༧གོང་ས་མཆོག་གིས་རྒྱ་གར་གྱི་ནང་པ་ཚོར་གསུང་ཆོས་གནང་བ།

༧གོང་ས་མཆོག་གིས་རྒྱ་གར་གྱི་ནང་བ་ཚོར་གསུང་ཆོས་གནང་སྐབས། ༢༠༡༦།༦།༧

རྒྱ་གར་ནང་ཆོས་དད་པ་ཚོས་རྨོངས་དད་ཙམ་མིན་པར་རྒྱུ་མཚན་གྱི་ཐོག་ནས་དོན་གཉེར་བྱེད་བཞིན་པར་དམིགས་བསལ་དགའ་བསུ་ཡོད་པ་གསུངས་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས། དེ་རིང་ཕྱི་ཟླ་༦་ཚེས་༧་ནས་དབུ་བཙུགས་ཀྱིས་ཉིན་གྲངས་གསུམ་རིང་། རྒྱ་གར་གྱི་ནང་པའི་ཚོགས་པ་ན་ལེནྜ་ཤིཀྴའམ་ན་ལེནྜེའི་སློབ་ཅེས་པ་དེས་ཇི་ལྟར་གསོལ་འདེབས་ཞུས་དོན་ལྟར། སློབ་དཔོན་ཞི་བ་ལྷས་མཛད་པའི་སྤྱོད་འཇུག་ཆེན་མོ་ལེའུ་བཞི་པའི་སྒོ་ནས་ཆོས་འབྲེལ་གསུང་ཆོས་གནང་རྒྱུ་ཡིན་པ་རེད། ཆོས་ཞུ་བའི་ཁོངས་སུ་རྒྱ་གར་ནང་པའི་ཆོས་ཚོགས་དེའི་ཚོགས་མི་ཆིག་སྟོང་ཉིས་བརྒྱ་ཙམ་ཆེད་བཅར་ཞུས་འདུག།
༧གོང་ས་༧སྐྱབས་མགོན་ཆེན་པོ་མཆོག་གིས། རྒྱ་གར་ནི་ཆོས་ལུགས་འདྲ་མིན་མཐུན་སྒྲིལ་དང་ཞི་བདེའི་ནང་གནས་པའི་ཡུལ་གྲུ་ཞིག་ཡིན་ལ། ལྟ་གྲུབ་ཀྱི་ཕྱུག་པའི་གནས་ཤིག་ཀྱང་ཡིན་པ་རེད་ཅེས་དང་། རྒྱ་གར་གྱི་ཆོས་ལུགས་མཐུན་ལམ་དང་ཡ་རབས་སྤྱོད་བཟང་གི་རིན་ཐང་ཁག་ནི་འཛམ་གླིང་ཁྱོན་ཡོངས་ཀྱི་ངོས་ནས་དཔེ་བླངས་འོས་པ་ཞིག་ཡོད་པ་བཀའ་གནང་འདུག།
ཡང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་གར་ནི་ནང་པ་དང་། གཅེར་བུ་བ། ཧིན་རྡུ་ཆོས་ལུགས་སོགས་ཀྱི་འབྱུང་ཡུལ་ཡིན་པ་བཀའ་གནང་ཞིང་། ཆོས་ལུགས་རང་སོ་སོར་ཐོུང་མ་ཡིན་པའི་ཁྱད་ཆོས་ཡོད་པ་བཀའ་གནང་པ་སྦྲགས། ནང་ཆོས་ཀྱི་ཁྱད་ཆོས་ནི་ཐོག་མར་སངས་རྒྱས་ཀྱིས་བདེན་པ་བཞིའི་ཆོས་འཁོར་བསྐོར་བའི་སྐབས་ལས་རྒྱུ་འབྲས་སྐོར་གཙོ་བོ་གསུངས་པ་དེ་དང་། བདག་མེད་པའི་ལྟ་གྲུབ་ཞལ་གྱིས་བཞེས་པ་དེ་གཉིས་ཡིན་པའི་སྐོར་བཀའ་གནང་འདུག།  དེང་སྐབས་རྒྱ་གར་ནང་ནང་ཆོས་ལ་དོན་གཉེར་བྱ་མཁན་ཇེ་མང་དུ་འགྲོ་བཞིན་པ་དང་། ལྷག་པར་དུ་རྨོངས་དད་ཙམ་མིན་པར་རྒྱུ་མཚན་གྱི་ཐོག་ནས་དོན་གཉེར་བྱེད་བཞིན་པར་དམིགས་བསལ་དགའ་བསུ་ཡོད་ཅེས་བཀའ་གནང་འདུག།     

གསར་འགོད་པ་སྤྱི་ཁྱབ་རྩོམ་སྒྲིག་པ་སྐལ་ལྡན་བློ་གྲོས།