བཀའ་ཁྲི་ཟམ་གདོང་རིན་པོ་ཆེར་བཀྲིན་རྗེས་དྲན།

༄༅༎དེ་རིང་བཞུགས་སྒར་རྡ་རམ་ས་ལར་བཀའ་ཤག་ཚོགས་ཁང་དུ་བདེ་སྐྱིད་གླིང་ས་གནས་མི་མང་གི་སྐུ་ཚབ་མི་སྣ་བདུན་གྱིས་བཀའ་ཁྲི་ཟམ་གདོང་རིན་པོ་ཆེ་མཆོག་ལ་བཀྲིན་རྗེས་དྲན་ཞུ་སླད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཞལ་ཐང་དང༌། དངུལ་གྱི་མཆོད་ཀོང་ཞིག་གཟེངས་བསྟོད་ཆེད་ཕུལ་འདུག། སྐབས་དེར་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ད་བར་ཕྱག་ལས་གནང་བ་རྣམས་མང་ཚོགས་ཀྱི་རྒྱབ་སྐྱོར་ལ་བརྟེན་ནས་བྱུང་བ་ཞིག་ཡིན་པ་དང༌། མ་འོངས་པར་ཡང་དམངས་གཙོའི་སྤྱི་ཚོགས་ནང་གནད་དོན་གང་འདྲ་ཞིག་ཡིན་རུང༌། གཙོ་བོ་མི་མང་གིས་ཐག་གཅོད་བྱེད་དགོས་པ་ཞིག་ཡིན་ཙང་ ད་ལྟ་བཞིན་སྤྱིར་བཏང་མི་མང་ཚོའི་ཐུགས་འདོད་ཐམས་ཅད་འགྲུབ་དགོས་རྒྱུ་དང༌། དེའི་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་དང་མི་འགལ་་བ་གནང་ཐུབ་ན་དེ་ལས་ལྷག་པ་གང་ཡང་དགོས་ཀྱི་མ་རེད་དགོངས་ཀྱི་འདུག་ཅེས་གསུངས་ཏེ། བདེ་སྐྱིད་གླིང་མང་ཚོགས་ལ་ཐུགས་རྗེ་ཆེ་ཞེས་གསུང་བཞག།

བདེ་སྐྱིད་གླིང་ས་གནས་འཐུས་ཚོགས་དང༌། བོད་རང་དབང་བདེན་པའི་ལས་འགུལ། སྤྱི་མི་བརྒྱ་དཔོན། གཞོན་ནུ། བུད་མེད། བོད་རྒྱལ་ཡོངས་དམངས་གཙོ་ཚོགས་པ། ཆོལ་ཁ་གསུམ། མངའ་རིས་སྤྱི་མཐུན་ཚོགས་པ། ལྷོ་ཁ་སྤྱི་ཚོགས་བདེ་དོན། དང་ཟུར་སྐྱིད་སྡུག་སོགས་ཚོགས་པ་སྐྱིད་སྡུག་ཁག་༡༤ཐུན་མོང་གི་ཐོག་ནས་་ཟམ་གདོང་རིན་པོ་ཆེ་མཆོག་གིས་བཀའ་ཁྲིའི་མཚན་འཁུར་བཞེས་པ་ཙམ་མ་ཟད། བཙན་བྱོལ་དུ་ཕེབས་པ་ནས་བཟུང་ད་བར་ བོད་མི་རིགས་དང་རྩ་དོན་ཆེད་གཟེངས་སུ་ཐོན་པའི་ཕྱག་ལས་གྲུབ་འབྲས་ལྡན་པ་མང་པོ་གནང་ཡོད་པར་ངོས་འཛིན་དང་འབྲེལ། རིན་པོ་ཆེ་མཆོག་ལ་ཐུགས་རྗེ་ལེགས་འབུལ་དང་བཀའ་དྲིན་རྗེས་དྲན་ཞུ་སླད་ གོང་ཞུས་ཆེ་བསྟོད་གཟེངས་རྟགས་དེ་ཕུལ་ཡོད་པ་རེད།