ཆོས་དང་མ་འབྲེལ་བའི་ཡ་རབས་སྤྱོད་བཟང་གལ་གནད་ཆེ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། འཛམ་གླིང་ཐོག་ཞི་བདེ་དང་བྱམས་བརྩེ་གོང་འཕེལ་གཏོང་རྒྱུར་ཆོས་དང་མ་འབྲེལ་བའི་ཡ་རབས་སྤྱོད་བཟང་འདི་གལ་གནད་ཤིན་ཏུ་ཆེ་བ་ཡིན་པའི་སྐོར་བཙན་བྱོལ་བོད་མིའི་གཏན་ཉིན་སློབ་གྲྭ་ཁག་གི་དགེ་རྒན་རྣམས་ལ་བཀའ་སློབ་ཆེད་གནང་མཛད་འདུག
དེ་རིང་ཚེས་༨ཉིན་བཞུགས་སྒར་དུ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཇི་ལྟར་གསོལ་འདེབས་ཞུས་པ་བཞིན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཕོ་བྲང་མཇལ་འཕྲད་ཁང་དུ། བཙན་བྱོལ་བོད་མིའི་གཏན་ཉིན་སློབ་གྲྭ་ཁག་གི་དགེ་རྒན་༣༠༠་སྐོར་ཞིག་ལ་མཇལ་ཁ་སྩལ་ཡོད་པ་རེད། མཇལ་ཁའི་སྐབས་༧གོང་ས་མཆོག་གིས་བཀའ་སློབ་ཕེབས་དོན་དུ། ཆོས་དང་མ་འབྲེལ་བའི་སྤྱོད་བཟང་གི་བྱ་ལས་རྒྱ་གང་ཆེ་ཁྱབ་སྤེལ་སླད་སློབ་གྲྭའི་ནང་། ནང་ཆོས་གཞི་ལ་བཞག་པའི་སེམས་ཁམས་རིག་པ་དང་ཚད་མ་རིག་པ་སློབ་ཁྲིད་བྱ་སྐབས་དེ་དག་ནང་ཆོས་ཀྱི་ལྟ་གྲུབ་ཀྱི་ངོ་བོ་ཐོག་ནས་མ་ཡིན་པར་ཤེས་ཡོན་གྱི་སྡེ་ཚན་ཁྱབ་ཁོངས་ནས་སློབ་ཁྲིད་བྱ་དགོས་པ་ཞིག་ཡིན་པ་སྐུལ་མ་གནང་འདུག
ལྷག་པར་དུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། བྱམས་བརྩེ་ལྡན་པའི་མ་འོངས་སྤྱི་ཚོགས་ཤིག་གསོ་སྐྱོང་བྱེད་པ་ལ་དགེ་རྒན་ཚོར་འགན་འཁྲི་ཆེན་པོ་ཡོད་པ་དང་། དགེ་རྒན་ཚོས་དེ་ལྟར་འགན་འཁུར་ལེན་ཐུབ་པ་ཞིག་དགོས་པའི་སྐོར་སྐུལ་ལྕགས་གནང་འདུག

གསར་འགོད་པ་ཨྱོན་བསྟན་འཛིན། ཕབ་བཤུས་དོན་གྲུབ་རྣམ་རྒྱལ།