༸གོང་ས་མཆོག་ནས་སྐུའི་ཡང་སྲིད་ཐད་བཀའ་བསྩལ་བ།

༄༅༎༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྐུའི་ཡང་སྲིད་ངོས་འཛིན་གནང་ཕྱོགས་ཐད་རྒྱ་ནག་གཞུང་ལ་ཐེ་བྱུས་རྩ་བ་ནས་མེད་ལུགས་བཀའ་བསྩལ་གནང་འདུག

དགུང་གྲངས་༧༦ལ་ཕེབས་རན་པའི་ཞི་བདེའི་དེད་དཔོན་༧གོང་ས་མཆོག་གིས་རེས་གཟའ་པ་སངས་ཉིན་ཨེ་པི་གསར་ལས་ཁང་གི་གསར་འགོད་པ་ ར་ཝི་ ནེསེ་ཝན་ལ་བཀའ་བསྩལ་དོན་ལྟར་ན།  རྒྱ་ནག་གུང་བྲན་ཏང་གིས་༧གོང་ས་མཆོག་མྱ་ངན་ལས་འདས་པའི་རྗེས་སུ། ཡང་སྲིད་ངོས་འཛིན་གནང་ཕྱོགས་ཐད་ཐེ་བྱུས་བྱེད་རྩིས་ཡོད་པ་དེ་ནི་ཞབས་འདྲེན་རེད་ལ།  ལར་ནས་སྐུ་ཐོག་བཅོ་ལྔ་པ་ཕེབས་པ་ཡིན་ན།  བཙན་བྱོལ་ནང་འཁྲུངས་རྒྱུ་ཡིན་པ་དང་དེ་མ་ཟད་དགོས་དབང་གཟིགས་ཚེ་མ་འདས་སྤྲུལ་སྐུ་ཡང་ངོས་འཛིན་གནང་སྲིད་པའི་སྐོར་བཀའ་བསྩལ་གནང་འདུག  རྒྱ་ནག་གིས་༧གོང་ས་མཆོག་མྱ་ངན་ལས་འདས་པའི་རྗེས་སུ་བོད་ཀྱི་འཐབ་རྩོད་རྩ་བརླག་ཏུ་འགྲོ་རྒྱུའི་རེ་བ་བཅང་གི་ཡོད་པ་དང་སྐུའི་ཡང་སྲིད་ཀྱང་། རྒྱ་ནག་གཞུང་གིས་བོད་རང་ནས་ངོས་འཛིན་བྱ་རྒྱུའི་ཐག་གཅོད་དང་སྦྲགས་༧གོང་ས་མཆོག་གིས་སྲོལ་རྒྱུན་གྱི་ལམ་ལུགས་བརྩི་མེད་གནང་གི་ཡོད་ལུགས་སྐྱོན་བརྗོད་ཀྱང་བྱེད་མུས་ཡིན་པ་རེད། 

ཡང་༧གོང་ས་མཆོག་གིས་གང་ཉིད་ཡང་སྲིད་ཕེབས་དང་མ་ཕེབས་ཀྱི་ཐག་གཅོད་གནང་རྒྱུ་རྒྱལ་དབང་སྐུ་མདུན་ཁོ་ན་མ་གཏོགས་གཞན་སུ་གཅིག་ལའང་མེད་པའི་ཁར། དེ་ནི་ཆོས་ཕྱོགས་ཀྱི་བྱ་གཞག་ཞིག་ཡིན་པས།  ཆབ་སྲིད་ཀྱི་དབང་ཆས་ར་གཟི་བའི་ཆོས་མེད་དམར་པོའི་གཞུང་གིས་ ཐག་གཅོད་བྱེད་རྒྱུའི་ཐོབ་ཐང་ག་ལ་ཡོད་ཅེས་བཀའ་ལན་གནང་འདུག། འོན་ཀྱང་རྒྱ་ནག་གཞུང་གིས་བོད་ཀྱི་འཐབ་རྩོད་༧གོང་ས་མཆོག་ཙམ་མ་ཡིན་པར་བོད་ཀྱི་ས་ཡ་དྲུག་གི་རྩ་དོན་ཡིན་པའི་དངོས་ཡོད་གནས་ཚུལ་ངོས་ལེན་བྱས་ཚེ། ༧གོང་ས་མཆོག་ཀྱང་བོད་རྒྱའི་དབར་འགྲིག་འཇགས་ཀྱི་ཁོར་ཡུག་བསྐྲུན་ཆེད་རྒྱ་ནག་ནང་ཕེབས་རྒྱུའི་དགོངས་བཞེས་གནང་མུས་ཡིན་སྐོར་བཀའ་གནང་འདུག།