ཏོག་དབྱིབས་འགོས་ནད་ཕོག་པའི་མི་མང་ཟུར་བཀག་བྱ་ཡུལ་ལ་གཞུང་གིས་དྲིལ་བསྒྲགས་བྱས་པ་ནང་བཞིན་མ་ཡིན་པར་མི་མང་ལ་དཀའ་ངལ་འཕྲད་བཞིན་པ།

བོད་ནང་ཏོག་དབྱིབས་འགོས་ནད་ཁྱབ་གདལ་ཆེན་པོ་ཕྱིན་ནས་འགོས་ནད་ཕོག་པའི་མི་མང་པོ་གཞུང་གིས་ཆེད་མངགས་ཟུར་བཀག་བྱ་ཡུལ་དུ་ཁྲིད་ཀྱི་ཡོད་རུང་།   གཞུང་ཕྱོགས་ནས་དྲིལ་བསྒྲགས་བྱས་པ་ནང་བཞིན་མ་ཡིན་པར་མི་མང་ལ་དཀའ་ངལ་ཆེན་པོ་འཕྲད་བཞིན་ཡོད་འདུག་ལ།   ཚེས་༢༥ཉིན་བོད་རང་སྐྱོང་ལྗོངས་ཟེར་བའི་ཁུལ་དུ་འགོས་ནད་ཕོག་པའི་ནད་པ་༢༡༤ བྱུང་ནས་ཉིན་གུང་ཆུ་ཚོད་གཉིས་པ་བར་བོད་རང་སྐྱོང་ལྗོངས་ཟེར་བའི་ཁུལ་དུ་འགོས་ནད་ཕོག་པ་ཁྱོན་བསྡོམས་མི་གྲངས་ ༦༦༣༡ བྱུང་ཡོད་འདུག
དེ་ཡང་ཤེས་རྟོགས་བྱུང་བར་གཞིགས་ན།  བོད་ཀྱི་ས་ཁུལ་མང་པོའི་ནང་ཏོག་དབྱིབས་རིམས་ནད་ཀྱིས་རྐྱེན་པས་ཁྱིམ་སྡོད་བཀག་རྒྱ་དང་།  འགོས་ནད་ཕོག་པ་རྣམས་ཆེད་མངགས་ཟུར་བཀག་བྱ་ཡུལ་དུ་ཁྲིད་ཀྱིན་ཡོད་ན་པ་དང་། ཉེན་རྟོག་པ་སོགས་ཀྱིས་བདེ་སྲུང་གི་མིང་ཐོག་ནས་དམ་དྲག་ཧ་ཅང་ཆེན་པོ་བྱེད་བཞིན་ཡོད་པར་བརྟེན་མི་མང་པོའི་ཉིན་རེའི་འཚོ་བར་དཀའ་ངལ་ཆེན་པོ་འཕྲད་བཞིན་འདུག་ལ།   འགོས་ནད་ཕོག་པའི་མི་སྣ་ཟུར་བཀག་བྱ་ཡུལ་དུ་ཁྲིད་པའི་རྗེས་ལྟ་རྟོག་བྱེད་མཁན་མེད་པར་ལུས་ཏེ་དཀའ་ངལ་འཕྲད་པའི་གནས་ཚུལ་བྱུང་དང་འབྱུང་བཞིན་ཡོད་འདུག   འོན་ཀྱང་གཞུང་ཕྱོགས་ཀྱི་གསར་འགྱུར་བརྒྱུད་ལམ་ནང་གཞུང་གིས་ལྟ་རྟོག་ཡག་པོ་བྱས་ཏེ་མི་མང་ལ་དཀའ་ངལ་མེད་པའི་སྐོར་དྲིལ་བསྒྲགས་བྱེད་བཞིན་ཡོད་འདུག   མང་ཚོགས་ཀྱིས་སྤྱི་ཚོགས་དྲ་ལམ་བརྒྱུད་དཀའ་ངལ་འཕྲད་པའི་གནས་ཚུལ་འགྲེམས་སྤེལ་བྱས་པ་ཁག་མེད་པར་བཟོི་བ་དང་།  རིམས་ནད་ལ་ཁ་གཏད་བཅོག་པའི་ལས་དོན་ལ་འགོག་རྐྱེན་བཟོས་པའི་མིང་ཐོག་ནས་འཛིན་བཟུང་དང་ཉེས་ཆད་བཏང་པའི་གནས་ཚུལ་ཡང་ཐོན་འདུག
ཡང་ཚེས་༢༥ཉིན་གྱི་ཉིན་གུང་ཆུ་ཚོད་གཉིས་པ་བར་བོད་རང་སྐྱོང་ལྗོངས་ཟེར་བའི་ཁུལ་དུ་ཏོག་དབྱིབས་འགོས་ནད་ཕོག་པའི་མི་སྣ་ཁྱོན་༢༡༤བྱུང་ཡོད་པའི་ཁོངས་སུ་ནད་རྟགས་ཡོད་པའི་མི་༡༨ཡོད་པ་དང་།  དེའི་ནང་ལྷ་ས་ནས་མི་༡༧དང་ནག་ཆུ་ནས་མི་གཅིག་བྱུང་པ་དང་།  ནད་རྟགས་མེད་པའི་མི་༡༩༦བྱུང་པ་དེའི་ནང་ལྷ་ས་ནས་མི་༨༤དང་གཞིས་རྩེ་ནས་མི་༦༤  ལྷོ་ཁ་ནས་མི་༡༦  ཆབ་མདོ་ནས་མི་གཅིག  ནག་ཆུ་ནས་མི་༩  མངའ་རིས་ནས་མི་༢༢ བྱུང་ཡོད་པ་དང་།  ཡང་ཚེས་༢༤ཉིན་གཅིག་པུར་ནད་རྟགས་ཡོད་པའི་མི་༣༧དང་། ནད་རྟགས་མེད་པ་མི་༥༢༡བཅས་འགོས་ནད་ཕོག་པ་ཁྱོན་མི་༥༥༨བྱུང་ཡོད་པ་གཞུང་ཕྱོགས་ཀྱིས་བརྗོད་འདུག་ཅིང་།   རྒྱ་ནག་རྒྱལ་ཡོངས་ཀྱི་ནད་ཡམས་སྐོར་གྱི་ཉེན་ཁ་ཆེ་ཤོས་ཁུལ་གྱི་གྲངས་ཐོའི་ནང་བོད་རང་སྐྱོང་ལྗོངས་ཟེར་བའི་ནང་་ས་ཁུལ་༥༢༣དང་། ཤིན་ཅང་ཡུ་གུར་རང་སྐྱོང་ལྗོངས་ཟེར་བའི་ནང་ས་ཁུལ་༢༩༧  ཚུད་ཡོད་འདུག
གསར་འགོད་པ། སྐལ་ལྡན་བློ་གྲོས།
རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཡེ་ཤེས་བཀྲ་ཤིས།