ཡ་རབས་བཟང་སྤྱོད་གལ་ཆེའི་སྐོར་བཀའ་ཕེབས།

༄༅།    །དེ་ཡང་ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཚེས་༡༡ཉིན་ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། ནང་སྲིད་བཀའ་བློན་རྒྱ་རི་སྒྲོལ་མ་མཆོག ཝར་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང་འབྲེལ་ཡོད་ས་གནས་ཀྱི་རྒྱ་གར་སྐུ་མགྲོན་རྣམ་པ། སློབ་གཉེར་ཁང་གི་དགེ་ལས་སློབ་ཕྲུག་བཅས་ཁྱོན་མི་གྲངས་ ༩༠༠ བརྒལ་བ་ལྷན་འཛོམས་ཐོག་ལམ་སྟོན་བཀའ་སློབ་གནང་སྐབས།    ཡ་རབས་བྱ་རྒྱུའི་རྩ་བ་དེ་ཁ་དང་ཕྱིའི་རྣམ་འགྱུར་འདྲ་ཆགས་པོ་བྱ་རྒྱུའི་སྐད་ཆ་མིན་པར། སེམས་ཀྱི་ནང་ནས་གཞན་ལ་གུས་བཀུར་དང་བརྩེ་བ་བྱ་རྒྱུ། གཞན་གྱི་བདེ་སྡུག་དང་རང་གི་བདེ་སྡུག་མཉམ་དུ་འགྲོ་མ་ཐུབ་པའི་གནས་ཚུལ་བྱུང་ཚེ། གཞན་གྱི་བདེ་སྡུག་གལ་ཆེ་བ་བརྩི་རྒྱུ་དེ་ཡ་རབས་ཟེར་གྱི་ཡོད། ཅེས་བཀའ་གནང་བ་དང་འབྲེལ།    དེ་ཡོང་བར་གཙོ་བོ་སེམས་ལ་ཐུག་ཡོད་པ་ལས། ཕྱིའི་རྣམ་འགྱུར་གྱི་སྐད་ཆ་མིན་སྐོར་བཀའ་གནང་ཡོད་པ་རེད།
༧གོང་ས་མཆོག་ནས་སྐབས་དེར་དུང་།    ངོས་ཀྱིས་ནམ་རྒྱུན་ཤོད་བཞིན་པའི་དཔལ་ན་ལེནྡྲའི་མཁས་དབང་ཚོའི་ལྟ་གྲུབ་ཟེར་ནའང་མི་འདུག གང་ལྟར་རྣམ་དཔྱོད་ཀྱི་རྩལ་ལས་ཐོན་པའི་ལེགས་བཤད་མང་པོ་ཞིག་སྔོན་གྱི་མཁས་དབང་ཚོས་མཛད་པའི་ལེགས་བཤད་ཙམ་མ་ཡིན་པར། ད་ལྟ་དུས་རབས་ཉེར་གཅིག་ནང་འབྲེལ་བ་ཡོད་པའི་ལྟ་གྲུབ་མང་དག་ཅིག་ཡོང་གི་ཡོད། དེ་རིང་ཁ་སང་གི་དུས་ཚོད་ལ་ཆོས་ལ་དད་པ་དང་དོ་སྣང་མེད་མཁན་གྱི་ནང་ནས་ནང་པའི་ལྟ་གྲུབ་ཅེས་བརྗོད་སྐབས་དེར་དོ་སྣང་བྱ་རྒྱུ་ཞིག་ཆགས་ཀྱི་འདུག དེ་ལྟ་བུའི་ལྟ་གྲུབ་དེ་ཕལ་ཆེར་ང་ཚོས་ངག་རྒྱལ་བྱས་ན་བཤད་པ་མ་རེད། དངོས་ཡོད་གནས་ཚུལ་ཐོག་ཞིབ་འཇུག་བྱས་ན། བོད་གངས་ཅན་ལྗོངས་ལ་འདས་པའི་ལོ་སྟོང་ཕྲག་རིང་ལ་མཁན་ཆེན་ཞི་འཚོ་ཡབ་སྲས་ནས་སློབ་གཉེར་བྱ་རྒྱུའི་ལམ་སྟོན་ཞིག་གནང་སྟེ། བསྟན་པ་བཤད་སྒྲུབ་གཉིས་ཀྱི་ཐོག་ནས་འཛིན་སྐྱོང་སྤེལ་གསུམ་བྱ་རྒྱུའི་སྲོལ་བཟང་པོ་ཞིག་ང་ཚོ་བོད་མི་རིགས་ཀྱིས་བཟུང་ཡོད། དེང་སང་གཞི་ནས་བསྡུར་སྐབས་ང་ཚོའི་མི་རབས་ནས་མི་རབས་བདག་པོ་བརྒྱབ་པའི་དངོས་པོ་དེ་རིན་ཐང་ཡོད་པ་ཞིག་མཐོང་ཐུབ་རྒྱུ་རེད་འདུག ཅེས་སོགས་བཀའ་སློབ་གནང་ཡོད་པ་རེད།    དེ་ཉིན་༧གོང་ས་མཆོག་ནས་ད་དུང་།    ཝར་ཎ་བོད་དགོན་བཤད་སྒྲུབ་འདོད་རྒུ་འཁྱིལ་དུ་ཆིབས་སྒྱུར་བསྐྱངས་ཏེ་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དབུ་འབྱེད་དང་འབྲེལ།    ལམ་སྟོན་བཀའ་སློབ་གནང་འདུག།