༧གོང་ས་མཆོག་ཉི་ཧོང་དུ་ཆིབས་བསྒྱུར།

༄༅།    །མཛད་འཆར་སྔོན་སྒྲིག་གནང་བ་གཞིར་བཟུང་བྱས་ན།    ཕྱི་ཚེས་༤ཉིན་གྱི་སྔ་དྲོ་ཉི་ཧོང་ཡོ་ཀོ་ཧ་མ་ཁུལ་དུ་ཆིབས་བསྒྱུར་གྱིས་དེ་གའི་པི་སི་ཕེ་ཚོགས་ཁང་དུ་དད་ལྡན་ཆོས་ཞུ་བ་རྣམས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་གསུང་ཆོས་བཀའ་དྲིན་བསྩལ་རྒྱུ་དང་།  ཉིན་རྒྱབ་ཏུ་མི་མང་ལ་རྐྱེན་ངན་བྱུང་སྐབས་བཟང་ཕྱོགས་ཀྱི་རེ་བ་ཞེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ་ཡིན་པ་རེད།
ཕྱི་ཚེས་༦ནས་༧བར་གཉིས་རིང་༧གོང་ས་༧སྐྱབས་མགོན་ཆེན་པོ་མཆོག་གིས་ཉི་ཧོང་གི་རྒྱལ་ས་ཊོཀ་ཡོ་རུ་དེ་གའི་ཚན་རིག་པ་དང་། དགེ་འདུན་པ།  དེ་བཞིན་ནང་པའི་མཁས་དབང་བཅས་དང་ལྷན་ནང་ཆོས་ཕྱི་ནང་གི་ཚན་རིག་ཅེས་པའི་བརྗོད་གཞིའི་ཐོག་གི་བགྲོ་གླེང་ནང་ལྷན་ཞུགས་མཛད་རྒྱུའི་ཁར།  ཕྱི་ཚེས་༡༡ཉིན་ཉི་ཧོང་ཨོ་ཀི་ན་ཝར་དེ་གའི་བྷུ་ཊྷོ་ཀན་ཚོགས་ཁང་དུ་བཀའ་ངལ་ལས་འགྲོལ་བའི་ནུས་ཤུགས་དང་།  མ་འོངས་པའི་མི་རབས་གཞོན་སྐྱེས་ཚོར་ལམ་སྟོན་བཀའ་སློབ་བསྩལ་རྒྱུ།  ཕྱི་ཚེས་༡༣ཉིན་ཉི་ཧོང་གི་རྒྱལ་ས་ཊོཀ་ཡོ་ནང་༧གོང་ས་༧སྐྱབས་མགོན་ཆེན་པོ་མཆོག་གིས་མི་མང་གི་ལས་གཞི་སེམས་ཁམས་ཚན་རིག་སོགས་ཀྱི་བྱེད་སྒོ་ཁག་ནང་ལྷན་ཞུགས་མཛད་རྒྱུ་ཡིན་པ་རེད་འདུག།