རྩོམ་པ་པོ་འབྲོག་རུ་ཚུལ་ཁྲིམས་བཙོན་གྲོལ་བྱུང་འདུག

༄༅༎དེ་སྔ་རྒྱ་ནག་གཞུང་ནས་འཛིན་བཟུང་བྱས་ཤིང་། དུས་ཡུན་མི་ལོ་བཞི་དང་ཕྱེད་ཀའི་བཙོན་འཇུག་གི་ཁྲིམས་ཐག་བཅད་པའི་བོད་རྔ་བ་སྒོ་མང་དགོན་པའི་དགེ་འདུན་པ་དང་རྩོམ་པ་པོ་འབྲོག་རུ་ཚུལ་ཁྲིམས་ལགས་ད་ཆ་གློད་གྲོལ་བཏང་འདུག
དེའང་འབྲོག་རུ་ཚུལ་ཁྲིམས་ལགས་ཀྱི་གནས་ཚུལ་རྒྱུས་མངའ་ཡོད་མཁན་མཚན་ལ་བསོད་ནམས་ཞུ་བ་ཞིག་ནས་བོད་ཀྱི་བང་ཆེན་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། སྤྱི་ལོ་༢༠༠༩ ལོའི་ཟླ་༤ པའི་ནང་དུ་རྒྱ་གཞུང་གིས་འབྲོག་རུ་ཚུལ་ཁྲིམས་ལགས་ལ་རྒྱ་ནག་མེས་རྒྱལ་ལ་ངོ་རྒོལ་དང་ཏྭ་ལའི་ཁ་བྲལ་འོས་ལངས་ལ་སྐུལ་སློང་གི་རྩོམ་ཡིག་སྤེལ་བའི་ཉེས་འཛུགས་བྱས་ཏེ་། རྔ་བ་སྒོ་མང་དགོན་པའི་རང་ཤག་ནས་འཛིན་བཟུང་བཙན་ཁྲིད་བྱས་ཡོད་པ་མ་ཟད་། ད་དུང་འབྲོག་རུ་ཚུལ་ཁྲིམས་ལགས་རྔ་བ་སྒོ་མང་དགོན་དུ་སློབ་གཉེར་གནང་རིང་ཁོང་གིས་གཉེར་གནང་བའི་ཁ་བའི་ཚེ་སྲོག་ཅེས་པའི་གསར་ཤོག་དེ་ཡང་འགྲེམས་སྤེལ་བྱེད་མི་ཆོག་པའི་བཀག་བསྡོམས་བྱས་ཡོད་པ་རེད་འདུག་ལ། དེ་རྗེས་རྔ་བ་འབར་ཁམས་མི་དམངས་ཁྲིམས་ཁང་ཟེར་བས་ཁོང་ལ་ཁྱོན་དུས་ཡུན་ལོ་བཞི་དང་ཟླ་བ་དྲུག་རིང་བཙོན་བཅུག་བྱེད་རྒྱུའི་ཁྲིམས་ཆད་བཅད་ཡོད་པ་དང་། འབྲོག་རུ་ཚུལ་ཁྲིམས་ལགས་འཛིན་བཟུང་བྱས་པ་ནས་བཟུང་ད་བར་སྔ་ཕྱི་མི་ལོ་དྲུག་རིང་བཙོན་འཇུག་འོག་མནར་གཅོད་ཚད་མེད་མྱོང་དགོས་བྱུང་ཡོད་ཀྱང་། ད་རེས་ཟླ་བ་༡༢ ཚེས་༥ ཉིན་ཁོང་རྒྱ་ནག་ཟི་ཁྲོན་ཞིང་ཆེན་གྱི་ཁྲིན་ཏུའུ་བཙོན་ཁང་ཞིག་ནས་གློད་གྲོལ་བཏང་འདུག  རྩོམ་པ་པོ་གྲྭ་འབྲོག་རུ་ཚུལ་ཁྲིམས་ད་ལོ་རང་ལོ་༣༣ ཡིན་ཞིང་། ཁོང་གི་འཁྲུངས་ཡུལ་ནི་མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་། མགོ་མང་འབྲོག་རུ་སྡེ་བ་ཡིན་ཞིང་། ཁོང་གིས་མང་ར་ཀླུ་ཚང་དགོན་པ་དང་ངྷི་ཚ་དགོན། རྔ་བ་སྒོ་མང་དགོན་བཅས་སུ་ནང་ཆོས་གཙོ་བོར་གྱུར་བའི་ཐ་སྙད་རིག་གནས་ལ་བསླབ་པ་སློབ་གཉེར་ཡང་གནང་ཡོད་པ་རེད་འདུག།
གསར་འགོད་པ་ཚེ་དབང་དངོས་གྲུབ།