༧གོང་ས་མཆོག་གིས་མི་མང་གསུང་ཆོས་དང་བཀའ་སློབ་གནང་རྒྱུ།

༧གོང་ས་མཆོག་གིས་ཨ་རིའི་མེ་ནི་སོ་ཀྲ་ནས་སྨན་བཅོས་རྗེས་མི་མང་ལ་ཐོག་དང་པོར་གསུངས་ཆོས་དང་བཀའ་སློབ་གནང་གཏན་འཁེལ་བ།
དེ་ཡང་གནས་ཚུལ་ལྟར་ན། བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དེང་སྐབས་ཨ་རིའི་མེ་ནི་སོ་ཀྲ་མངའ་སྡེའི་མེ་ཡོ་སྨན་ཁང་ནང་སྨན་བཅོས་ཕུལ་བཞིན་ཡོད་ཀྱང་། མེ་ནི་སོ་ཀྲ་བོད་མིའི་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་པ་བཞིན་༧མགོན་པོ་གང་ཉིད་ནས་ཐུགས་བརྩེ་བ་ཆེན་པོའི་སྒོ་ནས་འདི་ཟླའི་ཚེས་༢༡་སྟེ་གཟའ་ཉི་མའི་སྔ་དྲོའི་ཕྱག་ཚོད་དགུ་པ་ནས་ཕྱག་ཚོད་༡༡་དང་ཕྱེད་ཀ་བར་(Minneapolis Conventions Center)ཞེས་པའི་ཚོགས་ཁང་ཆེན་མོའི་ནང་། དད་ལྡན་མང་ཚོགས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་གསུང་ཆོས་སྩལ་གནང་མཛད་རྒྱུ་དང་། དེ་ནས་སེམས་བསྐྱེད་ཀྱི་སྡོམ་པ་འབོག་ཚོག མང་ཚོགས་ལ་བཀའ་སློབ་བཀྲིན་ཆེ་གནང་མཛད་རྒྱུ་ཡིན་འདུག
མེ་ནི་སོ་ཀྲ་བོད་མིའི་སྤྱི་མཐུན་ཚོགས་པས་གསལ་བསྒྲགས་སྤེལ་བའི་ནང་། ༧གོང་ས་མཆོག་གིས་གསུང་ཆོས་སྩལ་གནང་མཛད་རྒྱུ་དེ་ནི་དགའ་སྟོན་རྟེན་འབྲེལ་ཞུ་རྒྱུའི་དགའ་ཚོར་ཆེ་བའི་དུས་ཆེན་ཞིག་ཡིན་པ་དང་། ༧མགོན་པོ་གང་ཉིད་ཀྱི་སྐུ་མདུན་ནས་རིན་ཐང་བྲལ་བའི་གསུང་ཆོས་ཞུ་རྒྱུའི་གོ་སྐབས་ཡིན་པ་སོགས་འཁོད་འདུག
གོང་ཞུས་གསུངས་ཆོས་དེ་ནི་༧གོང་ས་མཆོག་གིས་ཨ་རིའི་མེ་ནི་སོ་ཀྲ་ནས་སྨན་བཅོས་རྗེས་མི་མང་ལ་ཐོག་དང་པོར་གསུངས་ཆོས་དང་བཀའ་སློབ་གནང་རྒྱུ་ཡིན་པ་རེད།
གནས་ཚུལ་ལྟར་ན། ༧གོང་ས་མཆོག་འདི་ལོའི་ཕྱི་ཟླ་༣་ཚེས་༩་ཉིན་ཨ་རིའི་གྲོང་ཁྱེར་Madisonནང་གི་University of Wisconsinགཙུག་ལག་སློབ་གྲ་ཆེན་མོའི་ནང་སེམས་དང་སྲོག་གི་བགྲོ་གླེང་ཚོགས་འདུར་དབུ་བཞུགས་མཛད་ཀྱི་ཡོད་པ་མ་ཟད། འདི་ལོའི་ཕྱི་ཟླ་དྲུག་པའི་ཚེས་༢༠་དང་༢༡་ཉིན་གཉིས་རིང་ཨ་རིའི་Utah མངའ་སྡེའི་རྒྱལ་ས་Salt Lake གྲོང་ཁྱེར་ནང་ཆིབས་བསྒྱུར་བཀྲིན་བསྐྱངས་གནང་གིས་University of Utah གཙུག་ལག་སློབ་གྲ་ཆེན་མོའི་ནང་མང་ཚོགས་ལ་བཀའ་སློབ་སྩལ་གནང་རྒྱུ་དང་། ས་གནས་བོད་མི་རྣམས་ལ་དམིགས་བསལ་མཇལ་ཁ་དང་བཀའ་སློབ་སྩལ་གནང་རྒྱུ། Utah་མངའ་སྡེའི་སྤྱི་ཁྱབ་Gary Herbertམཆོག་དང་། Salt Lakeགྲོང་སྡེའི་སྤྱི་ཁྱབ་ལྕམ་Jackieདབུས་པའི་ཆེས་མཐོའི་མི་སྣ་ཁག་གིས་ཆེ་བསྟོད་ཀྱི་གུས་བསུའི་སྣེ་ལེན་ཞུ་གཏན་འཁེལ་འདུག

གསར་འགོད་པ་སེང་གེ་རི་བསོད་མས་ལྷ་མོ།