རྒྱལ་སྤྱིའི་ཧིན་རྡུ་ཆོས་ལུཊ་ཀྱི་ལྷན་ཚོཊ་སུ་དབུ་བཞུཊ་གནང་རྒྱུ།

༧གོང་ས་མཆོག་རྒྱལ་སྤྱིའི་ཧིན་རྡུ་ཆོས་ལུཊ་ལྷན་ཚོགས་སུ་ཆིབས་བསྒྱུར་བསྐྱངས་རྒྱུ་སོགས་ལྡི་ལིར་ཉིན་དྲུག་གི་མཛད་འཆར་ཆེད་ཕེབས་འདུག
དེ་ཡང་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་དོན། ༢༠༡༤་ལོའི་ཟླ་༡༡་ཚེས་༡༩་རེས་གཟའ་ལྷག་པའི་ཉིན་༧གོང་ས་སྐྱབས་མགོན་ཆེན་པོ་མཆོག་བཞུགས་སྒར་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་ཏེ་ལྡི་ལིའི་ནང་ཉིན་གྲངས་དྲུག་རིང་གི་མཛད་འཕྲིན་རྒྱ་ཆེར་བསྐྱང་རྒྱུ་ཡིན་འདུག་ཅིང་། མཛད་འཕྲིན་གྱི་ཐོག་མར། ཕྱི་ཚེས་༢༠་ཉིན་༧གོང་ས་མཆོག་གིས་རྒྱ་གར་ནང་སྙན་གྲགས་ཆེ་བའི་ཇྭ་ཧར་ལའ་ནེ་ཧ་རུ་གཙུག་ལག་སློབ་ཁང་དུ་རྒྱ་གར་གྱི་སྲིད་བློན་དང་པོ་པཎྜི་ཏ་ནེ་རུའི་རྗེས་དྲན་གསུང་བཤད་ལས་རིམ་ཐེངས་༡༡་པའི་ཐོག་མིིའི་ཐབས་ལམ་འོག་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུ་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། ཕྱི་ཚེས་༢༡་ཉིན་འཛམ་གླིང་ཧིན་རྡུའི་ཐེབས་རྩ་ཁང་ཞེས་པས་གོ་བསྒྲིགས་འོག་རྒྱལ་ཁབ་༡༥༠་ནང་གནས་པའི་ཧིན་རྡུའི་ཆོས་ལུགས་ཀྱི་སྐུ་ཚབ་ཚང་འཛོམས་ཐོག་རྒྱལ་སྤྱིའི་ཧིན་རྡུའི་ཆོས་ལུགས་ལྷན་ཚོགས་ཀྱི་ཚོགས་ཆེན་གྱི་དབུ་འབྱེད་མཛད་སྒོར་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱང་རྒྱུ་ཡིན་འདུག སྐབས་དེར་ཆོས་ལུགས་ཀྱི་དབུ་ཁྲིད་ཙམ་མ་ཟད། རྒྱ་གར་གྱི་ཆབ་སྲིད་མི་སྣ་སྙན་གྲགས་ཆེ་བ་དཔེར་ན། བྷི་ཇི་པི་ཆབ་སྲིད་ཚོགས་པའི་དབུ་ཁྲིད་ཨ་མིཏ་ཤ་མཆོག་དང་། ནི་ཏིན་གཏྐ་རི་མཆོག ལྕམ་སི་མི་རི་ཏི་ཨི་ར་ནི་མཆོག ནིར་མ་ལ་སི་ཏ་ར་མན་མཆོག་བཅས་ཀྱང་ཆེད་ཕེབས་གནང་རྒྱུ་ཡིན་འདུག ཕྱོགས་མཚུངས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་གདན་ཞུ་ཕུལ་ཡོད་ཀྱང་ལས་རིམ་སྔོན་སོང་ལྟར་ཕེབས་ཁོམ་མེད་རྐྱེན་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་སྲིད་ཚབ་ཏུ་ཆེད་བཅར་གནང་ཡོད་འདུག ཕྱི་ཚེས་༢༢་ཉིན་སྔ་དྲོ་༧གོང་ས་མཆོག་གིས་རྒྱལ་ཡོངས་སློབ་གྲ་ཡར་རྒྱས་ཞེས་སློབ་གྲ་མང་པོ་འདུས་པའི་ཚོགས་པ་དེས་ལོ་གཉིས་གོང་རོལ་ནས་༧གོང་ས་མཆོག་ལ་གསོལ་འདེབས་ཞུས་ཟིན་པ་བཞིན་སློབ་གྲ་ཁག་༢༠༠་ཙམ་ནས་དགེ་ལས་སློབ་ཕྲུག་སུམ་སྟོང་བརྒལ་བར་བཀའ་སློབ་སྩལ་རྒྱུ་དང་། གཞན་མཛད་འཕྲིན་འགའ་ཞིག་བསྐྱང་རྒྱུ་ཡོད་པ་དང་། ཕྱི་ཚེས་༢༤་ཉིན་༧གོང་ས་མཆོག་ལོ་ལྟར་ཨ་རི་དང་རྒྱ་གར་གང་རུང་ནང་སྐུའི་འཕྲོད་བཞེས་བརྟག་དཔྱད་མཛད་ཀྱི་ཡོད་པ་ལྟར་ཐེངས་འདིར་རྒྱ་གར་སྨན་ཁང་ཞིག་ཏུ་སྐུའི་འཕྲོད་བཞེས་སྨན་པས་བརྟག་དཔྱད་ཞུ་རྒྱུ་དང་། དེ་རྗེས་བཞུགས་སྒར་དུ་ཆིབས་བསྒྱུར་བསྐྱང་རྒྱུ་ཡིན་འདུག

གསར་འགོད་པ་འཇམ་དཔལ་ཕུན་ཚོགས།