༸གོང་ས་མཆོག་གིས། ལྷ་ས་ཁ་ཆེ་ཚོས་མི་རིགས་ཀྱི་ལ་རྒྱ་དང་ཞེན་ཁོག་སེམས་ལ་བཅངས་ནས་ཡོད་པ་དེར་དགའ་ཚོར་ཡོད་ཅེས་བཀའ་སྩལ་བ།

ཕྱི་ལོ་༢༠༢༣ཟླ་བ་༨ཚེས་༡ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གླེ་ཞི་བའི་ཚལ་ཕོ་བྲང་དུ་ལྷ་སའི་ཁ་ཆེ་རྣམས་ལ་མཇལ་ཁ་དང་བཀའ་སློབ་སྩལ་གནང་སྐབས། ལྷ་ས་ཁ་ཆེ་ཚོ་དང་ང་ཚོ་ལོ་ངོ་མང་པོའི་རིང་དཔེ་འཆམ་པོ་བྱས་ཏེ་བསྡད་པ་དང་། ལྷ་སར་སྡོད་སྐབས་ཁ་ཆེ་ཚོ་གཞུང་འབྲེལ་གྱི་མཛད་སྒོ་ག་རེ་ཡོད་ཀྱང་མཉམ་ཞུགས་གནང་གི་ཡོད་པ་དང་། ལྷ་ས་ཁ་ཆེ་ཁྱེད་ཚོར་ཐུག་འཕྲད་བྱུང་བར་ཧ་ཅང་དགའ་བོ་བྱུང་ལ། རྣམས་པ་ཚོར་དམིགས་བསལ་འཚམས་འདྲི་ཡོད་ཅེས་གསུངས་གནང་སོང་།

ཡང་༸གོང་ས་སྐྱབས་མགོན་ཆེན་པོ་མཆོག་ནས་གལ་ཆེ་ཤོས་ཤིག་ངོས་ནས་འཛམ་གླིང་གི་ཆོས་ལུགས་ཚང་མ་མཐུན་པོ་བྱས་ཏེ། དོན་དམ་པའི་འཛམ་གླིང་ཞི་བདེ་སྐྲུན་ཐབས་དང་། ངོས་ནས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད་ལ།ཆོས་ལུགས་ཚང་མས་མི་ལ་ཕན་ཐོགས་བྱུང་གི་ཡོད་པས། ང་ཚོ་ཆོས་པ་ཚོ་ཚང་མས་འཛམ་གླིང་ཞི་བདེ་ཡོང་བར་ཕན་ཚུན་འཆམ་མཐུན་དགོས་རྒྱུ་གལ་ཆེན་པོ་ཡིན་པ་གསུངས་གནང་སོང་།

༸གོང་ས་སྐྱབས་མགོན་ཆེན་པོ་མཆོག་ནས་མུ་མཐུད། ལྷ་ས་ཁ་ཆེ་ཚོར་ཆེད་དུ་ང་ཚོས་ངོས་ནས་བོད་རང་བཙན་བཤད་ཀྱི་མེད་པ་དང་། བོད་ཆོལ་ཁ་གསུམ་གཅིག་ཏུ་སྒྲིལ་བའི་རང་སྐྱོང་ཞིག་དགོས་ཀྱི་འདུག་ཅེས་བཤད་བཞིན་ཡོད་པ་རེད་ལ། ཀྲུང་ཧ་མི་མང་སྤྱི་མཐུན་རྒྱལ་ཁབ་ཀྱི་ཁོངས་སུ་བསྡད་ནས་རང་སྐྱོང་མིང་དོན་མཚུངས་པ་ཞིག་དང་། རང་སྐྱོང་དེ་ཡང་སྟོད་མངའ་རིས་སྐོར་གསུམ་དང་བར་དབུས་གཙང་རི་བཞི། སྨད་མདོ་ཁམས་སྒང་དྲུག་ཅེས་གཅིག་གྱུར་གྱི་རང་སྐྱོང་ཡག་པོ་ཞིག་བྱུང་ན་ཞེས་འབད་བརྩོན་བྱེད་ཀྱི་ཡོད་པ་གསུངས་གནང་སོང་།

མཇུག་ཏུ་༸གོང་ས་སྐྱབས་མགོན་ཆེན་པོ་མཆོག་ནས་བོད་ནང་གི་གཞིས་ལུས་རྒྱ་ཆེའི་མི་མང་ལ་མཚོན་ན། ཆོས་དད་ཡོད་མེད་གཉིས་ནས་བོད་ཀྱི་སྐད་དང་རིག་གཞུང་མི་རིགས་ཀྱི་ལ་རྒྱ་སོགས་སེམས་ཤུགས་ཆེན་པོ་ཡིན་པ་དང་། ངོས་ནས་འདིར་བོད་རྒྱ་ཆེའི་མི་མང་གི་སེམས་ཤུགས་དེ་གཞི་ལ་བཞག་ནས་བོད་ལ་རང་སྐྱོང་མང་དོན་མཚུངས་པ་ཞིག་ལ་འབད་བརྩོན་གནང་གི་ཡོད་པ་དང་། ལྷ་ས་ཁ་ཆེ་ཚོས་ཀྱང་མི་རིགས་ཀྱི་ལ་རྒྱ་དང་ཞེན་ཁོག་སེམས་བཅངས་ནས་ཡོད་པ་དེར་དགའ་ཚོར་ཡོད་ལ་དཀའ་དྲིན་ཆེ་ཞེས་གསུངས་གནང་སོང་།

༸གོང་ས་སྐྱབས་མགོན་ཆེན་པོ་མཆོག་ནས་ནམ་རྒྱུད་ལྷ་ས་ཁ་ཆེ་ཚོར་ཐུགས་མཉེས་བོ་གནང་གི་ཡོད་པ་བཞིན། ཉེ་སྔོན་ཟླ་བ་༧ཚེས་༡༤ཉིན་༸གོང་ས་མཆོག་ནས་ལ་དྭགས་གླེའི་ཇོ་བོའི་གཙུག་ལག་ཁང་དུ་གནས་གཟིགས་ཆིབས་སྒྱུར་དང་འབྲེལ། ལྷ་ས་ཁ་ཆེ་ཚོགས་ཆུང་ཞིག་ལ་མཇལ་ཁ་དང་འབྲེལ་ངོས་ལ་བོད་ནས་བཟུང་ཁ་ཆེ་གྲོགས་པོ་མང་པོ་ཡོད་པ་སོགས་ཀྱི་བཀའ་སློབ་སྩལ་གནང་ཡོད་པ་རེད།

གསར་འགོད་པ། སངས་རྒྱས་དཀོན་མཆོག
རྩོམ་སྒྲིག་པ། བསྟན་འཛིན་འཕགས་སྒྲོན། ཡེ་ཤེས་ཟླ་བ།
དྲྭ་ཐོག་སྤེལ་མཁན། བསྟན་འཛིན་འཕགས་སྒྲོན།