བདུན་ཕྲག་གཅིག་གི་ལས་འགུལ་མཇུག་སྒྲིལ།

༄༅།    །འདི་ག་རླུང་འཕྲིན་ཁང་ལ་གནས་ཚུལ་འབྱོར་བ་ལྟར་ན། དེ་རིང་ཕྱི་ཚེས་༢ཉིན་ ཨོས་ཊྲེ་ལི་ཡའི་གྲོང་ཁྱེར་སིཌ་ཎིའི་ནང་ཡོད་པའི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ཡན་ལག་ལས་ཁངས་མདུན་དུ་ཡུལ་དེར་གནས་སྡོད་བོད་མི་འབྲི་རུ་བློ་བཟང་དང་མདའ་བཞིའི་ཕུན་ཚོགས། བསྟན་འཛིན་ཆོས་རྒྱལ་གསུམ་གྱིས་སྤེལ་བའི་བོད་ཕྱི་ནང་གི་བོད་མི་རང་ལུས་མེར་སྲེག་གནང་མཁན་གྱི་ཞལ་ཆེམས་བརྒྱུད་བསྒྲགས་སོགས་ཀྱི་བདུན་ཕྲག་གཅིག་རིང་གི་བོད་དོན་ལས་འགུལ་དེ་ཉིན་གཅིག་གི་ཟས་བཅད་ངོ་རྒོལ་དང་འབྲེལ་ནས་མཇུག་སྒྲིལ་ཡོད་པ་དང་། ཟླ་བ་སྔོན་མའི་ཚེས་༢༦ཉིན་ནས་བཟུང་བོད་མི་འདི་གསུམ་གྱིས་སྒེར་ངོས་ནས་བོད་ཕྱི་ནང་གི་དཔའ་བོ་དཔའ་མོའི་ཞལ་ཆེམས་བརྒྱུད་བསྒྲགས་ཞེས་པའི་བོད་དོན་ལས་འགུལ་ཞིག་སྤེལ་ཏེ། བོད་མི་རང་ལུས་མེར་སྲེག་གནང་མཁན་ཚོའི་ཞལ་ཆེམས་དང་ད་ལྟའི་བོད་ནང་གི་ཛ་དྲག་གནས་སྟངས་སོགས་དབྱིན་ཡིག་དང་རྒྱ་ཡིག་ནང་བཀོད་པའི་ཡིག་ཆ་འཁྱེར་ནས་བདུན་ཕྲག་གཅིག་རིང་ ཨོས་ཊྲེ་ལི་ཡའི་གྲོང་ཁྱེར་སིཌ་ཎི་གཙོས་ནིག་ཁ་སིལ་དང་། སྦི་ལོ་མོང་ཁྲན་སོགས་ས་གནས་བཞི་བཅུ་ཙམ་ལ་ཕྱིན་ནས་ཡིག་ཆ་ཆིག་ཁྲི་ཙམ་འགྲེམ་སྤེལ་དང་ས་གནས་མང་ཚོགས་ལ་བོད་ཀྱི་གནས་སྟངས་འགྲེལ་བརྗོད་གནང་ཡོད་པ་རེད།།