བཟང་སྤྱོད་བརྒྱུད་གོ་ལའི་གནས་སྟངས་བཟང་དུ་གཏོང་ཐབས།

༄༅།    །ཨིན་ཇིའི་རྒྱལ་ས་ལོན་ཌན་དུ་རྟེན་གཞི་བྱེད་པའི་ལེ་གྷ་ཊམ་(Legatum Institute) ལྟེ་གནས་ཁང་གི་ཚོགས་ཁང་དུ་གོ་སྒྲིག་ཞུས་པའི་ལྷན་ཚོགས་དེར། དཔལ་འབྱོར་དང་། ཆབ་སྲིད། ཁྲིམས། གསར་འགོད་པ་སོགས་ལས་རིགས་འདྲ་མིན་གྱི་ཆེད་ལས་པ་བཅས་མཉམ་ཞུགས་གནང་ཡོད་འདུག ༧གོང་ས་མཆོག་གི་གསུང་བཤད་ནང་། ང་ཚོ་ཚང་མ་འགྲོ་བ་མིའི་རིགས་གཅིག་མཚུངས་ཆགས་ཡོད། ང་ཚོར་དེང་སྐབས་འཕྲད་བཞིན་པའི་འཛམས་གླིང་གི་དཀའ་ངལ་ཉུང་དུ་གཏོང་དགོས་པ་དེ་དག་འཛམ་གླིང་ནང་གི་འགྲོ་བ་མི་རིགས་ཚང་མར་གཅིག་མཚུངས་སུ་འཕྲད་བཞིན་པའི་དཀའ་ངལ་ཞིག་ཡིན་པར་བརྟེན། ང་ཚོས་ཕན་ཚུན་གོ་རྟོགས་སྤེལ་ནས་དཀའ་ངལ་དེ་དག་སེལ་ཐབས་བྱེད་དགོས་ལུགས་གསུངས་གནང་བ་དང་སྦྲགས། ངོས་རང་ད་ལྟ་ལོ་ ༧༧ ལ་བསླེབས་ཡོད། ངོས་རང་ལོ་ ༡༦ སྐབས་རང་དབང་བརླགས་སོང། དེ་ནས་རང་ལོ་ ༢༤ སོན་སྐབས་ལུང་པ་ཤོར་བ་རེད། ངོས་རང་སྐྱེས་ནས་མི་རིང་བར་རྒྱ་ནག་དང་ཉི་ཧོང་དབར་དམག་འཐབ་བྱུང་བ་དང། དམག་ཆེན་གཉིས་པའི་དུས་སྐབས་ཁེལ་ཏེ། ཀོ་རི་ཡ་དང་ཝདྣམ་དམག་འཁྲུག རྒྱ་གར་དང་པ་ཀི་སི་ཐན་དུམ་བུར་བགོས་པའི་རྩོད་རྙོག་སོགས་ངོས་ཀྱི་མི་ཚེའི་ནང་དྲག་སྤྱོད་ཤུགས་ཆེ་དངོས་སུ་མཐོང་ཡོད། དུས་རབས་༢༠ནང་ཚན་རིག་དང་འཕྲུལ་རིག་ཐོག་ཡར་རྒྱས་ཧ་ལས་པ་བྱུང་ཡོད་ནའང། དུས་རབས་དེ་མི་གསོད་ཁྲག་སྦྱོར་གྱི་དུས་རབས་ཤིག་ཀྱང་ཆགས་ཡོད། དེར་བརྟེན་དུས་རབས་༢༡ དེ་བཞིན་མི་འདྲ་བ་ཞིག་དགོས་ཚེ།    དཀའ་ངལ་སེལ་རྒྱུའི་ཐབས་ལམ་ལ་འགྱུར་བ་བཏང་སྟེ་བཟང་སྤྱོད་ཀྱི་ཐབས་ལམ་ལ་གཞི་བཅོལ་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་བཀའ་གནང་འདུག

༧གོང་ས་མཆོག་ནས་ད་རེས་ཨ་རི་དང་དབྱིན་ཡུལ་བཅས་སུ་བསྐྱངས་པའི་བདུན་ཕྲག་གཉིས་ཙམ་གྱི་མཛད་འཆར་གྲུབ་ནས་ད་རང་སྔ་དྲོ་བཞུགས་སྒར་དྷ་རམ་ས་ལར་ཞབས་སོར་བདེ་བར་འཁོད་འདུག།