༧གོང་ས་མཆོག་གི་སྐུ་པར་འགྲེམས་སྟོན།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་གོང་ས་སྐྱབས་མགོན་ཆེན་པོ་མཆོག་ཕྱི་ཟླ་༦པའི་ནང་ཨོ་སི་ཀྲོ་ལི་ཡ་(Australia)ཁུལ་དུ་ཆིབས་བསྒྱུར་གྱི་སྔོན་ཚུད་ནས་ ༸གོང་ས་མཆོག་ལ་ཆེ་བསྟོད་དང་ ༧གོང་ས་མཆོག་གི་ཆིབས་བསྒྱུར་ལ་དགའ་སྟོན་ཞུ་ཆེད་ Custom House ཞེས་ཨོ་སི་ཀྲོ་ལི་ཡའི་སི་དྲི་ནི་གྲོང་ཁྱེར་རུ་ཡོད་པའི་སྙན་གྲགས་ཅན་གྱི་འགྲེམས་སྟོན་ཁང་ནས་༸གོང་ས་སྐྱབས་མགོན་ཆེན་པོ་མཆོག་གི་སྐུ་དཔར་ཁག་ཅིག་མང་ཚོགས་ལ་འགྲེམས་སྟོན་གོ་སྒྲིག་ཞུ་རྒྱུ་ཡིན་པའི་གནས་ཚུལ་ཐོན་འདུག་༎

གོང་ས་སྐྱབས་མགོན་ཆེན་པོ་མཆོག་གི་སྐུ་དཔར་གྱི་འགྲེམས་སྟོན་དེ་བཞིན་Custom House ཞེས་པའི་འགྲེམས་སྟོན་ཁང་ནང་ ཕྱི་ཟླ་༦པའི་ཚེས་༡ནས་ཚེས་༣༡བར་ ཟླ་བ་གཅིག་རིང་འགྲེམས་སྟོན་ཞུ་རྒྱུ་དང་ འགྲེམས་སྟོན་གྱི་སྐུ་དཔར་དེ་དག་དྲེ་ལྦིདྲ་རོ་སྦཏ་(David Robert)ཞུ་བའི་དཔར་པ་སྙན་གྲགས་ཅན་གྱིས་དེ་སྔ་༢༠༠༧ལོར་ ༸གོང་ས་མཆོག་ཨོ་སི་ཀྲོ་ལི་ཡ་ཁུལ་དུ་ཆིབས་བསྒྱུར་བསྐྱངས་གནང་མཛད་སྐབས་ ༸གོང་ས་མཆོག་ལ་དམིགས་བསལ་གྱི་བཀའ་ཁྲོལ་ཞུས་པའི་ཐོག་ནས་༸གོང་ས་མཆོག་གི་གཟིམ་ཆུང་དུ་སྐུ་སྒེར་གྱི་དཔར་ལེན་ཐོག་མར་ཞུས་པ་དང་ དེ་རྗེས་ལོ་མང་རིང་༸གོང་ས་མཆོག་ལ་སྐུ་སྒེར་གྱི་དཔར་ལེན་བསྟུད་མར་ཞུས་པའི་ཁོང་ནས་དཔར་རིགས་འདེམས་སྒྲུག་ཞུས་འདུག་༎