༧གོང་ས་མཆོག་ཧྥ་རན་སིའི་ནང་ཆེ་མཐོང་ཆེན་པོ་ཡོད་འདུག

ཧྥ་རན་སིའི་མི་དམངས་མང་པོས་ཡུལ་དེའི་སྲིད་འཛིན་གྱིས་༧གོང་ས་མཆོག་དང་མཇལ་འཕྲད་གནང་དགོས་བའི་བསམ་ཚུལ་གསུངས་འདུག
ཉེ་ཆར་ཧྥ་རན་སིའི་གསར་འགྱུར་ལས་ཁང་ཞིག་གིས་མང་ཚོགས་ཀྱི་བསམ་ཚུལ་བསྡུ་ལེན་ཞིག་བྱས་སྐབས། ཧྥ་རན་སིའི་མི་དམངས་བརྒྱ་ཆ་༨༦་གིས་ཧྥ་རན་སིའི་སྲིད་འཛིན་མཆོག་གིས་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་རྒྱུར་རྒྱབ་སྐྱོར་གནང་ཡོད་པ་རེད།
དེ་ནི་ཧྥ་རན་སིའི་སྤྱི་དམངས་བསམ་ཚུལ་བསྡུ་ལེན་ལྟེ་གནས་ཁང་གིས་ཟླ་འདིའི་ཕྱི་ཚེས་༦་དང་༧་ཉིན་ཁ་པར་བརྒྱུད་མང་ཚོགས་ནང་བསམ་ཚུལ་བསྡུ་ལེན་བྱས་སྐབས་མང་ཚོགས་བརྒྱ་ཆ་༨༦་གིས་ད་རེས་༧གོང་ས་མཆོག་ཕྱི་ཟླ་༩་ཚེས་༡༢་ནས་༡༨་བར་ཧྥ་རན་སིའི་ནང་ཆིབས་བསྒྱུར་སྐབས། ཡུལ་དེའི་སྲིད་འཛིན་François Hollande་མཆོག་གིས་༧གོང་ས་ཏཱ་ལའི་བླ་མ་མཆོག་ལ་འགྲོ་བ་མིའི་ཐོབ་ཐང་གི་མིང་ཐོག་ནས་གཞུང་འབྲེལ་མཇལ་འཕྲད་གནང་དགོས་པའི་དགོངས་ཚུལ་སྟོན་ཡོད་འདུག
དམངས་ཚོགས་བརྒྱ་ཆ་༨༦་དེའི་ནང་ལོ་ནའི་ཚད་གཞི་མེད་པ་མ་ཟད། ཆབ་སྲིད་ཀྱི་རྒྱབ་ལྗོངས་དབྱེ་མེད་ཐོག དེའི་ནང་སྤྱི་ཚོགས་རིང་ལུགས་ལ་རྒྱབ་བསྐྱོར་མཁན་བརྒྱ་ཆ་༩༡་གིས་རྒྱབ་སྐྱོར་གནང་སྟེ་མང་ཤོས་དེ་ཆགས་ཡོད་འདུག
འོན་ཀྱང་༧གོང་ས་མཆོག་གིས། སྲིད་འཛིན་ལ་དམིགས་བསལ་ཞུ་རྒྱུའི་གནད་དོན་གང་ཡང་མེད་པས་ངེས་པར་དུ་སྲིད་འཛིན་མཇལ་འཕྲད་ཞུ་དགོས་པ་དགོངས་ཀྱི་མི་འདུག་ཅེས་གསར་འགོད་པར་བཀའ་ལན་གནང་འདུག།
བོད་དོན་ཐད་དོ་སྣང་ཆེན་པོ་གནང་མཁན་ཧྥ་རན་སིའི་གྲོས་ཚོགས་གོང་མིའི་འཐུས་མི་ཨན་སྡུ་ཧི་སྒེ་ཐུ་ལན་André Gattolin་མཆོག་གིས། དམངས་ཚོགས་ཁྲོད་བསམ་ཚུལ་བསྡུ་ལེན་གྱི་གྲུབ་འབྲས་འདིའི་ཐོག་ནས་རྒྱ་ནག་གཞུང་གིས་ནུབ་ཕྱོགས་ཡུལ་གྲུ་ཚོར་གནོན་ཤུགས་སྤྲད་མིན་ལ་མ་བལྟོས་བར། ཧྥ་རན་སིའི་ངོས་ནས་༧གོང་ས་ཏཱ་ལའི་བླ་མ་མཆོག་གི་མཛད་རྗེས་ལ་ཆེ་མཐོང་དང་། བོད་དོན་ཐད་རྒྱབ་སྐྱོར་ཤུགས་ཆེ་ཡོད་པ་མཚོན་ཐུབ་པ་དང་། དེ་བཞིན་འདི་ལོའི་ཕྱི་ཟླ་༦་ཚེས་༡༥་ཉིན་ཨ་རིའི་སྲིད་འཛིན་ཨོ་བྷ་མ་མཆོག་ནས་ཀྱང་རྒྱ་ནག་གི་གནོན་ཤུགས་ལ་མ་བལྟོས་བར་༧གོང་ས་མཆོག་དང་ཕོ་བྲང་དཀར་པོའི་ནང་མཇལ་མོལ་གནང་ཡོད་པ་གསུངས་འདུག།

གསར་འགོད་པ་བསོད་ནམས་ལྷ་མོ།