་བ་མ་ཟད། སྡོད་ཁང་དང་། སྨན་ཁང་། ས་ཞིང་སོགས་མི་རྒྱུ་གཉིས་ལ་གོད་ཆག་ཚབས་ཆེ་ཕོག་པར་ བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཁ་ས་མངའ་སྡེའི་སྤྱི་ཁྱབ་བློན་ཆེན་Omar Abdullah མཆོག་ལ་ཐུགས་གསོའི་གསུང་འཕྲིན་ཞིག་ཕུལ་གནང་འདུག དེ་ཡང་༧གོང་ས་མཆོག་གིས་གསུང་འཕྲིན་དེའི་ནང་། ཆུ་ལོག་གི་གོད་ཆག་འོག་དཀའ་སྡུག་ཧ་ཅང་མྱོང་བཞིན་པ་རྣམས་ལ་ཐུགས་ཕམ་མཛད་བཞིན་པ་དང་། ལྷག་པར་ཚེ་སྲོག་ཤོར་བ་རྣམས་ལ་ཐུགས་སྨོན་མཛད་པ་མ་ཟད། རྗེས་ཤུལ་ནང་མི་སྤུན་མཆེད་རྣམས་ལ་གདུང་སེམས་མཉམ་བསྐྱེད་ཀྱི་ཐུགས་གསོ་གནང་བ་དང་སྦྲགས་ཏ་ལའི་བླ་མའི་ཐེབས་རྩ་ཁང་ནས་ཇ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་གྱི་ཆུ་ལོག་ངལ་སེལ་བརྒྱུད་ཞལ་འདེབས་གསོལ་སྩལ་གནང་འདུག དེ་བཞིན་ཇ་མུ་ཀ་ཤི་མིར་མངའ་སྡེའི་གཞུང་གིས་ཆུ་ལོག་ནང་ཚུད་པའི་ཡུལ་མི་རྣམས་ལ་མྱུར་སྐྱོབས་ལས་འགུལ་དང་། གོད་ཆག་ཕོག་པ་རྣམས་ལ་ཟས་གོས་གནས་མལ་སོགས་ཀྱི་རོགས་རམ་རྒྱ་ཆེ་གནང་བཞིན་པར་༧གོང་ས་སྐྱབས་མགོན་ཆེན་པོ་མཆོག་གིས་བསྔགས་བརྗོད་ཀྱང་གནང་འདུག
ཉེ་ཆར་ཕྱི་ཟླ་༩ཚེས་༧རེས་གཟའ་སྤེན་པའི་མཚན་མོ་ཇ་མུ་ཀ་ཤི་མིར་ནང་ཆར་པ་ཤུགས་ཆེ་འབབ་པའི་རྐྱེན་གྱིས་རེས་གཟའ་ཉི་མའི་ཐོ་རངས་ལ་ཁུལ་དེར་ཡོད་པའི་གཙང་ཆུ་ལུད་ནས་ཆུ་ལོག་བརྒྱབ་སྟེ་ཤི་རི་ཎ་སྒར་གྱི་གྲོང་གསེབ་ཕལ་ཆེ་བ་ཆུ་ལོག་འོག་ཚུད་པ་དང་། མི་མང་པོ་ཞིག་ཀྱང་རྐྱེན་འདས་སུ་ཕྱིན་ཡོད་པ་རེད། དེ་ནི་མི་ལོ་༦༠ཙམ་ཀྱི་རྗེས་སུ་ཁུལ་དེར་ཆུ་ལོག་ཆེན་པོ་དེ་འདྲ་བརྒྱབ་ནས་མི་རྒྱུ་གཉིས་ལ་གོད་ཆག་ཆེན་པོ་དེ་འདྲ་ཕོག་པ་ཐོག་མ་དེ་ཡིན་པ་རེད།

གསར་འགོད་པ་ཚེ་དབང་དངོས་གྲུབ།