བོད་མི་ཡོངས་ནས་མང་གཙོའི་ཁེ་དབང་གལ་ཆེར་རྩིས་དགོས་སྐོར།

༄༅༎ཕྱི་ཟླ་དགུ་པའི་ཚེས་༢ཉིན་བཙན་བྱོལ་བོད་མིའི་སྤྱི་ཚོགས་ནང་མང་གཙོའི་དུས་དྲན་སྲུང་བརྩི་ཞུས་གནང་བའི་སྐབས་བོད་མིའི་སྤྱི་སྒེར་ཡོངས་ཀྱིས་མང་གཙོའི་ཁེ་དབང་ལས་ལས་འགན་གལ་འགངས་ཆེ་བར་བརྩི་དགོས་སྐོར་བཀའ་ཤག་གིས་གསུངས་བཤད་གནང་ཡོད་པ་རེད་

དེ་ཉིན་བཞུགས་སྒར་རྡ་རམ་ས་ལའི་གཙུག་ལག་ཁང་ཐེག་ཆེན་ཆོས་གླེང་གི་མདུན་ཐང་དུ་བཙན་བྱོལ་བོད་གཞུང་བཀའ་ཤག་གི་གཙོས་གཞུང་ཞབས་རྣམ་པ་དང་མི་མང་བཅས་ནས་བཙན་བྱོལ་བོད་མིའི་སྤྱི་ཚོགས་ནང་མང་གཙོའི་ལམ་ལུགས་དབུ་བརྙེས་ནས་ལོ་ངོ་༤༨འཁོར་བའི་དུས་དྲན་སྲུང་བརྩི་ཞུས་གནང་ཡོད་པ་རེད་ དུས་དྲན་དེ་ཉིན་བཙན་བྱོལ་བོད་གཞུང་བཀའ་བློན་ཁྲི་པའི་ལས་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་བཀའ་ཤག་གི་གསུངས་འཕྲིན་སྒྲོགས་སྦྱང་གནང་བའི་ནང་ཛ་དྲག་དང་གཉན་འཕྲང་ཅན་གྱི་དུས་སྐབས་དེ་ལ་བོད་མི་སྤྱི་སྒེར་ཡོངས་ཀྱིས་མང་གཙོའི་ཁེ་དབང་ལས་ལས་འགན་གལ་འགངས་ཆེ་བར་བརྩི་དགོས་པ་དང་ བཀའ་བློན་ཚེ་རིང་ཕུན་ཚོགས་མཆོག་གིས་བོད་པའི་སྤྱི་ཚོགས་ནང་ཕོ་མོ་འདྲ་མཉམ་གྱི་ནུས་ཤུགས་སྤེལ་ཐབས་ཀྱི་སྲིད་ཇུས་གཏན་འབེབས་གནང་འཆར་ཡོད་ལུགས་ཡང་བཀའ་གནང་ཡོད་པ་རེད་ ཡང་བཀའ་བློན་ཁྲི་ཚབ་ཚེ་རིང་ཕུན་ཚོགས་མཆོག་གིས་ཇི་སྲིད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆབ་སྲིད་ཀྱི་རང་བཞིན་གུ་ཡངས་དང་རང་དབང་ ཕྱི་གསལ་ནང་གསལ་གྱི་གནས་བབས་ཞིག་ཏུ་མ་འགྱུར་བར་དུ་བོད་ཀྱི་དཀའ་རྙོག་སེལ་ཐབས་དཀའ་བས་བོད་མི་རྣམས་ཀྱིས་ཀྱང་གུ་ཡངས་དང་རང་དབང་ཕྱི་གསལ་ནང་གསལ་གོང་འཕེལ་ཡོང་རྒྱུར་འབད་བརྩོན་གནང་དགོས་སྐོར་དང་བོད་བསྟན་སྲིད་མི་རིགས་ཀྱི་དོན་དུ་ལུས་སྲོག་ཡོངས་རྫོགས་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱིས་བཀྲིན་རྗེས་དྲན་དང་ཁོང་རྣམས་ལས་གུས་བཏུས་ཡང་ཞུས་གནང་ཡོད་པ་རེད་