༧གོང་ས་མཆོག་ཀུམ་བྷ་མེ་ལཱ་ཧིན་རྡུའི་དུས་ཆེན་ཐོག་ཕེབས་གནང་རྒྱུ།

༧གོང་ས་མཆོག་ཧིན་རྡུའི་ཆོས་ལུགས་ཀྱི་དུས་ཆེན་ཆེ་གྲས་Nasik Kumbh melaཞེས་པའི་ཐོག་ཆིབས་བསྒྱུར་བསྐྱང་གཏན་འཁེལ་འདུག      དེའི་སྐོར་ང་ཚོའི་བཞུགས་སྒར་དྷ་རམ་ས་ལའི་གསར་འགོད་པ་བློ་བྷེ་ལགས་ཀྱིས་བཏང་བའི་གནས་ཚུལ་ལ་གསན་རོགས་གནང་།

རྒྱ་གར་གྱི་གྲོང་ཁྱེར་Allahabad དང་Ujjain, Haridwarདེ་བཞིན་Nasik བཅས་སུ་ལོ་གསུམ་རེའི་མཚམས་Kumbh Melaཞེས་པའི་ཧིན་རྡུའི་ཆོས་ལུགས་ཀྱི་དུས་ཆེན་ལོ་ལྟར་འཚོགས་བཞིན་པ་ལྟར། འདི་ལོའི་དུས་ཆེན་དེ་བཞིན་ཕྱི་ཟླ་༨ཚེས་༡༤ནས་འགོ་འཛུགས་ཀྱིས་ཕྱི་ཟླ་༩ཟླ་དཀྱིལ་བར་ཚོགས་རྒྱུ་ཡིན་པ་དང་། དུས་ཆེན་འདིའི་ཐོག་ཧིན་རྡུའི་བླ་ཆེན་སོགས་ཆོས་ཕྱོགས་ཀྱི་མི་སྣ་སྟོང་ཕྲག་མང་པོ་དང་། རྒྱ་གར་བ་དད་ལྡན་མང་ཚོགས་འབུམ་ཕྲག་བརྒལ་བ་བཅར་གྱི་ཡོད་པ་མ་ཟད། རྒྱ་གར་དབུས་གཞུང་དང་མངའ་སྡེའི་དཔོན་རིགས་མཐོ་གྲས་མང་པོ་ཞིག་ཀྱང་ཕེབས་སྲོལ་ཡོད་འདུག

ཐེངས་འདིའི་Nasikགྲོང་ཁྱེར་ནང་ཚོགས་བཞིན་པའི་Kumbh Melaཞེས་པའི་ཧིན་རྡུའི་ཆོས་ལུགས་ཀྱི་དུས་ཆེན་གྱི་གོ་སྒྲིག་ཚོགས་ཆུང་ནས་༧གོང་ས་སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་པ་བཞིན་༧གོང་ས་མཆོག་གིས་བཀའ་བཞེས་བཟང་པོ་བསྩལ་ནས་ཕྱི་ཟླ་༨ཚེས་༣༡ཉིན་དུས་ཆེན་ཐོག་ཆིབས་བསྒྱུར་བསྐྱང་ནས་ཧིན་རྡུའི་བླ་ཆེན་ཁག་དང་། མཁས་དབང་ཁག་ཅིག་དང་ལྷན་དུ་མཇལ་འཕྲད་ཀྱི་མཛད་འཆར་ཡོད་ལུགས་དེ་རིང་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་འདུག

གསར་འགོད་པ་ཚེ་དབང་དངོས་གྲུབ།