རྒྱ་ནག་གཞུང་ལ་བོད་དོན་དཀའ་རྙོག་སེལ་རྒྱུའི་འདོད་པ་མེད།

༄༅༎ཕྱི་ཚེས་ ༢༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་སྐལ་བཟང་རྒྱལ་མཚན་མཆོག་གིས་ཡུ་རོབ་གྲོས་ཚོགས་སུ་བོད་དོན་རྒྱབ་སྐྱོར་ཚོགས་པའི་ཞུགས་མོལ་ལྷན་ཚོགས་ཤིག་གི་སྐབས་བོད་རྒྱ་འབྲེལ་མོལ་སྐོར་གསུང་བཤད་གནང་བའི་ནང༌། རྒྱ་ནག་ཕྱོགས་ནས་བོད་དོན་དཀའ་རྙོག་སེལ་ཐབས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་ཐོག་གྲོས་མོལ་བྱ་རྒྱུའི་ཆབ་སྲིད་ཀྱི་འདོད་པ་མེད་པ་གསལ་བསྟོན་གནང་བཞག།
སྐུ་ཚབ་སྐལ་བཟང་རྒྱལ་མཚན་མཆོག་གིས་ཡུ་རོབ་གྲོས་ཚོགས་དང་བོད་དོན་རྒྱབ་སྐྱོར་བ་གྲོས་ཚོགས་འཐུས་མི་ལྷན་ཚོགས་བཅས་ཀྱིས་ཞུགས་མོལ་ལྷན་ཚོགས་དེ་གོ་སྒྲིག་གནང་བར་ཐུགས་རྗེ་ཆེ་ཞུས་པ་དང་སྦྲགས། ལྷན་ཚོགས་འདི་བརྒྱུད་ད་ལྟ་འཇིག་སྣང་དང་དངངས་སྐྲག་འོག་གནས་བཞིན་པའི་གཞིས་ལུས་བོད་མི་ཚོའི་དཀའ་ངལ་ལ་ཐུགས་འཚབ་དང་གདུང་སེམས་མཉམ་སྐྱེའི་རྒྱབ་སྐྱོར་ཤུགས་ཆེ་ཡོད་པའི་བརྡ་ལན་གསལ་པོ་གནང་ཡོད་པ་དང། དེང་སྐབས་རྒྱ་ནག་གཞུང་གིས་བོད་ནང་འཛམ་གླིང་ཕྱི་ཕྱོགས་ནས་འབྲེལ་བ་རྩ་བ་ནས་བྱེད་མི་བཅུག་པའི་ཁར་བོད་ནང་དུ་རྒྱ་ནག་གཞུང་གི་དམག་མི་དང་ཉེན་རྟོག་མི་སྣ་སོགས་ཀྱིས་རང་སྣང་གང་དྲན་གྱིས་དམ་བསྒྲགས་བྱེད་བཞིན་ཡོད་ཅེས་དང་ ཡང་བོད་རྒྱ་འབྲེལ་མོལ་ཐོག་གསུངས་དོན། དེ་རིང་ཚོགས་འདུའི་སྐབས་ཕྲན་རང་གི་ལས་འགན་ནི་བོད་རྒྱ་འབྲེལ་མོལ་གྱི་ད་ལྟའི་གནས་བབ་ཇི་ཡིན་སྐོར་གསལ་བཤད་ཞུ་རྒྱུ་ཡིན་ཞེས་སོགས་ཀྱི་ངོ་སྤྲོད་གནང་གྲུབ་བསྟུན། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གནད་དོན་དེ་བཞིན་འཚེ་བ་མེད་པའི་གྲོས་མོལ་གྱི་ལམ་ནས་སེལ་ཐབས་ཡོང་ཆེད་ཕྱི་ལོ་ ༡༩༨༨ ལོར་སི་ཊར་སི་སྦག་ཏུ་ཞི་བའི་དོན་ཚན་ལྔ་འདོན་གནང་མཛད་པ་དང་། དེ་རྗེས་རིམ་བཞིན་རྒྱ་ནག་དང་ལྷན་གྲོས་མོལ་བྱུང་བའི་རྒྱུད་རིམ་རྣམས་རེ་རེ་བཞིན་ངོ་སྤྲོད་ཞིབ་ཕྲ་གནང་ཡོད་པ་རེད།