༸གོང་ས་མཆོག་གིས་ལ་དྭགས་གྲོགས་པོ་རྣམས་དང་ཉིན་གཅིག་ལྷ་སར་ཞལ་འཛོམས་འབྱུང་རྒྱུའི་གོ་སྐབས་བྱུང་ངེས་ཡིན་པ་བཀའ་སྩལ་སོང་།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཕྱི་ཟླ་ ༨ པའི་ཚེས་ ༢༣ ཉིན་ལ་དྭགས་བདེ་སྐྱིད་ཚལ་ཡུལ་གྱི་ཐུབ་བསྟན་གླིང་དགོན་པ་གསར་བཞེངས་ལེགས་གྲུབ་ཀྱིས་དབུ་བྱེད་རབ་གནས་སྩལ་གནང་མཛད་རྗེས་ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་རྗེ་ལེགས་འབུལ་གྱི་གུང་ཚིགས་ཤིག་འདེགས་འབུལ་གནང་སོང་། དང་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བདེ་སྐྱིད་ཚལ་ཐུབ་བསྟན་གླིང་དགོན་པར་བཀའ་སློབ་སྩལ་བའི་ནང་དམིགས་བསལ་ལ་དྭགས་ཀྱི་གྲོགས་པོ་རྣམས་དང་ཉིན་གཅིག་ལྷ་སར་མཇལ་རྒྱུའི་གོ་སྐབས་འབྱུང་ངེས་ཡིན་ཞེས་བཀའ་སྩལ་གནང་སོང་།

ཡང་བོད་ཀྱི་སྐད་དང་རིག་གཞུང་གཉིས་མི་ཉམས་རྒྱུན་འཛིན་ཆེད་ཧི་མ་ལ་ཡའི་རི་རྒྱུད་ཀྱི་མི་རིགས་དག་གིས་འབད་བརྩོན་བྱེད་བཞིན་ཡོད་ལ། ད་ལྟའི་དུས་འདིར་དམིགས་བསལ་གྱི་གོ་སྐབས་ཤིག་ཆགས་ཀྱི་ཡོད་ཅེས་གསུངས་གནང་སོང་། ཡང་མགོན་པོ་མཆོག་ནས་མུ་མཐུད་ལ་དྭགས་ས་གནས་སུ་འདོན་པ་བཏོན་པ་དང་། ལྷ་སྒོམ་པ་སོགས་གལ་གནད་ཆེ་ཡང་། དེ་དག་ལས་སེམས་པ་བཟང་པོ་བྱ་རྒྱུ་གལ་ཆེ་སྐོར་བཀའ་སྩལ་སོང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དུས་ནས་དུས་སུ་ལ་དྭགས་ས་གནས་སུ་ཐུགས་བརྩེ་བ་ཆེན་པོས་ཕེབས་པར་ལ་དྭགས་གླེ་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་མགོན་པོ་མཆོག་ལ་ཐུགས་རྗེ་ལེགས་འབུལ་གྱི་ས་གནས་འཛིན་སྐྱོང་གི་གནས་ཡོད་མི་སྣ་ཁག་དང་ལས་བྱེད་ཚང་འཛོམས་ཐོག་དགུང་ཚིགས་ཤིག་འདེགས་འབུལ་ཞུས་ཞུས་པའི་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སློབ་གྲྭའི་སློབ་ཕྲུག་རྣམས་ལ་བྱམས་སྙིང་རྗེའི་ཐོག་སློབ་ཁྲིད་གནང་དགོས་རྒྱུ་གལ་ཆེ་ཡིན་པའི་བཀའ་སློབ་དཀའ་དྲིན་སྩལ་སོང་།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་བར་ལ་དྭགས་སུ་ཆིབས་སྒྱུར་གནང་ཐེངས་ ༢༦ གནང་ཡོད་ཅིང་། ད་རེས་ཀྱི་ཆིབས་སྒྱུར་འདི་ཉིད་ལ་དྭགས་ཀྱི་ལོ་རྒྱུས་ནང་དུས་ཡུན་རིང་ཤོས་དེ་ཆགས་ཀྱི་ཡོད་པ་རེད།

གསར་འགོད་པ། འཕྲིན་ལས་ཆོས་སྒྲོན།
རྩོམ་སྒྲིག་པ། ཡེ་ཤེས་ཟླ་བ། བསྟན་འཛིན་འཕགས་སྒྲོན།
དྲ་ཐོག་སྤེལ་མཁན། བསྟན་འཛིན་འཕགས་སྒྲོན།