བོད་ནང་ཞ་ཉེའི་གཡའ་དུག་ཁྱབ་གདལ།

༄༅༎བོད་གནས་བསྐྱར་ཞིབ་དུས་དེབ་ཀྱིས་གནས་ཚུལ་སྤེལ་བར་གཞིགས་ན་ ཤིང་ཧཡེ་ཞིང་ཆེན་གྱི་སྐུ་འབུམ་རྫོང་ནང་རྒྱ་ནག་གིས་གཏེར་ཁའི་ལས་གཞི་མང་དྲག་པའི་རྐྱེན་ཀྱིས་འཐུང་ཆུའི་ནང་་ཞ་ཉེའི་གཡའ་དུག་ཤོར་བའི་དཀའ་ངལ་ཡོད་ལུགས་བོད་ནས་མིང་འདོན་མེད་པ་ཞིག་གིས་དྲྭ་རྒྱའི་ཐོག་གནས་ཚུལ་སྤེལ་ཡོད་འདུག་ དེ་བཞིན་རྒྱ་ནག་ནང་དེ་འདྲའི་དཀའ་ངལ་ཆེན་པོ་ཡོད་པའི་སྐོར་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ཟླ་བརྒྱད་པའི་ཚེས་གཅིག་ཉིན་སྙན་ཐོ་ཞིག་ཀྱང་སྤེལ་འདུག ཡང་དྲ་རྒྱའི་ནང་གནས་ཚུལ་སྤེལ་བར་གཞིགས་ན་ ཕྱི་ལོ་༢༠༠༦་ལོར་ཀན་ཧོ་ཐན་རྫོང་ནང་ ཕྲུ་གུ་བརྒྱ་ལྷག་ཙམ་ཞིག་ཞ་ཉེའི་གཡའ་དུག་གི་རྐྱེན་པས་ནད་པ་ཆགས་ཡོད་སྐོར་དང་ ཡང་དྲྭ་གནས་གཞན་ཞིག་ནང་ཕྲུ་གུ་བརྒྱ་ཙམ་གྱི་ཁྲག་ལ་བརྟག་དཔྱད་བྱེད་སྐབས་ཚང་མར་ཞ་ཉེའི་གཡའ་དུག་ཚད་གཞི་ལས་མཐོ་བ་ཡོད་ལུགས་འགྲེལ་བརྗོད་བྱས་འདུག། ས་གནས་དཔོན་རིགས་ཚོས་དཀའ་ངལ་དེ་རིགས་སེལ་ཐབས་དང་འགོག་ཐབས་བྱ་རྒྱུའི་ཚབ་ཏུ་ཚོང་པ་ཚོས་གཏེར་ཁ་བསྔོག་འདོན་ཀྱི་ལས་གཞི་རྒྱ་བསྐྱེད་ཆེད་ས་གནས་ཀྱི་ཡུལ་མི་རྣམས་བཙད་ཤེད་ཀྱིས་གནས་སྤོ་བྱེད་བཅུག་ཡོད་ལུགས་འགྲེལ་བརྗོད་བྱས་འདུག། ཡང་དྲྭ་གནས་དེ་གའི་ནང་བར་ལམ་ནས་ སྐུ་འབུམ་དགོན་པའི་ཉེ་འགྲམ་གྱི་ཁོར་ཡུག་ལ་ཉེན་ཁ་ཡོང་གི་ཡོད་མེད་་བརྩི་མེད་ཀྱིས་གཞུང་གི་དཔོན་རིགས་དང་ཚོང་ལས་ཚོས་གཏེར་ཁ་བསྔོག་འདོན་ཚད་མེད་བྱེད་བཞིན་པ་དེས་ད་ཆ་མཁའ་རླུང་བཙོག་པ་བཟོས་པ་མ་ཟད་འཐུང་ཆུའི་ནང་ཞ་ཉེའི་གཡའ་དུག་གྱི་ཉེན་ཁ་ཆེན་པོ་ཆགས་ཡོད་འདུག།  ཡང་ཟི་ལིང་ནང་ས་གནས་དཔོན་རིགས་ཚོས་བཟོ་ལས་འཛུགས་བསྐྲུན་གྱི་ས་ཁུལ་ནང་ཕྲུ་གུ་དང་ན་གཞོན་ཚོར་བརྟག་དཔྱད་བྱས་པར་ ན་གཞོན་ཆིག་སྟོང་ཙམ་ཀྱི་ཟུང་ཁྲག་ནང་ཞ་ཉེའི་གཡའ་དུག་ཚད་གཞི་ལས་བརྒལ་་ཏེ་ཁོང་ཚོའི་འཕྲོད་བསྟེན་ལ་ཉེན་ཁ་ཡོད་ལུགས་འགྲེལ་བརྗོད་བྱས་འདུག། དེ་བཞིན་མིང་འདོན་གནང་འདོད་མེད་པ་ཞིག་གིས་དྲ་རྒྱའི་ཟིན་བྲིས་དོ་རའི་ནང་དུ་ཀན་ཧོ་ཐན་བཟོ་ལས་རྒྱ་བསྐྱེད་གཏོང་ཆེད་ཁུལ་དེའི་ཞིང་པ་ཁྲི་གསུམ་ལྷག་ཙམ་ས་ཁུལ་གཞན་དུ་གཞིས་སྤོས་མི་བྱེད་ཀ་མེད་ཆགས་ཡོད་ལུགས་གནས་ཚུལ་སྤེལ་བཞག།