༧གོང་ས་མཆོག་གིས་དྲུག་བཞིའི་གསུངས་འཕྲིན་བསྩལ་བ།

༧གོང་ས་མཆོག་གིས་དྲུག་བཞིའི་དོན་རྐྱེན་ཐད་གསུངས་འཕྲིན་བསྩལ་བ།

༧གོང་ས་མཆོག་གིས་དྲུག་བཞིའི་དོན་རྐྱེན་སྐབས་འདས་གྲོངས་སུ་འགྱུར་བ་རྣམས་ལ་ཐུགས་སྨོན་དང་རྒྱ་ནག་གཞུང་གིས་དམངས་གཙོ་དང་ལེན་ཞུ་དགོས་པ་གསུངས་འདུག
དེ་ཡང་སྤྱི་ལོ་༡༩༨༩ལོར་རྒྱ་ནག་གི་རྒྱལ་ས་པེ་ཅིན་གྱི་གནམ་སྡེ་སྒོ་མོ་ཆེའི་ཐང་ཆེན་དུ། སློབ་ཕྲུག་གིས་སྣེ་ཁྲིད་དེ་མི་མང་ཁྲི་ཚོ་མང་པོས་དམངས་གཙོའི་གྱེན་ལངས་བྱས་བའི་ཐོག་རྒྱ་ནག་གཞུང་གིས་དྲག་གནོན་བྱས་བའི་དྲུག་བཞིའི་དོན་རྐྱེན་བྱུང་ནས་ད་བར་མི་ལོ་༢༥འཁོར་བའི་སྐབས། ༧གོང་ས་སྐྱབས་མགོན་ཆེན་པོ་མཆོག་གིས་རྒྱ་རིགས་རྣམས་ལ་དུས་དྲན་དང་འབྲེལ་བའི་གདུང་སེམས་མཉམ་སྐྱེའི་ཐུགས་གསོའི་གསུང་འཕྲིན་ཞིག་སྩལ་གནང་ཡོད་པའི་ནང་། གོང་ས་མཆོག་གིས་རྒྱ་རིགས་གཅེན་གཅུང་རྣམས་ཀྱིས་དུས་དྲན་སྲུང་བརྩི་ཞུ་བཞིན་པའི་སྐབས་དང་བསྟུན། ངོས་ཀྱིས་དྲུག་བཞིའི་དོན་རྐྱེན་འོག་རང་དབང་དང་། དམངས་གཙོ་འགྲོ་བ་མིའི་ཐོབ་ཐང་ཆེད་ཚེ་སྲོག་ཤོར་བ་རྣམས་ལ་སྨོམ་ལམ་རྒྱག་རྒྱུ་ཡིན། རིན་ཐང་དེ་དག་ནི་རང་དབང་དང་ནུས་པ་ལྡན་པའི་སྤྱི་ཚོགས་ཤིག་བསྐྲུན་རྒྱུའི་རྨང་གཞི་ཆགས་ཡོད་པ་མ་ཟད་ སྤྱི་ཚོགས་ནང་དོན་དམ་གྱི་ཞི་བདེ་བརྟན་ལྷིང་ཡོང་རྒྱུའི་རྐྱེན་རྩ་གཙོ་བོ་ཞིག་ཀྱང་ཆགས་ཡོད། རྒྱ་ནག་གོ་ལའི་དཔལ་འབྱོར་ལམ་ལུགས་ནང་ཚུད་རྒྱུའི་འབད་བརྩོན་བྱས་པ་དེར་གྲུབ་འབྲས་ཧ་ཅང་ཡག་པོ་ཐོན་ཡོད་ཀྱང་། ད་ཆ་འཛམ་གླིང་སྤྱི་ཡོངས་ཀྱི་མང་གཙོའི་ལམ་ལུགས་ཐོག་རྒྱ་ནག་བསྐྱོད་ཐུབ་ཆེད་སྐུལ་དེད་གཏོང་རྒྱུ་དེ་གལ་ཆེན་པོ་ཡིན་པར་ངོས་ཀྱིས་ཡིད་ཆེས་བྱེད་བཞིན་ཡོད། དེ་ལྟར་བྱུང་ཚེ་རྒྱ་ནག་ལ་འཛམ་གླིང་གིས་ཡིད་ཆེས་དང་གུས་བཀུར་ཐོབ་རྒྱུར་ཕན་ཐོགས་ཡོང་རྒྱུ་དང་རྒྱལ་སྤྱིའི་གནད་དོན་ཐོག་རྒྱ་ནག་གིས་སྣེ་ཁྲིད་ཐུབ་པ་ཞིག་ཡོང་རྒྱུ་རེད་ཅེས་གསུང་གནང་འདུག

གསར་འགོད་པ་དོན་འགྲུབ་རྣམ་རྒྱལ།