བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་གནང་ན། བླ་མ་ལ་སྒྲུབ་པའི་མཆོད་པ་ཡག་ཤོས་དེ་རེད་ཅེས། ༸གོང་ས་མཆོག་གིས།

བཞུགས་སྒར་གྱི་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ལ། སྒྲོལ་དཀར་ཡིད་བཞིན་འཁོར་ལོའི་ཚེ་སྒྲུབ་ཀྱི་སྒོ་ནས་སྤྱི་ཟླ་ ༦ པའི་ཚེས་ ༡༡ ཉིན། སྐུ་སྲུང་ཟུར་པ་རྣམས་དང་སྨན་རྩིས་ཁང་གི་འགོ་ལས་རྣམ་པ། གཞུང་ཞབས་ལས་བྱེད་ཟུུར་པ་བཅས་ནས་བརྟན་བཞུགས་བསྟར་འབུལ་ཅིག་གནང་ཡོད་ཅིང་། སྐབས་དེར་མགོན་པོ་མཆོག་ནས་བརྟན་བཞུགས་ཕུལ་བ་ནི་དངུལ་དངོས་ཀྱི་སྐད་ཆ་མིན་པར། སོ་སོ་མི་རེ་ངོ་རེས་ཉི་མ་རེ་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་ཡག་པོ་གནང་ཐུབ་ན། བླ་མ་དགྱེས་པ་དང་སྒྲུབ་པའི་མཆོད་པ་ཡག་ཤོས་དེ་ཡིན་པ་བཀའ་གནང་གི་འདུག

གཞན་ཡང་མགོན་པོ་གང་ཉིད་ལ་མཚན་ལམ་གྱི་རྣམ་པར་དཔལ་ལྡན་ལྷ་མོས་དགུང་ལོ་བརྒྱ་དང་བཅུ་ལ་བཞུགས་རྒྱུའི་ལུང་བསྟན་ཧ་ཅང་གསལ་བོ་ཞིག་བྱུང་བ་དང་། རིགས་པའི་རྒྱུ་མཚན་བཀོད་ནའང་ད་ལྟ་བོད་མི་རྣམས་དཀའ་ངལ་ཆེན་པོར་འཕྲད་བསྡད་པའི་གནས་སྐབས་སུ། ལས་དང་སྨོན་ལམ་གྱི་དབང་གིས་བོད་མི་མང་པོས་ངོས་ལ་དགའ་མོས་དང་། ལུང་རྟོགས་ཀྱི་བསྟན་པ་ལའང་ཕན་ཐོགས་འབྱུང་གི་ཡོད་པས་ངོས་རང་ལོ་བརྒྱ་དང་བཅུ་གྲངས་ཤིག་བསྡད་ངེས་རེད་ཅེས་བཀའ་གནང་གི་འདུག

འཛམ་གླིང་ཤར་ནུབ་སྤྱི་དང་བོད་དབང་སྒྱུར་བྱེད་མཁན་རྒྱ་ནག་ཏུའང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པར་བརྟེན། ང་ཚོས་ཅི་ཐུབ་གང་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བསམ་བློ་བཏང་ན། སོ་སོ་སྒེར་དང་བོད་སྤྱི་པའི་དོན་དུའང་ཕན་ཐོགས་འབྱུང་གི་རེད་ཅེས་ལམ་སྟོན་གནང་གི་འདུག

བརྟན་བཞུགས་ཕུལ་མཁན་གྱི་ནང་གཞུང་ཞབས་བགྲེས་པ་དང་ལྷག་པར་བོད་ནང་ནས་བཟུང་སྐུ་སྲུང་གནང་མཁན་གྱི་སྐུ་སྲུང་བགྲེས་པའང་མང་པོ་ཞིག་ཆེད་དུ་བཅར་ཡོད་པས། སྐུ་སྲུང་ཟུར་པ་ཐུབ་བསྟན་ཆོས་འཕེལ་ལགས་ནས་ཁོ་ཚོ་བོད་ནས་སྐུ་སྲུང་དུ་བཅར་མི་སྐོར་ཅིག་རྒྱ་གར་དང་བོད་ཀྱི་ས་མཚམས་སོགས་ནས་སྐུ་ཕྱྭ་སྲུང་སྐྱོབ་ཆེད། རྒྱ་ནག་བཅིངས་གྲོལ་དམག་དང་འཐབ་འཛིང་གིས་སྐུ་སྲོག་ཤོར་ཡོད་པར་བརྟེན། སྐུ་སྲུང་འདས་གསོན་མང་པོ་ཞིག་གི་ངོ་ཚབ་ལྟ་བུས་བརྟན་བཞུགས་ཕུལ་བ་སོགས་ཀྱིས། སེམས་ནང་དགའ་སྐྱོའི་ཚོར་བ་ཤུགས་ཆེ་བྱུང་བ་འགྲེལ་བརྗོད་གནང་གི་འདུག

བརྟན་བཞུགས་འདི་ལ་ལྷོ་བྱང་ཨ་མི་རི་ཀ་དང་ཡོ་རོབ། ཨོ་སི་ཁྲི་ར་ལི་ཡ་དང་རྒྱ་གར་སོགས་ནས། གཞུང་ཞབས་ཟུར་པ་ནང་མི་དང་བཅས་པ་བརྒྱད་བརྒྱ་ལྷག་དང་སྨན་རྩིས་ཁང་གི་འགོ་ལས་ལྔ་བརྒྱ་ལྷག སྐུ་སྲུང་ཟུར་པ་སུམ་བརྒྱ་ལྷག་བཅས་བཞུགས་སྒར་ལ་ཆེད་དུ་བཅར་ཡོད་པ་རེད།

གསར་འགོད་པ། བློ་བྷེ། 
རྩོམ་སྒྲིག་པ། བསྟན་འཛིན་པདྨ། ཡེ་ཤེས་ཟླ་བ། 
དྲྭ་ཐོག་སྤེལ་མཁན། ཡེ་ཤེས་ཟླ་བ།